ព័ត៌មានជាតិ

អ្នកស្រាវជ្រាវជីវៈចម្រុះមួយក្រុម គ្រោងបោះពុម្ភសៀវភៅបរិយាយពីសត្វនិងរុក្ខជាតិនៅកម្ពុជា

បានផុស

៣ years មុន

នៅ

ថ្ងៃអង្គារ ២៥ មករា ២០២២

ដោយ

ក្រុមការងារស្រាវជ្រាវជីវៈចម្រុះមួយក្រុមគ្រោងបោះពុម្ពសៀវភៅ ដើម្បីបង្កើនការយល់ដឹងពីជីវៈចម្រុះនៅប្រទេសកម្ពុជា។

លោក សុខ វិជ្ជា សមាជិកក្រុមការងារស្រាវជ្រាវជីវៈចម្រុះនៃប្រទេសកម្ពុជាបានឲ្យកម្ពុជាថ្មីដឹងថា ក្នុងសៀវភៅដែលគ្រោងបោះពុម្ភនេះនឹងបង្ហាញពីប្រភេទរុក្ខជាតិនិងសត្វជាច្រើនប្រភេទ ដែលមាននិងកំពុងរស់នៅក្នុងប្រទេសកម្ពុជា។

សៀវភៅដែលកើតឡើងពីការស្រាវជ្រាវយ៉ាងលម្អិតនេះ នឹងបង្ហាញរាល់ប្រភេទជីវៈចម្រុះមានសត្វ រុក្ខជាតិកម្រទាំងក្នុងស្រុក និងនាំចូលពីក្រៅ រួមទាំងផ្តល់ចំណេះដឹងពីការប្រើប្រាស់រុក្ខជាតិមួយចំនួនកុំឲ្យប៉ះពាល់ដល់សុខភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

“ក្នុងសៀវភៅនេះមានបែងចែកជាពីរគឺមានប្រភេទរុក្ខជាតិផង និងសត្វផង អីចឹងវាអាចជាឯកសារដ៏មានសារសំំខាន់សម្រាប់សិស្សនិស្សិតអាចយកទៅបំពេញបន្ថែមក្នុងការសិក្សា និងប្រើប្រាស់ក្នុងការស្រាវជ្រាវផ្សេងៗ។

បើតាមសមាជិកក្រុមចងក្រងសៀវភៅជីវៈចម្រុះរូបនេះ កន្លងទៅមានការយករុក្ខជាតិមួយចំនួនត្រូវបានប្រជាពលរដ្ឋយកទៅប្រើប្រាស់ទាំំងយល់ច្រឡំ ហើយដែលដូចអាវុធមុខពីរបើមិនបានស្វែងយល់សិក្សាឲ្យបានត្រឹមត្រូវ អាចបំផ្លាញសុខភាពទៅវិញ។

បើតាមការបញ្ជាក់ពីលោក សុខ វិជ្ជា រាល់ខ្លឹមសារក្នុងសៀវភៅនេះគឹបានពីការស្រាវជ្រាវតាមប្រភពផ្លូវការ និងយោងតាមឯកសារពីក្រុមការងារអភិរក្ស។ ការចងក្រងសៀវភៅនេះក៏មិនពាក់ព័ន្ធដល់ស្ថាប័នណាដែរ វាកើតឡើងពីការស្រាវជ្រាវរបស់ក្រុមការងារផ្ទាល់ ដើម្បីចែករំលែកចំណេះដឹងទុកជាប្រយោជន៍តែប៉ុណ្ណោះ។

សៀវភៅជីវៈចម្រុះដែលក្រុមការងារលោកសុខ វិជ្ជា បានចងក្រងឡើងគ្រោងបោះពុម្ភចំនួនប្រហែល ១០០ ទៅ ៣០០ ក្បាល ដែលនឹងផ្តល់តាមបណ្ណាល័យមួយចំនួនឥតគិតថ្លៃ ដើម្បីជាការចូលរួមចំណែកដល់កិច្ចការងារសង្គម។ ចំណែកសៀវភៅដែលនៅសល់ នឹងដាក់ឲ្យប្រិយមិត្តមានចំណាប់អារម្មណ៍អាចជាវយកទៅស្វែងយល់បាន។

លោក សុខ វិជ្ជា បានបញ្ជាក់ដល់កម្ពុជាថ្មីថា សៀវភៅជីវៈចម្រុះជាស្នាដៃពីការស្រាវជ្រាវនេះនឹងបោះពុម្ភចេញជាភាគ ១ និងបន្តចេញភាគ ២ ឬភាគ ៣ ជាបន្តបន្ទាប់៕

អត្ថបទ៖ ប៊ុណ្ណារ៉ា

Related Topics:ជីវៈចម្រុះ