ក្រសួងការងារ នឹងបើកយុទ្ធនាការផ្សព្វផ្សាយ​របបសន្តិសុខសង្គមផ្នែកប្រាក់សោធនរយៈពេល ៣ខែ

ក្រសួងការងារ និងបណ្តុះបណ្តាលវិជ្ជាជីវៈគ្រោងនឹងបើកយុទ្ធនាការផ្សព្វផ្សាយរបបសន្តិសុខសង្គមផ្នែកប្រាក់សោធន​សម្រាប់បុគ្គលទាំងឡាយ ដែលស្ថិតនៅក្រោមបទប្បញ្ញត្តិនៃច្បាប់ស្តីពីការងាររយៈពេល៩០ថ្ងៃ គឺចាប់ពីខែកក្កដា ដល់ដំណាច់ខែកញ្ញា ឆ្នាំ២០២២ នេះតទៅ នៅតាមបណ្តាតំបន់សេដ្ឋកិច្ចពិសេស សួន ឧស្សាហកម្ម រោងចក្រ សហគ្រាស គ្រឹះស្ថាន ទូទាំងរាជធានី ខេត្ត ក្រុង ស្រុក ខណ្ឌ។

យោងតាមសេចក្ដីណែនាំរបស់ក្រសួងការងារ និងបណ្តុះបណ្តាលវិជ្ជាជីវៈ ចុះថ្ងៃទី ១១កក្កដានេះ បានឱ្យដឹងថា ដើម្បីឱ្យការរៀបចំយុទ្ធនាការផ្សព្វផ្សាយខាងលើបានទូលំទូលាយ និងប្រកបដោយប្រសិទ្ធភាព ក្រសួងស្នើសុំដល់នាយក ឬម្ចាស់រោងចក្រ សហគ្រាស គ្រឹះស្ថាន ត្រូវផ្តល់កិច្ចសហការផ្តល់ទីកន្លែង និងរៀបចំកម្មករនិយោជិត ឱ្យបានចូលរួម​ស្វែងយល់ពីកាតព្វកិច្ច និងអត្ថប្រយោជន៍នៃរបបសន្តិសុខសង្គមផ្នែកប្រាក់សោធនសម្រាប់ បុគ្គលទាំងឡាយ ដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ ដែលមានរយៈពេលយ៉ាងតិចចំនួន២ ម៉ោងក្នុងមួយពេល។

ក្រសួងបានបន្តថាមួយវិញទៀត នាយក ឬម្ចាស់រោងចក្រ សហគ្រាស គ្រឹះស្ថាន ត្រូវធានាថាកម្មករ និយោជិតរបស់ខ្លួន​បានចូលរួមដើម្បីយល់ដឹងពីកាតព្វកិច្ច សិទ្ធិ និងអត្ថប្រយោជន៍នៃការចូលរួមក្នុងផ្នែកប្រាក់ សោធ។

ក្រសួងសង្ឃឹមយ៉ាងមុតមាំថា ម្ចាស់តំបន់សេដ្ឋកិច្ចពិសេស សួនឧស្សាហកម្ម រោងចក្រ សហគ្រាស គ្រឹះស្ថាន ទាំងអស់ ផ្តល់កិច្ចសហការក្នុង ការអនុវត្តតាមសេចក្ដីណែនាំនេះ ប្រកបដោយស្មារតីទទួលខុសត្រូវខ្ពស់។

គួរបញ្ជាក់ថា អន្តរក្រសួងបានប្រកាស ដាក់ឱ្យអនុវត្តរបបសន្តិសុខសង្គមផ្នែកប្រាក់សោធនសម្រាប់បុគ្គលទាំងឡាយ​ដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារនៅថ្ងៃទី២៨ ខែមិថុនា ឆ្នាំ២០២២ និងក្រសួងការងារ​បានប្រកាស​ស្តីពី​កាលបរិច្ឆេទនៃការចាប់ផ្ដើមបង់ភាគទាននៃរបបសន្តិសុខសង្គម ផ្នែកប្រាក់សោធនតាមរបបភាគទាន ជាកាតព្វកិច្ច និងរបបភាគទានដោយស្ម័គ្រចិត្ត កាលពីថ្ងៃទី៥ ខែកក្កដា ឆ្នាំ២០២២៕ សំអឿន