សមត្ថកិច្ចឃាត់ខ្លួនជនជាតិវៀតណាម៥នាក់ លួចឆ្លងដែនខុសច្បាប់

សមត្ថកិច្ចខេត្តស្វាយរៀងបានធ្វើការឃាត់ខ្លួនជនជាតិវៀតណាមចំនួន០៥នាក់ ស្រី០៣នាក់លួចឆ្លងដែនខុសច្បាប់ចូលមកកម្ពុជា នៅចំណុចខ្សែបន្ទាត់ព្រំដែន កម្ពុជា-វៀតណាម។

ការងារនេះអនុវត្តតាមបទបញ្ជាដ៏ម៉ឺងម៉ាត់របស់រាជរដ្ឋាភិបាល ក្រសួងមហាផ្ទៃ អគ្គស្នងការដ្ឋាននគរបាលជាតិ គណៈបញ្ជាការឯកភាពរដ្ឋបាលខេត្ត និងក្រោមការដឹកនាំបញ្ជាផ្ទាល់ ពីលោកឧត្តមសេនីយ៍ទោ កឹង ឃន ស្នងការនគរបាលខេត្ត ក្នុងការងារទប់ស្កាត់ការឆ្លងរាលដាលនៃជំងឺកូវីដ-១៩ នៅតាមព្រំដែន។

ជនជាតិវៀតណាមលួចឆ្លងដែនខុសច្បាប់ចូលមកកម្ពុជាទាំង៥នាក់នោះក្នុងនោះ ត្រូវបានកម្លាំងប៉ុស្តិ៍នគរបាលការពារព្រំដែនសំយ៉ោង វរ៦០៩ ប៉ុស្តិ៍នគរបាលរដ្ឋបាលបន្ទាយក្រាំង សហការជាមួយសមត្ថកិច្ចពាក់ព័ន្ធ បានល្បាតចល័ត បង្ក្រាបនៅយប់ថ្ងៃទី ២០ ខែកក្កដា ឆ្នាំ២០២១ នៅចំណុច ខ្សែបន្ទាត់ព្រំដែន កម្ពុជា (ស្ថិតនៅភូមិប្រចន្ទ្រា ឃុំបន្ទាយក្រាំង ស្រុកកំពង់រោទ៍ ខេត្តស្វាយរៀង) – វៀតណាម (ស្ថិតនៅភូមិទ្រុងចិន ឃុំថាយប៊ុនទ្រុង ស្រុកវិញហ៊ឹង ខេត្តឡុងអាន)។

គួររំលឹកផងដែរថា កន្លងមកកម្លាំងនគរបាលការពារព្រំដែនសហការជាមួយកម្លាំងពាក់ព័ន្ធ បានទប់ស្កាត់ជនបរទេសឆ្លងដែនខុសច្បាប់ចូលមកកម្ពុជា និងឃាត់ខ្លួនមេខ្យល់ កសាងសំនុំរឿងចាត់ការតាមច្បាប់ជាបន្តបន្ទាប់៕

អត្ថបទ៖ សំអឿន