ព័ត៌មានជាតិ

រោងចក្រផលិតត្រីខកំប៉ុង មានទីតាំងផលិតនៅខ្មែរពិតប្រាកដ កំពុងសាងសង់ប្រើប្រាស់ធនធានសមុទ្រខ្មែរផលិតផ្គត់ផ្គង់ទីផ្សារក្នុងស្រុក

បានផុស

២ ខែ មុន

នៅ

ថ្ងៃពុធ ២២ មេសា ២០២៦

ដោយ

លោក ភោគ សុខេន ប្រធានមន្ទីរឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ខេត្តកែប បានបង្ហាញពីវឌ្ឍនភាពពីការសាងសង់រោងចក្រផលិតត្រីខកំប៉ុងនៅក្នុងខេត្តកែប ដែលបច្ចុប្បន្នកំពុងស្ថិតនៅក្នុងដំណើរការសាងសង់កន្លែងផលិតកម្ម និងសំណង់ផ្សេងៗ។

ឆ្លើយតបការសាកសួររបស់កម្ពុជាថ្មី លោក ភោគ សុខេន បានប្រាប់ថា គម្រោងវិនិយោគរោងចក្រផលិតត្រីខកំប៉ុងនៅក្នុងខេត្តកែប ទទួលបានការឯកភាពពីក្រុមប្រឹក្សាអភិវឌ្ឍន៍កម្ពុជា និងមានច្បាប់សាងសង់ត្រឹមត្រូវពីក្រសួងដែនដីរួចរាល់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះជាយ៉ាងណា លោកប្រធានមន្ទីរពុំទាន់អាចបញ្ជាក់បានពីភាគរយនៃដំណើរការសាងសង់ ឬកាលបរិច្ឆេទនៃការបញ្ចប់គម្រោងបានច្បាស់លាស់នៅឡើយទេ ដោយសាររោងចក្រស្ថិតនៅក្នុងដំណាក់កាលសាងសង់ មិនទាន់ឈានដល់ការដំណើរការផលិតកម្មនៅឡើយ។

«បើតាមដឹង ស្រុកខ្មែរយើងមិនទាន់មានរោងចក្រផលិតត្រីខកំប៉ុងនៅឡើយទេ ហើយរោងចក្រនេះជារោងចក្រដំបូងដែលផលិតត្រីខកំប៉ុងផ្គត់ផ្គង់ទីផ្សារក្នុងស្រុក»។ លោក ភោគ សុខេន អះអាង មុនលោកបន្តថា «នៅពេលរោងចក្រនេះដំណើរការពេញលេញ នឹងផ្តល់ផលប្រយោជន៍យ៉ាងច្រើនដល់ខេត្តកែបនិងប្រទេសកម្ពុជា តាមរយៈការជួយបង្កើតការងារ ដែលរោងចក្រនឹងផ្តល់ការងារដល់ប្រជាពលរដ្ឋក្នុងមូលដ្ឋានផ្ទាល់ ជួយឱ្យពលរដ្ឋមានការងារធ្វើមិនចាំបាច់ចំណាកស្រុកទៅធ្វើការនៅកន្លែងឆ្ងាយ»។

បន្ថែមពីនេះ លោក ភោគ សុខេន បញ្ជាក់ទៀតថា «ដោយសារជារោងចក្រផលិតត្រីខដំបូងគេនៅកម្ពុជា វាក៏នឹងជួយលើកស្ទួយការប្រើប្រាស់ផលិតផលនៅក្នុងស្រុក កាត់បន្ថយការនាំចូលត្រីខពីបរទេស»។

ចំណុចពិសេសរបស់រោងចក្រនេះ គឺប្រើប្រាស់វត្ថុធាតុដើមក្នុងស្រុកទាំងស្រុង ដែលរោងចក្រនឹងចាប់ដៃគូជាមួយសហគមន៍នេសាទក្នុងខេត្តកែប និងកំពតដើម្បីផ្គត់ផ្គង់ត្រីទឹកប្រៃ ហើយក៏នឹងយកត្រីទឹកសាបពីតំបន់ទន្លេសាបតាមបណ្ដាខេត្តផ្សេងៗ ដែលនេះជាការជួយប្រើប្រាស់ធនធានក្នុងស្រុកឱ្យអស់លទ្ធភាពជាជាងការនាំចេញវត្ថុធាតុដើមទៅក្រៅ។

បើតាមលោក ភោគ សុខេន រោងចក្រនេះក្រៅពីផលិតត្រីខកំប៉ុង ក៏មានផលិតផលិតផលផ្សេងៗទៀតដោយរួមផលិតផលទឹកត្រីផងដែរ។

ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងបង្កើតរោងចក្រត្រីខកំប៉ុងនិងទឹកត្រី ក្រោមទំហំទុនវិនិយោគ ៧ លានដុល្លារ ស្ថិតនៅក្នុងស្រុកដំណាក់ចង្អើរ ខេត្តកែប ដែលអាចបង្កើតការងារបានប្រមាណ ១៧១ កន្លែង។

ពាក់ព័ន្ធស្ថានភាពសហគ្រាសក្នុងខេត្តកែប បើតាមប្រធានមន្ទីរឧស្សាហកម្មខេត្តកែប ក្រៅពីរោងចក្រផលិតត្រីខដែលកំពុងដំណើរការសាងសង់ ខេត្តកែបពុំទាន់មានរោងចក្រឬសហគ្រាសខ្នាតធំផ្សេងទៀតនៅឡើយទេ។

បច្ចុប្បន្នខេត្តមានសិប្បកម្មផលិតទឹកត្រីលក្ខណៈគ្រួសារដែលកំពុងមានឈ្មោះបោះសំឡេង និងចរាចរណ៍លក់ទូទាំងប្រទេស ដូចជាទឹកត្រីម៉ាក “គីម ហ៊ី រូបទន្សាយ ១” និង “លឹម លាង រូបនាងទេពមច្ឆា”។

លោក ភោគ សុខេន បានបញ្ជាក់ថា អាជ្ញាធរខេត្តបានកំពុងខិតខំជំរុញនិងស្វែងរកទីផ្សារបន្ថែម ដើម្បីឱ្យសិប្បកម្មលក្ខណៈគ្រួសារអាចពង្រីកដើមទុនក្លាយជាសហគ្រាសធុនមធ្យម ឬខ្នាតធំនៅពេលខាងមុខ៕