ក្រសួង កែប្រែមិនបង្ហាញរូបអ្នកជំងឺកូវីដ-១៩

អ្នកនាំពាក្យក្រសួងសុខាភិបាល បានឲ្យដឹងថា ក្រសួង នឹងធ្វើការកែប្រែ ដោយមិនបង្ហាញរូបថត និងឈ្មោះអ្នកជំងឺកូវីដ-១៩ ​ នៅពេលដែលគ្រប់គ្រងស្ថានការណ៍បានទាំងស្រុង នាពេលខាងមុខ។

លោកស្រីវេជ្ជបណ្ឌិត ឱ វ៉ាន់ឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល មានប្រសាសន៍នៅព្រឹកថ្ងៃទី១០ ខែធ្នូ ឆ្នាំ២០២០នេះថា ការដាក់រូបថតអ្នកជំងឺកូវីដ-១៩ គឺធ្វើឡើងតែពេលដែលសកម្មក្នុងការរុករកប៉ុណ្ណោះ តែពេលនេះ មិនមានតម្រូវការដាក់ទៀតឡើយ ដោយក្រសួងគោរពសិទ្ធិរបស់បុគ្គល។

លោកស្រីវេជ្ជបណ្ឌិត ឱ វ៉ាន់ឌីន មានប្រសាសន៍លើកឡើងយ៉ាងដូច្នេះថា ដាក់ត្រឹមឈ្មោះសិន នៅពេលយើងគ្រប់គ្រងបានទាំងស្រុងហើយ យើងត្រូវត្រឡប់ទៅរកការមិនបញ្ចេញឈ្មោះទៀត​ដែរ។

អ្នកនាំពាក្យក្រសួងសុខាភិបាល បានបញ្ជាក់ទៀតថា បច្ចុប្បន្ននេះ ករណីឆ្លងហាក់ដូចជាថមថយខ្លះៗហើយ ។ ម្យ៉ាង យើងក៏ត្រូវតែគិតពីសេចក្តីថ្លៃថ្នូ និងសិទ្ធិរបស់បុគ្គលដែរណា គ្មាននរណាម្នាក់ចង់ឲ្យមានការឆ្លងនោះឡើយ។ អ្វីដែលសំខាន់នោះ គឺយើងត្រូវតែបន្ទការប្រុងប្រយ័ត្នថែមទៀត ក្រែងលោ វីរុសកូវីដ-១៩ នេះ វានៅចរាចរកន្លែងផ្សេងទៀតដែលយើងមិនទាន់បានដឹង ព្រោះពេលនេះ គឺជាការចម្លងក្នុងសហគមន៍ជាចង្កោម និងដោយកន្លែង ហើយហានិភ័យនៅខ្ពស់នៅឡើយ ដោយមិនត្រូវធ្វើការសន្និដ្ឋានមុនការវាយតម្លៃពីក្រុមការងារឡើយ៕