ខេត្ត​ស្វាយរៀង វិស័យអប់រំ​​រីកចម្រើន​​ទទួល​បាន​ពាន​​រង្វាន់បន្ត​បន្ទាប់

លោក ខៀវ សំអុល ប្រធានមន្ទីរអប់រំយុវជននិងកីឡាខេត្តស្វាយរៀង បាន​លើក​ពី​វឌ្ឍនភាព​​រីកចម្រើននៃ​​វិស័យអប់រំ​នៅ​ខេត្ត​ស្វាយរៀង​ ហើយអ្វីដែលជាមោទនភាពការ​​ទទួលបានជយលាភី និង​លិខិត​សរសើរ​ជាបន្តបន្ទាប់។

លោក ខៀវ សំអុល បា​ន​ឲ្យ​កម្ពុជា​ថ្មី​ដឹង​ថា វិស័យអប់រំជាវិស័យអាទិភាព ក្នុងការកសាងធនធានមនុស្សប្រកបដោយសក្តានុពល ចូលរូលរួមចំណែកអភិវឌ្ឍន៍​ជាតិ។ បើក្រឡេកមើលការរីកចម្រើនក្នុងវិស័យអប់រំរបស់​ខេត្ត​ស្វាយរៀង ក៏ទទួលបានផលវិជ្ជមានពីកំណែទម្រង់សុីជម្រៅនៅក្នុងប្រព័ន្ធអប់រំនៅកម្ពុជា នាំ​ឲ្យ​មាន​អគារសាលារៀនជាច្រើនចាប់ពីកំរិតមត្តេយ្យសិក្សា ដល់មធ្យមសិក្សាកំពុងកសាងគ្រប់ទីកន្លែង។

ជាក់ស្តែងក្នុងខេត្តស្វាយរៀង វិស័យអប់រំមានការអភិវឌ្ឍន៍គួរឲ្យកត់សម្គាល់។ អ្វីដែលជាមោទនភាពសម្រាប់វិស័យ​អប់រំ​ក្នុង​ខេត្តស្វាយរៀង ក្រោយ​ទទួលបានជយលាភីពីក្រសួងអប់រំយុវជននិងកីឡា និង​បណ្ណ​សរសើរ​ជាបន្តបន្ទាប់។

លោកបានមានប្រសាសន៍ថា នៅតាមសាលារៀន លោកនាយក លោកគ្រូ-អ្នកគ្រូ បានចូលរួមប្រកួតប្រជែង​ដណ្តើមពានរង្វាន់សម្តេចអគ្គមហាសេនាបតីតេជោ ហ៊ុន សែន ជាលទ្ធផល វិទ្យាល័យស្វាយរៀងទទួល​បាន​ចំណាត់ថ្នាក់លេខ១ ជាសាលាល្អ និង​ទទួល​បាន​ចំណាត់ថ្នាក់លេខ៦ ជានាយកល្អ។ ដោយឡែក​ វិទ្យាល័យហ៊ុនសែនចន្រ្ទា ទទួល​ចំណាត់ថ្នាក់លេខ១០ ជាគ្រូបង្រៀនល្អ។

រាជរដ្ឋាភិបាលកម្ពុជាប៉ុន្មានឆ្នាំកន្លងទៅ ខិតខំពង្រឹងទាំងវិស័យអប់រំ លើ​ការ​កសាង​អគារ​សិក្សា​ដើម្បីជួយសម្រួលលទ្ធភាពពលរដ្ឋក្រីក្រ អាចនាំកូនចៅមកទទួលការសិក្សាដោយមិនបាច់ចំណាយថវិកា។ ក្នុងខេត្តស្វាយរៀង​ មាន​មត្តេយ្យសិក្សារដ្ឋ ១៧៣ ក្នុងនោះមតេយ្យធនធាន០៦។ មត្តេយ្យសហគមន៍ ៣០៤កន្លែងនិង​មត្តេយ្យឯកជន ៦ សាលា។ បឋមសិក្សាមាន ២៦១សាលាចែកចេញជា ៣៨កម្រង។

ដោយឡែក​កម្រិត​មធ្យម​សិក្សា ខេត្ត​ស្វាយរៀង​​មាន​អនុវិទ្យាល័យ ៥៣កន្លែង និង​វិទ្យាល័យ ២១កន្លែង និង​មាន​សិស្សានុសិស្សកំពុង​សិក្សា​ប្រមាណ ១៣០ ០០០ នាក់។

លោកប្រធានមន្ទីរ​ក៏លើក​បញ្ហាប្រឈមលើ​ការ​ខ្វះខាត​អគារ​សិក្សា ខណៈអាគារសិក្សាមួយចំនួនមានសភាពទ្រុឌទ្រោម ដែលសាងសង់ក្នុងទសវត្សរ៍៨០និង៩០ មិនអាចឲ្យសិស្សចូលរៀនបានទេ។ ​ជាមួយ​គ្នានេះ​ បញ្ហាកង្វះគ្រូបង្រៀន ដែល​តម្រូវឲ្យ​ប្រើប្រាស់​គ្រូកិច្ចសន្យាជាច្រើននាក់ក្នុងការបង្រៀនសិស្ស ជាពិសេសនៅតាមបណ្ដាស្រុកមួយចំនួនដែលនៅឆ្ងាយ៕

អត្ថបទ៖ ភក្ដី