នៅភ្នំពេញ ៖ កងកម្លាំងជាង១ពាន់នាក់ នឹងដាក់ពង្រាយការពារសន្តិសុខពិធីអបអរសាទរឆ្នាំថ្មីនៅយប់នេះ

លោកវរសេនីយឯក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញបានអះអាងឲ្យដឹងនៅព្រឹកថ្ងៃសុក្រនេះថា ស្នងការដ្ឋាននគរបាលរាជធានីភ្នំពេញ នឹងដាក់ពង្រាយកម្លាំងសមត្ថកិច្ចប្រមាណជាង១ពាន់នាក់ ដើម្បីការពារសន្តិសុខ សណ្តាប់ធ្នាប់ និងសម្រួលចរាចរណ៍ជូនប្រជាពលរដ្ឋ នៅក្នុងឱកាសបុណ្យឆ្លងឆ្នាំសកលនេះ។

អ្នកនាំពាក្យស្នងការដ្ឋាននគរបាលរាជធានីភ្នំពេញរូបនេះ បានមានប្រសាសន៍ថា កងកម្លាំងសមត្ថកិច្ចជាង១ពាន់នាក់នេះ នឹងដាក់ពង្រាយនៅតាមគោលដៅសំខាន់ៗនានា ពិសេស នៅកន្លែងកម្សាន្តសប្បាយធំៗដែលប្រជាពលរដ្ឋទៅកម្សាន្តច្រើនដូចជា នៅមាត់ទន្លេ មុខព្រះបរមរាជវាំង រមណីយដ្ឋានវត្តភ្នំ និងកោះពេជ្រ ដើម្បីជួយសម្រួលចរាចរណ៍ ការពារសន្តិសុខ សណ្តាប់ធ្នាប់ និងសុវត្តិភាពដល់ប្រជាពលរដ្ឋឱ្យមានភាពកក់ក្តៅ និងប្រកបដោយសប្បាយរីករាយនៅក្នុងពិធីបុណ្យឆ្លងឆ្នាំសកលយប់នេះ។

លោក វរសេនីយឯក សាន សុខសីហា បានលើកឡើងថា ៖ «ជាធម្មតាស្នងការដ្ឋាននគរបាលរាជធានីភ្នំពេញតែងតែត្រៀមលក្ខណៈជាមុនដោយរៀបចំកងកម្លាំងច្បាស់លាស់ ដើម្បីធ្វើយ៉ាងណាការពារសន្តិសុខសណ្តាប់ជូនប្រជាពលរដ្ឋយើងដែលធ្វើដំណើរកម្សាន្តនៅរាជធានីភ្នំពេញ និងជួយសម្រួលចរាចរណ៍ជូនប្រជាពលរដ្ឋចេញពីក្រុងទៅកម្សាន្តនៅតាមរមណីដ្ឋាននានាប្រកបដោយសុខសុវត្តិភាព»។ បើតាមលោកសាន សុខសីហា ក្រៅពីនេះស្នងការដ្ឋាននគរបាលរាជធានីភ្នំពេញ ក៏បានត្រៀមរថយន្តពន្លត់អគ្គីភ័យ និងកងកម្លាំងប្រចាំ២៤ម៉ោងលើ២៤ម៉ោង ដើម្បីជួយពន្លត់អគ្គីភ័យដែលនឹងអាចកើតឡើងជាយ​ថាហេតុណាមួយនៅក្នុងបុណ្យឆ្លងឆ្នាំសកលនេះផងដែរ។

ក្រសួងទេសចរណ៍ បា​នឲ្យដឹងថា នៅក្នុងពិធីបុណ្យឆ្លងឆ្នាំសកលឆ្នាំ២០២១ឈានចូល២០២២នេះ មានភ្ញៀវទេសចរក្នុងស្រុកជាច្រើនបានធ្វើដំណើរទៅតាមបណ្តាខេត្តនានា ពិសេស ខេត្តជាប់មាត់សមុទ្រដើម្បីជួបជុំគ្នាឆ្លងឆ្នាំនៅយប់ថ្ងៃទី៣១ធ្នូនេះ។ លោក ថោង ខុន រដ្ឋមន្ត្រីក្រសួងទេសចរណ៍ បានឱ្យដឹងកាលពីដើមសប្តាហ៍នេះថា សម្រាប់ការប្រារព្វពិធីឆ្លងឆ្នាំសកលនានេះ អត្រាការកក់បន្ទប់ស្នាក់នៅមានកម្រិតខ្ពស់នៅតាមខេត្តសំខាន់ៗ ដូចជា កែប កំពត និងមណ្ឌលគិរី ដែលបន្ទប់ស្នាក់នៅជាង ៨០% ត្រូវបានភ្ញៀវកក់រួចស្រេច ខណៈដែលគោលដៅខេត្តព្រះសីហនុ កោះកុង សៀមរាប បាត់ដំបង និងរតនគិរី ក៏ការកក់បន្ទប់ស្នាក់នៅមានអត្រាខ្ពស់ផងដែរ។

លោករដ្ឋមន្ត្រីបានបន្ថែមថា បណ្តារដ្ឋបាលរាជធានីខេត្ត បានរៀបចំតុបតែងលម្អទីក្រុង និងទីប្រជុំជន ដើម្បីត្រៀមទទួលអំណរឆ្នាំថ្មី និងទាក់ទាញភ្ញៀវទេសចរ ព្រមជាមួយការរៀបចំពិធីរាប់ថយក្រោយ (Countdown) នៅតាមទីតាំងសំខាន់ៗមួយចំនួន៕

អត្ថបទ ៖ សំអឿន