កម្ពុជាជាប់ចំណាត់ថ្នាក់​ទី​១២៨​លើ​វិស័យអភិវឌ្ឍន៍ព័ត័មានវិទ្យា

ភ្នំពេញ៖ លោកបណ្ឌិត ជា វ៉ាន់ដេត រដ្ឋមន្ត្រីក្រសួងប្រៃសនីយ៍និងទូរគមនាគមន៍បានមានប្រសាសន៍ថា កម្ពុជាជាប់ចំណាត់ថ្នាក់ទី១២៨ លើវិស័យអភិវឌ្ឍន៍ព័ត៍មានវិទ្យា អាយ ស៊ីធី ក្នុងចំណោមប្រទេសប្រមាណ ២០០ នៅលើពិភពលោក។

ថ្លែងប្រាប់អ្នកសារព័ត៍មាននៅថ្ងៃទី១៧មករា ក្រោយចូលរួមសម្ភោធមជ្ឈមណ្ឌលបច្ចេកវិទ្យាអេយូភីភី លោក រដ្ឋមន្ត្រីបានបន្តថា ការជាប់ចំណាត់ថ្នាក់ទី១២៨នេះ ដោយសារតែកម្ពុជាមានហេដ្ឋារចនាសម្ពព័ន្ធផ្នែកបច្ចេកវិទ្យានៅមានការខ្វះខាតច្រើនដូចជាខ្សែកាបអ៊ុបទិច សេវាអ៊ិនធឺណេតនៅយឺត និងការយល់ដឹងរបស់ប្រជាពលរដ្ឋពី​ការ​ប្រើ​វិស័យ​បច្ចេកវិទ្យា​នៅមាន​កម្រិតនៅឡើយ។

លោករដ្ឋមន្ត្រីបានបន្តទៀតថា ក្នុងការកែលម្អបញ្ហានេះក្រសួងបានរៀបចំបង្កើតក្រុមការងារសូចនាករមួយ ដើម្បីប្រមូលទិន្នន័យ​ពីការប្រើប្រាស់បច្ចេកវិទ្យានៅទូទាំងប្រទេសនិងបានអភិវឌ្ឍន៍ហេដ្ឋារចនាសម្ព័ន្ធខ្សែកាបអ៊ុបទិច ដោយក្រសួងរៀបចំ​តបណ្តាញពីក្រោមបាតសមុទ្រក្នុងខេត្តកោះកុងភ្ជាប់ចូលមកកម្ពុជា ដើម្បីបង្កើតសមត្ថភាពធំសំដៅធ្វើយ៉ាងណាឱ្យសេវាអ៊ិនធឺណេតបានលឿន។

លោករដ្ឋមន្ត្រីបានបន្តទៀតថា ក្រសួងក៏កំពុងត្រួតពិនិត្យប្រតិបត្តករដែលកំពុងធ្វើជាអាជីវកម្មលើទូរគមនាគមន៍ ត្រូវរៀបចំបណ្តាញហេដ្ឋារចនាសម្ព័ន្ធឱ្យបានត្រឹមត្រូវ និងក្រសួងនឹងមានផែនការតបណ្តាញខ្សែកាបក្រោមដីឬលើអាកាសឱ្យបានដល់គ្រប់ភូមិប្រជាពលរដ្ឋនៅឆ្នាំ២០២៧ខាងមុខនេះ ដើម្បីឱ្យប្រជាពលរដ្ឋពិសេសនៅតាមមណ្ឌលសុខភាព ប៉ុស្តិ៍នគរបាលឃុំ និងតាមសាលារៀនប្រើប្រាស់អ៊ិនធឺណេតបានលឿន៕

អត្ថបទ៖ សំអឿន