សម្តេច ស ខេង៖ គណបក្សប្រជាជនកម្ពុជាមានអាទិភាពជាងគេ រយៈពេលជាង ៧០ ឆ្នាំនេះ

សម្ដេចក្រឡាហោម ស ខេង ឧបនាយករដ្ឋមន្ត្រី អនុប្រធានគណបក្សប្រជាជនកម្ពុជា និងជាប្រធានក្រុមការងារចុះជួយមូលដ្ឋានខេត្តបាត់ដំបង និងព្រៃវែង បានបញ្ជាក់ថា គណបក្សប្រជាជនកម្ពុជា កើតចេញពីប្រជាជនដើម្បីប្រជាជន ជាគណបក្សនយោបាយមានវ័យចំណាស់ជាងគេ ជាគណបក្សមានអាទិភាពជាងគេក្នុងសង្គមកម្ពុជានារយៈពេលជាង ៧០ ឆ្នាំ។

សម្ដេចក្រឡាហោម ស ខេង បានមានប្រសាសន៍នេះ នៅក្នុងពិធីអញ្ជើញជាអធិបតីក្នុងពិធីសម្ពោធអគារសាលប្រជុំ និងសមិទ្ធផលនានាក្នុងទីស្នាក់ការគណបក្សប្រជាជនកម្ពុជា ស្រុកបវេល ខេត្តបាត់ដំបង នាព្រឹកថ្ងៃសៅរ៍ ទី០៥ ខែមីនា ឆ្នាំ២០២២នេះ។

សម្ដេចក្រឡាហោម ស ខេង បានមានប្រសាសន៍ថា៖ “គណបក្សប្រជាជនកម្ពុជាកើតចេញពីប្រជាជន ដើម្បីប្រជាជន ជាគណបក្សនយោបាយដែលមានឧត្តមគតិស្នេហាជាតិ និងប្រជាជនយ៉ាងពិតប្រាកដ ជាគណបក្សនយោបាយមួយដែលមានវ័យចំណាស់ជាងគេ ជាគណបក្សមានអាទិភាពជាងគេក្នុងសង្គមកម្ពុជានារយៈពេលជាង ៧០ ឆ្នាំមកហើយ និងក៏ជាគណបក្សដែលសម្រេចបានស្នាដៃធំៗជាច្រើនជូនជាតិ និងប្រជាជនកម្ពុជា”។

សម្ដេចក្រឡាហោមមានប្រសាសន៍សង្កត់ធ្ងន់ថា ស្នាដៃធំៗទាំងនោះរួមមាន ការចូលរួមដណ្ដើមឯករាជ្យពីបារាំង ការរំដោះប្រទេសពីរបបប្រល័យពូជសាសន៍ ការកសាងប្រទេសពីបាតដៃទទេ ការចរចាស្វែងរកការបង្រួបបង្រួមជាតិ និងការគាំទ្រដំណើរការបោះឆ្នោតឆ្នាំ ១៩៩៣ ដែលនាំមកនូវលទ្ធិប្រជាធិបតេយ្យសេរីពហុបក្ស ការផ្ដួចផ្ដើម និងអនុវត្តនយោបាយឈ្នះៗនាំមកនូវសុខសន្តិភាព ឯកភាពជាតិ និងទឹកដី ការបន្តថែរក្សាការពារសុខសន្តិភាព ស្ថិរភាពនយោបាយ និងសង្គម ដើម្បីបង្កឱកាសដល់ការអភិវឌ្ឍជាតិដូចបច្ចុប្បន្ន៕

អត្ថបទ៖ ណារី