ឆ្នាំ ២០២១ ខេត្តកំពង់ស្ពឺ សល់ស្រូវជាង ១៣ ម៉ឺនតោន

តុល្យភាពស្បៀងក្នុងឆ្នាំ ២០២១ សម្រាប់ខេត្តកំពង់ស្ពឺបន្ទាប់ពីការប្រមូលផលស្រូវទុកបរិភោប និងទុកពូជ គ្រប់គ្រាន់ក្នុងខេត្តហើយ ខេត្តគឺនៅសល់ស្រូវចំនួនជាង ១៣ ម៉ឺនតោន (១៣៦ ២៨៦ តោន) គិតជាអង្ករស្មើនឹងប្រមាណជាង ៨ ម៉ឺន តោន (៨៤ ០២៣ តោន)។

នេះបើតាមការឱ្យដឹងពី លោក យឹម សុខុម ប្រធានក្រុមប្រឹក្សាខេត្តកំពង់ស្ពឺ នៅក្នុងសន្និសីទសារព័ត៌មានស្តីពី វឌ្ឍនភាពមូលដ្ឋានឃុំ-សង្កាត់ និងទិសដៅការងារបន្តរបស់ខេត្ត កំពង់ស្ពឺ នៅថ្ងៃទី ១៣ ខែមករា ឆ្នាំ ២០២២។

លោក យឹម សុខុម បានបន្ថែមថា សម្រាប់ផែនការបង្កបង្កើនផលស្រូវរដូវវស្សា គឺអនុវត្តបានលើផ្ទៃដីចំនួនជាង ១២ ម៉ឺនហិកតា (១២២ ៦៦១ ហិកតា) លើផែនការដែលត្រូវអនុវត្តចំនួនជាង ១១ ម៉ឺនហិកតា (១១៣ ៦០០ ហិកតា)។

លោកប្រធានក្រុមប្រឹក្សាខេត្តកំពង់ស្ពឺបានលើកឡើងដែរថា គិតត្រឹមថ្ងៃទី ៣១ ខែធ្នូ ឆ្នាំ២០២១ ផ្ទៃដីប្រមូលផលសម្រេចបានចំនួនជាង ១២ ម៉ឺនហិកតា (១២២ ៦២១ ហិកតា) ស្មើនឹង ១០៧,៩៤%។ ចំណែកផ្ទៃដីដែលខូចខាតទាំងស្រុងមានចំនួន ៤១ ហិកតា។ ចំពោះទិន្នផលដែលទទួលបានជាមធ្យមមានចំនួន ៣,២ តោនក្នុងមួយហិកតា។ បើគិតជាបរិមាណផលសរុបមានចំនួនជាង ៩០ ម៉ឺនតោន (៩០៣ ១៧៤ តោន)។

លោកបន្ថែមថា រីឯដំណាំរួមផ្សំដែលអនុវត្តបាននៅក្នុងរដូវវស្សាឆ្នាំ ២០២១ មានចំនួនជាង ២ ពាន់ហិកតា (២ ២៧៤ ហិកតា) ខ្ពស់ជាងឆ្នាំ ២០២០ ចំនួន ៥១០ ហិកតា។ ដោយឡែកផែនការបង្កបង្កើនផលស្រូវរដូវប្រាំង គឺអនុវត្តលើផ្ទៃដីចំនួន ៥៦៥ ហិកតា និងប្រមូលផលបានចំនួន ៥៦១ ហិកតា ស្មើនឹង ៩៩,២៩% ដោយទទួលបានទិន្នផលជាមធ្យមចំនួនជាង ៣ តោន (៣,៣ តោន) ក្នុងមួយហិកតា។ បើគិតជាបរិមាណសរុប មានចំនួន ១ ៨៥៥ តោន។ រីឯដំណាំរួមផ្សំអនុវត្តបាន ចំនួន ៥៣៤ ហិកតា៕

អត្ថបទ៖ ណារី