នៅ​ទីក្រុង​ហាណូយ សីតុណ្ហភាព​​ឡើង​ដល់​​​ ៤០ អង្សារ​សេ ទូតខ្មែរ​​ណែនាំ​ដល់​ពលរដ្ឋ​​ប្រុង​ប្រយ័ត្ន

ភ្នំពេញ៖ ស្ថានឯកអគ្គរាជទូតកម្ពុជាប្រចាំនៅ​ប្រទេស​វៀតណាម បានណែនាំដល់និស្សិត សិក្ខាកាមនិងប្រជាពលរដ្ឋខ្មែរកំពុងមានវត្តមាននៅវៀតណាម ត្រូវមានការប្រុងប្រយ័ត្នខ្ពស់ចំពោះការកើនកម្តៅ ខណៈនៅទីក្រុងហាណូយអាចមានស៊ីតុណ្ហភាពរហូតដល់ទៅ៤០អង្សារសេ។

យោងតាមសេចក្តីជូនដំណឹងរបស់ស្ថានទួតបានឲ្យដឹងថា យោងតាមសារព័ត៌មាន VN Express ចេញផ្សាយនៅថ្ងៃទី១ ខែមិថុនា ឆ្នាំ ២០២១ ទីក្រុងហាណូយ និងខេត្តនៅជាប់ ដូចជា Hoa Binh, Hung Yen និង Ha Nam មានសីតុណ្ហភាពឡើងដល់ ៤០អង្សារសេ។ សីតុណ្ហភាពនឹងនៅថេរ លើសពី៣៥អង្សារសេ រហូតដល់ ១៩ ម៉ោងក្នុងមួយថ្ងៃហើយការឡើងកំដៅនេះ នឹងនៅតែបន្តកើតមានក្នុងរយៈពេល ៣ ថ្ងៃបន្តទៀត។

ស្ថានឯកអគ្គរាជទូតសូមណែនាំដល់និស្សិត សិក្ខាកាម និងប្រជាពលរដ្ឋខ្មែរកំពុងមានវត្តមាន នៅវៀតណាម ពិសេសនៅទីក្រុងហាណូយ មេត្តាមានការប្រុងប្រយ័ត្នខ្ពស់ថែរក្សាសុខភាព ដោយឧស្សាហ៍ទទួលទានទឹកឱ្យបានច្រើន និងគួរមានទឹកដាក់តាមខ្លួនជាប់ជាប្រចាំ ដើម្បីទប់ទល់នឹងអាកាសធាតុក្ដៅខ្លាំង។

ឆ្លៀតឱកាសនេះ ស្ថានទូតសូមរំលឹកដល់និស្សិត សិក្ខាកាម និងប្រជាពលរដ្ឋខ្មែរ មានវត្តមាន នៅវៀតណាម សូមមេត្តាបន្តថែរក្សាសុខភាពឲ្យបានល្អ រក្សាគម្លាតសុវត្ថិភាព ពាក់ម៉ាស រក្សាអនាម័យ និងអនុវត្តតាមវិធានការសុខាភិបាល សំដៅការពារកុំឲ្យឆ្លងជំងឺកូវីដ-១៩៕

អត្ថបទ៖ សំអឿន