ព័ត៌មានជាតិ

បង្ហើបព័ត៌មាន ផ្លូវល្បឿនលឿនគ្រោងឲ្យបើកបរសាកល្បងនៅខែមិថុនានេះ

បានផុស

៨ ខែ មុន

នៅ

ថ្ងៃសុក្រ ១៤ មករា ២០២២

ដោយ

បើយោងតាមប្រភពក្រុមការងារសាងសង់ផ្លូវល្បឿនលឿនភ្នំពេញខេត្តព្រះសីហនុ បានបង្ហើបពីការគ្រោងដាក់ឲ្យដំណើរការបើកបរសាកល្បងនៅពាក់កណ្ដាលឆ្នាំ២០២២។

បើតាមផេកផ្លូវល្បឿនលឿនភ្នំពេញព្រះសីហនុ ដែលតែងតែផ្តល់ព័ត៌មានពីការវិវឌ្ឍនៃការស្ថាបនាកំណាត់ផ្លូវទំនើបនេះបានឲ្យដឹងថា កំណាត់ផ្លូវនេះអាចឲ្យអ្នកធ្វើដំណើរបើកបរសាកល្បងនៅអំឡុងខែមិថុនាឆ្នាំ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហ៊ាង សុទ្ធាយុត្តិ ប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ និងជាអ្នកនាំពាក្យក្រសួងសាធារណការ និងដឹកជញ្ជូនមានប្រសាសន៍ថា ការស្ថាបនាផ្លូវល្បឿនលឿនពីភ្នំពេញទៅក្រុងព្រះសីហនុ គិតមកទល់បច្ចុប្បន្ននេះសម្រេចបានជាង ៧០ភាគរយ ហើយរំពឹងអាចបញ្ចប់ការសាងសង់មុនពេលកំណត់។

ផ្លូវល្បឿនលឿនភ្នំពេញ-ព្រះសីហនុ ដែលបោះទុនវិនិយោគប្រមាណ២.០០០លានដុល្លារអាមេរិកតាមផែនការដំបូងត្រូវបញ្ចប់នៅឆ្នាំ២០២៣។

កំណាត់ផ្លូវល្បឿនលឿនដំបូងគេរបស់ប្រទេសកម្ពុជាដែលចាយទុនរាប់ពាន់លានដុល្លារនេះ បានបើកការដ្ឋានសាងសង់នៅថ្ងៃទី២២ ខែមីនា ឆ្នាំ២០១៩ ដោយក្រុមហ៊ុនសាជីវកម្មស្ពាន និងថ្នល់ចិន(CRBC) តាមរយៈក្រុមហ៊ុន Cambodian PPSHVExpressway Co.,Ltd ប្រើប្រាស់ទុនប្រមាណ ២.០០០លានដុល្លារអាមេរិក។

ផ្លូវនេះមានប្រវែងសរុបជាង១៩០គីឡូម៉ែត្រ ចាប់ពីក្នុងសង្កាត់សំរោងក្រោមខណ្ឌពោធិ៍សែនជ័យ រាជធានីភ្នំពេញ ដល់ក្រុងព្រះសីហនុ ដោយមានទទឹងតួផ្លូវ២៤,៥ម៉ែត្រ និងក្រាលបេតុងកៅស៊ូ(AC)កម្រាស់១០សង់ទីម៉ែត្រ។ ចំណែកគន្លងផ្លូវធ្វើចរាចរចែកជា៤គន្លង (២គន្លងទៅ ២គន្លងមក) ដែលអនុញ្ញាតឱ្យយានយន្តគ្រប់ប្រភេទអាចបើកបរក្នុងល្បឿនរហូតដល់១០០គីឡូម៉ែត្រ ក្នុងមួយម៉ោងនិងកន្លែងខ្លះអាចបើកបរ ក្នុងល្បឿនដល់១២០គីឡូម៉ែត្រក្នុងមួយម៉ោង៕