រដ្ឋបាលខេត្តប៉ៃលិន បិទផ្សារសាមគ្គី(ហៅផ្សារប៉ាហ៊ី)ជាបណ្តោះអាសន្ន

យោងលិខិតលេខ០៧៦/២១សសរ ចុះថ្ងៃទី១៨ ខែមិថុនា ឆ្នាំ២០២១ របស់រដ្ឋបាលខេត្តប៉ៃលិន បានសម្រេចបិទជាបណ្តោះអាសន្ននូវ ទីតាំងផ្សារសាមគ្គី(ហៅផ្សារប៉ាហ៊ី) ស្ថិតក្នុងសង្កាត់ប៉ៃលិន ក្រុងប៉ៃលិន ខេត្តប៉ៃលិន ចាប់តាំងពីថ្ងៃទី១៨ ខែមិថុនា ឆ្នាំ២០២១នេះ រហូតមានការជូនដំណឹងជាថ្មី។

លិខិតរបស់រដ្ឋបាលខេត្តប៉ៃលិន ក៏បានបញ្ជាក់ថា ប្រការ១. ត្រូវបានបិទជាបណ្តោះអាសន្នទីតាំងផ្សារសាមគ្គី(ហៅផ្សារប៉ាហ៊ី) ស្ថិតនៅក្នុងសង្កាត់ប៉ៃលិន ក្រុងប៉ៃលិន ខេត្តប៉ៃលិន ចាប់ពីថ្ងៃទី១៨ ខែមិថុនា ឆ្នាំ២០២១ រហូតមានការសម្រេចជាថ្មី។ ប្រការ២. ក្នុងអំឡុងពេលផ្អាកជាបណ្តោះអាសន្ននេះ រដ្ឋបាលក្រុងប៉ៃលិន ត្រូវ ហ៊ុមព័ទ្ធទីតាំងផ្សារទាំងមូល ,ផ្អាកការចេញ ចូលបរិវេណផ្សារ ដើម្បីរៀបចំសណ្តាប់ធ្នាប់អនាម័យ ,សហការជាមួយមន្ទីរសុខាភិបាល នៃរដ្ឋបាលខេត្ត ដើម្បីធ្វើការបាញ់ថ្នាំសម្លាប់មេរោគ។ ប្រការ៣.សេចក្តីសម្រេចទាំងឡាយណា របស់រដ្ឋបាលខេត្តប៉ៃលិន ដែលមានខ្លឹមសារផ្ទុយពីសេចក្តីសម្រេចនេះ ត្រូវទុកជានិរាករណ៍។

សូមបញ្ជាក់ថា ករណីសម្រេចបិទទីតាំងផ្សារសាមគ្គី ហៅផ្សារប៉ាហ៊ី នេះ គឺបន្ទាប់ពីមាន អ្នកវិជ្ជមានកូវីដ១៩ ចំនួនពីរនាក់ ឈ្មោះ ហ៊ី អៀងហួ ត្រូវជាប្តី និងឈ្មោះ អ៊ុយ អែម ត្រូវជាប្រពន្ធ ដែលជាអាជីវករលក់គ្រឿងក្រអូប ក្នុងផ្សារផ្សារសាមគ្គី(ហៅផ្សារប៉ាហ៊ី)នេះផងដែរ ៕

អត្ថបទ ៖ សេង សុវណ្ណារិទ្ធ