តម្លៃប្រេងអន្តរជាតិ​ធ្លាក់ចុះបន្តបន្ទាប់ ដល់កម្រិតទាបបំផុតក្នុងរយៈពេល ៤ ខែ

តម្លៃប្រេងអន្តរជាតិ​បានបន្ត​​ធ្លាក់ចុះសម្រាប់ការជួញដូរនៅព្រឹកថ្ងៃព្រហស្បតិ៍នេះ ក្រោយពីធ្លាក់ចុះជាង ១% កាលពីថ្ងៃពុធដល់កម្រិតទាបបំផុតក្នុងរយៈពេល ៤ ខែ ចំពេលសហរដ្ឋអាមេរិក និងអ៊ីរ៉ង់ ចរចាគ្នាប្រកបដោយ «វឌ្ឍនភាពវិជ្ជមាន» ជុំវិញបញ្ហាច្រកហ័រមូហ្ស។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។ ​

តម្លៃប្រេងម៉ាក Brent បានធ្លាក់ចុះ ៧៣ សេន ឬ ១,០២% ដល់ ៧០,៨៤ ដុល្លារ/បារ៉ែល គិតត្រឹមម៉ោង ៩ ព្រឹកនៅទីក្រុងហុងកុង ខណៈតម្លៃប្រេងអាមេរិក WTI បាន​ធ្លាក់ចុះ ៨៣ សេន ឬ ១,២១% ដល់ ៦៧,៧៥ ដុល្លារ/បារ៉ែល។ ​

ការធ្លាក់ចុះនេះរួមចំណែកដោយវឌ្ឍនភាពនៃការចរចាបញ្ចប់សង្រ្គាមរវាងអាមេរិក​ និងអ៊ីរ៉ង់។ ប្រភពឱ្យដឹងថា មន្រ្តីអាមេរិក និងអ៊ីរ៉ង់ បាន​ជួបគ្នារយៈពេលពីថ្ងៃនៅទីក្រុងដូហា ដើម្បីពិភាក្សាអំពីការបើកនាវាចរណ៍កាត់ច្រកហ័រមូហ្ស និងបញ្ចេញមូលនិធិអ៊ីរ៉ង់ ដែលអាមេរិកបានបង្កកនាពេលកន្លងមក។

ឥឡូវនេះ កប៉ាល់ដឹកទំនិញផ្សេងៗ រួមទាំង​ប្រេង​ ចាប់ផ្ដើមបើកដំណើរការឡើងវិញជាបណ្ដើរៗ ទោះបីជាមិនទាន់ត្រឡប់ទៅដូចដើមក្ដី។

​មន្រ្តីអ៊ីរ៉ង់និយាយថា ខ្លួនចង់ឱ្យសហគមន៍អន្តរជាតិទទួលស្គាល់ការគ្រប់គ្រងរបស់អ៊ីរ៉ង់លើច្រកហ័រមូហ្ស ខណៈមានគម្រោងគិតលុយឆ្លងកាត់ផ្លូវទឹកដដែល ពេលកិច្ចព្រមព្រៀងបណ្ដោះអាសន្នជាមួយអាមេរិក សម្រាប់ការឆ្លងកាត់ច្រកហ័រមូហ្សផុតកំណត់នៅពាក់កណ្ដាលខែសីហា។ ​

អ្នកវិភាគទីផ្សារនិយាយថា តម្លៃប្រេងអន្តរជាតិ​កំពុងធ្លាក់ចុះ ចំពេលលំហូរប្រេងកាត់ច្រកហ័រមូហ្សស្ទុះងើបឡើងវិញ​ ដោយបង្កើនការផ្គត់ផ្គង់សម្រាប់ទីផ្សារអន្តរជាតិ ខណៈអង្គការនៃប្រទេសនាំចេញប្រេងកាត​ និងសម្ព័ន្ធមិត្ត (OPEC+) បង្កើនកូតាផលិតកម្មសម្រាប់ខែសីហា៕ ​