ព័ត៌មានជាតិ

ខេត្តត្បូងឃ្មុំ កំពុងសិក្សាដាក់តំបន់ចំនួន២កន្លែងបន្ថែមទៀតជាតំបន់ការពារធម្មជាតិ

បានផុស

២ years មុន

នៅ

ថ្ងៃអង្គារ ១៨ មករា ២០២២

ដោយ

រដ្ឋបាលខេត្តត្បូងឃ្មុំ កំពុងសិក្សាពីលទ្ធភាពដាក់តំបន់ចំនួន២កន្លែងបន្ថែមទៀតជាតំបន់ការពារធម្មជាតិ ខណៈបច្ចុប្បន្នខេត្តមានតំបន់ការពារធម្មជាតិចំនួន២កន្លែងរួចហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំ បានឱ្យដឹងនៅក្នុងកិច្ចប្រជុំពិភាក្សាលើការងារបង្កើតតំបន់ប្រើប្រាស់ច្រើនយ៉ាងបឹងការដេរ និងអភិរក្សជីវៈចម្រុះប្រព័ន្ធតំបន់ការពារធម្មជាតិក្នុងស្រុកក្រូចឆ្មារកាលពីថ្ងៃទី១៧ ខែមករាថា បច្ចុប្បន្ននេះក្រុមការងាររបស់រដ្ឋបាលខេត្តត្បូងឃ្មុំ បានសហការយ៉ាងជិតស្និទ្ធជាមួយនឹងក្រុមការងារបច្ចេកទេសរបស់ក្រសួងបរិស្ថានដោយមានមន្ទីរបរិស្ថានខេត្តត្បូងឃ្មុំ ជាសេនាធិការក្នុងការសិក្សាពីលទ្ធភាពនៃការដាក់តំបន់ព្រៃលិចទឹក ព្រៃឫស្សីមាត់ឃ្មួងក្នុងភូមិសាស្ត្រស្រុកត្បូងឃ្មុំ ព្រមទាំងតំបន់បឹងកាពិត ក្នុងភូមិសាស្ត្រស្រុកត្បូងឃ្មុំជាតំបន់ការពារធម្មជាតិបន្ថែមទៀត។

លោកបណ្ឌិត ជាម ច័ន្ទសោភ័ណ បានថ្លែងអំណរគុណ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមការងារពាក់ព័ន្ធទាំងអស់ដែលបានបំពេញការងារយ៉ាងសកម្ម ក្នុងការជំរុញការដាក់តំបន់ទាំងនេះជាតំបន់ការពារធម្មជាតិជាបន្តទៀត។

ខេត្តត្បូងឃ្មុំមានធនធានធម្មជាតិដ៏សម្បូរបែប មានជាអាទិ៍តំបន់ការពារធម្មជាតិចំនួន២កន្លែង ដែលសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសម្រេចចេញអនុក្រឹត្យស្តីពីការបង្កើតតំបន់ប្រើប្រាស់ច្រើនយ៉ាងពញាក្រែក មានផ្ទៃដីទំហំ ១៩៩ ហិកតា ដោយត្រូវបានបង្កើតឡើងតាមរយៈអនុក្រឹត្យលេខ ៨៧ អនក្រ.បក ចុះថ្ងៃទី ០៩ ខែឧសភា កាលពីឆ្នាំ២០១៦ និងតំបន់ប្រើប្រាស់ច្រើនយ៉ាងបឹងការដេរ មានទំហំផ្ទៃដី១,៦៤៣ ហិកតា ស្ថិតនៅក្នុងភូមិសាស្ត្រស្រុកក្រូចឆ្មារ និងស្រុកតំបែរដែលរាជរដ្ឋាភិបាល ទើបនឹងសម្រេចបង្កើតឡើង តាមរយៈអនុក្រឹត្យលេខ ២២៨អនក្រ.បក ចុះថ្ងៃទី១៥ ខែវិច្ឆិកា ឆ្នាំ២០២១ កន្លងទៅថ្មីៗនេះ។

លោក ចាយ សាមិត្ត រដ្ឋលេខាធិការក្រសួងបរិស្ថាន បានណែនាំធ្វើការទប់ស្កាត់ និងបង្ក្រាបការទន្ទ្រានកាន់កាប់ដីដោយខុសច្បាប់រៀបចំផែនការគ្រប់គ្រង ការបង្កើតសហគមន៍តំបន់ការពារធម្មជាតិ និងសកម្មភាពអេកូទេសចរណ៍ នៅក្នុងតំបន់ប្រើប្រាស់ច្រើនយ៉ាងបឹងការដេរព្រោះជាដែនជម្រកសត្វស្លាបកម្រ មច្ឆា ចំណីអាហារ (ត្រី ជលផល និងអនុផល)ពិសេសជាប្រភពទឹកដ៏សំខាន់សម្រាប់ការប្រើប្រាស់ របស់ប្រជាសហគមន៍ និងដំណាំកសិកម្ម។

លោករដ្ឋលេខាធិការ មានប្រសាសន៍បន្ថែមថា ការងារជាអាទិភាពរបស់ក្រសួងបរិស្ថាន ដោយមានមន្ទីរបរិស្ថានខេត្តត្បូងឃ្មុំផ្ទាល់ដោយសហការជាមួយរដ្ឋបាលខេត្តត្បូងឃ្មុំ និងស្ថាប័នពាក់ព័ន្ធ គឺបង្កើតក្រុមការងារបោះបង្គោលព្រំប្រទល់តំបន់ការពារធម្មជាតិបោះបង្គោលព្រំប្រទល់តំបន់គ្រប់គ្រង និងចុះបញ្ជីជាដីរដ្ឋ និងរបៀងជីវៈចម្រុះតាមរយៈការអប់រំផ្សព្វផ្សាយ វគ្គបណ្ដុះបណ្ដាល នានា ជាយន្តការដើម្បីអភិរក្សតំបន់នេះ និងក៏ជាការចូលរួមលើកស្ទួយដល់ជីវភាពប្រជាសហគមន៍៕

អត្ថបទ៖ សំអឿន

Related Topics:

Up Next

មន្ទីរពេទ្យគន្ធបុប្ផាភ្នំពេញសង្គ្រាះបន្ទាន់កុមារឈ្លក់គ្រាប់ទៀបចូលទងសួតដោយជោគជ័យ

Don't Miss

អាជ្ញាធរគ្មានគោលការណ៍ឱ្យពលរដ្ឋនៅបឹងកក់២ ចាកចេញពីទីតាំងដែលកំពុងរស់នៅ