ព័ត៌មានជាតិ

ដំរី Kaavan មានសុខភាពល្អធម្មតា និងបានចាប់ផ្ដើមបន្សាំខ្លួនទៅនឹងបរិស្ថាននៅកម្ពុជា

បានផុស

៤ years មុន

នៅ

ថ្ងៃព្រហស្បតិ៍ ១០ ធ្នូ ២០២០

ដោយ

លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានថ្លែងប្រាប់កម្ពុជាថ្មីនារសៀលថ្ងៃទី១០ ខែធ្នូ ឆ្នាំ២០២០នេះថា មកដល់ពេលនេះ ដំរីខាវ៉ាន់ (Kaavan) មានសុខភាពល្អធម្មតា ហើយបានចាប់ផ្ដើមបន្សាំខ្លួនទៅនឹងបរិស្ថាននៅជុំវិញ ចំណែកដំរីញី៣ក្បាលដែលនៅក្បែរខ្លួនវានោះ វាបានចាប់ផ្ដើមមានទំនាក់ទំនងគ្នាហើយ។ ក្នុងនោះ Kaavan ក៏បានបរិភោគចំណីអាហារ ដែលដាក់ឲ្យជាធម្មតាមិនមានបញ្ហាអ្វីនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបញ្ជាក់ថា មកដល់ពេលនេះ យើងមិនទាន់ព្រលែង Kaavan ចេញពីជម្រកថ្មី ដែលយកមកដាក់ភ្លាមៗនោះទេ។ ពីព្រោះវាមិនទាន់គ្រប់១៤ថ្ងៃ ដោយសារយើងត្រូវធ្វើចត្តាឡីស័ក១៤ថ្ងៃសិន ដើម្បីតាមដានវាផង និងដើម្បីបន្សាំបរិយាកាសផង ហើយបន្ទាប់ពីខាវ៉ាន់ មានភាពស៊ាំ និងស្គាល់ទីតាំងច្បាស់លាស់ គេនឹងព្រលែងចូលទៅក្នុងទីតាំងថ្មីមួយទៀត ដែលមានទំហំធំ មានព្រៃធម្មជាតិ មានស្រះទឹក ហើយពេលនោះ វាអាចលេងជាមួយដំរីញី ៣ក្បាលនៅកម្ពុជាបានហើយ។

សូមបញ្ជាក់ថា ដំរីឈ្មោះខាវ៉ាន់ (Kaavan) បានមកដល់ទឹកដីនៃខេត្តសៀមរាមអង្គរ នៃព្រះរាជាណាចក្រកម្ពុជា នៅរសៀលថ្ងៃទី៣០ ខែវិច្ឆិកា ឆ្នាំ២០២០ បន្ទាប់ពីបានធ្វើដំណើរជាច្រើន ម៉ោងនៅលើយន្តហោះពីប្រទេសប៉ាគីស្ថាន ហើយពិធីទទួលសត្វដំរីខាវ៉ាន់មករស់នៅក្នុងព្រៃធម្មជាតិរបស់កម្ពុជាបានធ្វើឡើងក្រោមអធិបតីភាពលោក នេត្រ ភក្ត្រា នៅព្រលានយន្តហោះខេត្តសៀមរាប ដោយមានការចូលរួមពីតំណាងរដ្ឋបាលខេត្តសៀមរាប និងខេត្តឧត្តរមានជ័យ និងមន្ត្រីជំនាញផ្សេងទៀត និងតំណាងអង្គការអភិរក្សដែនជម្រកសត្វព្រៃកម្ពុជា។

ក្រោយពីទទួលបានការប្រោះព្រំពីព្រះសង្ឃនៅអាកាសយានដ្ឋានអន្តរជាតិសៀមរាប ដំរីខាវ៉ាន់ ត្រូវបាននាំយកទៅកាន់ជម្រកថ្មី ដែលមានទំហំដី ៤.៣៥០ ហិកតានៅក្នុងដែនជម្រកសត្វព្រៃគូលែនព្រហ្មទេព ក្នុងភូមិសាស្ត្រខេត្តឧត្តរមានជ័យ ដែលអង្គការអភិរក្សដែនជម្រកសត្វព្រៃកម្ពុជា បានទទួលការអនុញ្ញាតក្រសួងបរិស្ថានធ្វើការការពារ និងអភិរក្ស។ នៅក្នុងតំបន់នោះ មានសត្វដំរីស្រុកញីចំនួន៣ ក្បាល ដែលបានយកមកពីខេត្តមណ្ឌលគិរី៕
ដោយ ៖ កោះកែវ