ព័ត៌មានជាតិ

អាជ្ញាធរសង្កាត់គងនយ កំពុងញាប់ដៃស្ថាបនាផ្លូវបេតុង ជូនពលរដ្ឋប្រើប្រាស់

បានផុស

៥ years មុន

នៅ

ថ្ងៃអង្គារ ១ ធ្នូ ២០២០

ដោយ

ដោយសារមានតម្រូវការពីបងប្អូនប្រជាពលរដ្ឋ នៅក្នុងមូលដ្ឋាន អាជ្ញាធរសង្កាត់គងនយ ខណ្ឌដង្កោ បាននឹងកំពុងញាប់ដៃស្ថាបនាផ្លូវបេតុង នៅជាប់មាត់ប្រឡាយ ដើម្បីបម្រើផលប្រយោជន៍រួមសម្រាប់ប្រជាពលរដ្ឋទូទៅធ្វើដំណើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអភិវឌ្ឍន៍ ស្ថាបនាជាផ្លូវបេតុងរបស់អាជ្ញាធរសង្កាត់គងនយ នាពេលនេះ គឺស្ថិតនៅភូមិវាលថ្លាន់ សង្កាត់គងនយ ខណ្ឌដង្កោ រាជធានីភ្នំពេញ។

បើយោងតាមការលើកឡើងពីក្រុមការងារ ដែលកំពុងបំពេញភារកិច្ច ក្នុងការស្ថាបនាផ្លូវបេតុងមួយខ្សែនេះ ប្រាប់ឲ្យដឹងថា ផ្លូវដែលកំពុងស្ថាបនាជាផ្លូវបេតុងនេះ ស្ថិតនៅក្នុងភូមិវាលថ្លាន់ សង្កាត់គងនយ ខណ្ឌដង្កោ រាជធានីភ្នំពេញ ប្រវែង ៣៣៤ម៉ែត្រ ទទឹងប្រវែង ៤ម៉ែត្រ គ្មានសរសៃដែក កម្រាស់ ០,១៥ម៉ែត្រ ( ១តឹកកន្លះ ) ក្រាលថ្មមិចពីខាងក្រោម។ ចំពោះការស្ថាបនាផ្លូវបេតុងមួយខ្សែនេះ គឺចាប់ផ្តើមតាំងពីថ្ងៃទី២៤ ខែវិច្ឆិកា ឆ្នាំ២០២០ មកម្ល៉េះ អាចនឹងបញ្ចប់ក្នុងរយៈពេលប្រហែលកន្លះខែ ( ១៥ថ្ងៃ ) នុះប្រសិនបើគ្មានឧបសគ្គអាកាសធាតុ។ ប៉ុន្តែបើមានភ្លៀង ឬ ខ្យល់ផ្សេងៗ ដែលធ្វើឲ្យមានការប៉ះពាល់ នៃការស្ថាបនានោះ អាចអូសបន្លាយវេលាទៅតាមការជាក់ស្តែង។

ប្រជាពលរដ្ឋរស់នៅតំបន់នោះប្រាប់ឲ្យដឹងថា ផ្លូវដែលកំពុងស្ថាបនាជាផ្លូវបេតុង គឺជាផ្លូវខ្នងប្រឡាយខាងត្បូងផ្លូវលេខ១០៤ ឬ ផ្លូវលេខ ២០A។ ដោយសារផ្លូវខ្នងប្រឡាយនេះ មានសភាពតូច ចង្អៀត និងមានជង្ហុក ពិបាកដល់ការធ្វើដំណើររបស់បងប្អូនប្រជាពលរដ្ឋក្នុងភូមិ ទើបអាជ្ញាធរសង្កាត់គងនយ ក្រោមការគ្រប់គ្រងពីលោក អ៊ុន សុខរុំ ចៅសង្កាត់គងនយ បានបញ្ចេញកញ្ចប់ថវិកាមូលនិធិសង្កាត់ ដើម្បីអភិវឌ្ឍន៍ ស្ថាបនាជាផ្លូវបេតុងឲ្យបានស្អាតល្អ ជូនបងប្អូនប្រជាពលរដ្ឋទូទៅប្រើប្រាស់។

នាសកម្មភាពនេះ ផងដែរ ប្រជាពលរដ្ឋដែលរស់នៅសង្កាត់គងនយទាំងអស់ ជាពិសេសពលរដ្ឋរស់នៅភូមិវាលថ្លាន់នេះ ផ្ទាល់តែម្តង សូមថ្លែងអំណរគុណចំពោះអាជ្ញាធរខណ្ឌដង្កោ ក៏ដូចជា លោក អ៊ុន សុខរុំ ចៅសង្កាត់គងនយ ដែលតែងតែយកចិត្តទុកដាក់គិតគូរជួយដោះស្រាយ នូវរាល់ផលលំបាកនានារបស់បងប្អូនប្រជាពលរដ្ឋ ដែលរស់នៅក្នុងមូលដ្ឋានជាប់ជាប្រចាំ៕