រដ្ឋបាលខេត្តកែប ធ្វើសន្និបាតបូកសរុបលទ្ធផល ការងារឆ្នាំ ២០២១​ និងលើកទិសដៅការងារឆ្នាំ ២០២២​​

រយៈពេលពីរថ្ងៃ គឺចាប់ពីថ្ងៃទី ៩​ និងទី ១០ ខែមីនា ឆ្នាំ ២០២២ រដ្ឋបាលខេត្តកែប បានរៀបចំសន្និបាតបូកសរុបលទ្ធផលការងារប្រចាំឆ្នាំ ២០២១ និងលើកទិសដៅបន្តសម្រាប់ឆ្នាំ ២០២២ ក្រោមអធិបតីភាព លោក សំ សារីន ប្រធានក្រុមប្រឹក្សាខេត្តកែប និងលោក សោម ពិសិដ្ឋ អភិបាល នៃគណៈអភិបាលខេត្ត​កែប និងមានការចូលរូមពីមន្ត្រីពាក់ព័ន្ធ ជាច្រើនរូបទៀត។

នៅក្នុងអង្គសន្និបាតនោះ បានដំណើរការដោយមានបទអន្តរាគមន៍ ពីអង្គភាពជំនាញចំនួន ៥ គឺស្នងការដ្ឋាននគរបាលខេត្ត មន្ទីរទេសចរណ៍ខេត្ត រដ្ឋបាល​អភិបាលក្រុង-ស្រុក និងមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត។ ក្នុងនោះ ក៏បានលើកយកនូវប្រធានបទសំខាន់ៗចំនួន ៥ ដើម្បីចែកក្រុមពិភាក្សាយ៉ាងផុលផុសដែលរួមមាន៖ ១. សន្តិសុខ សណ្ដាប់ធ្នាប់សាធារណៈ ការគ្រប់គ្រងធនធានធម្មជាតិ ដីធ្លី និងការអនុវត្តគោលនយោបាយ​ ភូមិឃុំមានសុវត្ថិ ភាព, ២. ពិភាក្សាលើ ជំងឺកូវីដ-១៩ និងជំងឺឆ្លងនានា និងវិស័យអប់រំ, ៣. ការផ្ដល់សេវាសាធារណៈ, ៤. ការអភិវឌ្ឍវិស័យទេសចរណ៍, និង៥. ការអភិវឌ្ឍឃុំ-សង្កាត់។

ដោយឡែក ចំពោះការអញ្ជើញបិទអង្គសន្និបាត ក្រោមវត្តមានលោក ជិន ប៊ុនស៊ាន ទេសរដ្ឋមន្រ្តីទទួលបន្ទុកបេសកកម្មពិសេស​ និងជាប្រធានក្រុមការងាររាជរដ្ឋាភិបាលចុះជួយខេត្តកែប​ នៅថ្ងៃទី ១០ ខែមីនា លោកបណ្ឌិត សោម ពិសិដ្ឋ អភិបាលខេត្តកែប បានជំរុញដល់អាជ្ញាធរមូលដ្ឋាន ត្រូវយកចិត្តទុក​ដាក់អនុវត្តការងារ ឲ្យមានប្រសិទ្ធភាពនូវកម្មវិធីវិនិយោគ ៣ឆ្នាំរំកិល​ ដើម្បីបំពេញតម្រូវការជាក់ស្តែង។ត្រូវយកចិត្តទុកដាក់ លើការងារផ្តល់សេវាផ្សេងៗ ជូនប្រជាពលរដ្ឋឲ្យមានប្រសិទ្ធភាព តម្លាភាព គណ​នេយ្យភាព និងក្រមសីលធម៌។ លើកកម្ពស់ចលនាភូមិ-ឃុំមានសុវត្ថិភាព ដើម្បីធានាបាននូវសុខសុវត្ថិភាព និងសណ្តាប់ធ្នាប់សាធារណៈ ជូនប្រជាពលរដ្ឋ។ ជំរុញការអនុវត្តច្បាប់ ស្តីពី​ ការគ្រប់គ្រងធនធានធម្មជាតិ, ច្បាប់ចរាចរណ៍ផ្លូវគោគ ឲ្យមានប្រសិទ្ធភាព។ យកចិត្តទុកដាក់ ដោះស្រាយទំនាស់ក្រៅប្រព័ន្ធតុលាការ ជូនប្រជាពលរដ្ឋអន្តរាគមន៍ដោះស្រាយ បញ្ហាគ្រោះមហន្តរាយជូនប្រជាពលរដ្ឋឲ្យបានទាន់ពេលវេលា។

​មានប្រសាសន៍ក្នុងឱកាសនោះ លោក ជិន ប៊ុនស៊ាន បានបញ្ជាក់ថា សន្និបាតបូកសរុបប្រចាំឆ្នាំ ពិតជាមានសារៈសំខាន់ក្នុងការ ឆ្លុះបញ្ចាំងចំណុចខ្សោយ ខ្លាំង និងបញ្ហាប្រឈម​ ដែលបានជួបប្រទះ រយៈពេលពេញមួយឆ្នាំ ២០២១ និងពិភាក្សាដាក់ចេញទិសដៅបន្ត។ ក្នុងនោះ លោកទេសរដ្ឋមន្ត្រី ជំរុញឲ្យរដ្ឋបាលក្រុង-ស្រុក ត្រូវខិតខំយកចិត្តទុកដាក់ អនុវត្តតួនាទីភារកិច្ចស្របតាមច្បាប់ និងលិខិតបទដ្ឋានពាក់ព័ន្ធ ក្នុងស្មារតីទទួលខុសត្រូវ ទាំងការងារសន្តិសុខ​ សណ្តាប់ធ្នាប់ សុវត្ថិភាព របៀបរៀបរយ សាធារណៈ ក្នុងភូមិសាស្រ្តរបស់ខ្លួន ឲ្យមានភាពកាន់តែល្អប្រសើរ។

ជាមួយនេះ មន្រ្តីរាជការត្រូវមានការផ្លាស់ប្តូរផ្នត់គំនិត ឥរិយាបថ និងគោរពវិន័យបានល្អ ត្រូវផ្តល់សេវាសាធារណៈ ជូនប្រជាពលរដ្ឋឲ្យល្អប្រសើរ ដោយឈរលើមូលដ្ឋាន លើកកម្ពស់ប្រសិទ្ធភាពការងារ ការគោរពច្បាប់ គោលការណ៍នានារបស់រដ្ឋ និងពង្រឹងរបៀបរបបធ្វើការ​ ដើម្បីលើកកម្ពស់ការទទួលខុសត្រូវ ក្នុងការបំពេញតួនាទី ភារកិច្ចរបស់ខ្លួនសំដៅអភិវឌ្ឍមូលដ្ឋាន និងឆ្លើយតបចំពោះតម្រូវការ របស់ប្រជាពលរដ្ឋ ឲ្យទាន់ពេលវេលា ស្របតាមកម្មវិធីនយោបាយ និងយុទ្ធសាស្រ្តចតុកោណដំណាក់កាលទី ៤ របស់រាជរដ្ឋាភិបាល៕

អត្ថបទ៖ សេង ណារិទ្ធ