ឆ្លងឆ្នាំថ្មី ម៉ូតូ Dream សង់ស៊េរី ២០២២ មិនសូវមានម៉ូយដូចរាល់ឆ្នាំ ខណៈតម្លៃក៏ឡើងគួរសម

អាជីវករលក់ដូរម៉ូតូសេរីទំនើបបាននិយាយថា ឆ្លងចូលឆ្នាំថ្មី២០២២នេះ ម៉ូតូសេរីទំនើប​ដែលទាន់​សម័យហាក់ដូចជាមិនសូវមានម៉ូយមកទិញ ខណៈសេរី២០២១ បន្សល់ទុកក្នុងហាងនៅឡើយ។

ម្ចាស់អាជីវកម្មមួយរូបដែលមានហាងលក់ម៉ូតូនៅភូមិព្រែក សង្កាត់ច្បារអំពៅទី១​ ខណ្ឌច្បារអំពៅ​ រាជធានីភ្នំពេញបានឲ្យកម្ពុជាថ្មីថា គួរឲ្យចម្លែក​ខណៈរាល់ឆ្នាំមានម៉ូយមកកម្មង់​ម៉ូតូទុកមុន ​ប៉ុន្តែ​ខុស​តែឆ្នាំ ២០២២នេះ ម៉ូតូដែលនាំចូលមកនៅសល់សឹងពេញហាង ក្នុងនោះម៉ូតូសង់សេរី ២០២១​ មិនទាន់លក់អស់ផងដែរ។

ម្ចាស់អាជីវកម្មខាងលើបានប្រាប់ពីតម្លៃម៉ូតូ Dream សេរី ២០២២ ​ក្នុងមួយគ្រឿង​តម្លៃ ២ ៤៣០​ដុល្លារ​ ខណៈសេរី ២០២១ តម្លៃ ២ ២៥០ ដុល្លារ។

ទាក់ទិនទៅនិងបញ្ហាម៉ូតូសេរីទំនើបនៅសល់ពេញហាងខុសប្លែករាល់ឆ្នាំឲ្យតែមុនថ្ងៃបុណ្យចូលឆ្នាំប្រពៃណីយ៍ចិន វៀតណាម គឺសម្បូទៅដោយម៉ូយមកកម្មង់ទិញសឹងរកម៉ូតូលក់មិនបាន។

លោក បាន់ ស៊ីថុន ដែលជាឈ្មួញកណ្តាលនៅច្បារអំពៅបានឲ្យកម្ពុជាថ្មីដឹងថា ឆ្នាំនេះបងប្អូនប្រជាពលរដ្ឋភាគច្រើនលោកមិនសូវមានថវិកាសល់ដូចមុនពេលប្រទេសជាតិយើងត្រូវបិទខ្ទប់ដោយសារជំងឺកូវីដ១៩ ចូលមករាតត្បាតទូទាំងប្រទេសក៏ដូចជាពិភពលោក។

ហើយគេជឿជាក់នៅឆ្នាំបន្ទាប់គឺបងប្អូនប្រជាពលរដ្ឋយើងលោកមានជីវភាពធូធាឡើងវិញនោះ លោក​នឹងមកកម្មង់ទិញម៉ូតូសេរីទំនើបបែបនេះជាបន្ត។

គួរបញ្ជាក់ថា ក្នុងរយះពេលដែលប្រទេសជាតិជួបនូវ​ជំងឺកូវីដ១៩មករាតត្បាត​នេះគឺតាម​បណ្តា​ហាង​លក់​ដូរម៉ូតូគ្រប់ធុនបានស្ងប់ស្ងាត់ព្រោះតែជីវភាពបង​ប្អូនប្រជាពលរដ្ឋ​លោកនៅខ្វះខាត​ហើយ​ភាគ​ច្រើននៅជាប់បំណុលធនាគារ៕

អត្ថបទ៖ នរា