ស្ថាប័នពីរសហការបណ្តុះបណ្តាលដល់និស្សិតដើម្បីពង្រឹងលើជំនាញបដិសណ្ឋារកិច្ច

ភ្នំពេញ៖ វិទ្យាស្ថានជាតិសហគ្រិនភាព និងនវានុវត្តន៍ (NIEI) បានចុះអនុស្សរណៈនៃការយោគយល់គ្នា​ជាមួយសណ្ឋាគារ​ហៃយ៉ាត់ រីជិនស៊ី ភ្នំពេញ ដើម្បីផ្តល់កម្មសិក្សាដល់និស្សិតនូវមុខជំនាញបណ្តុះបណ្តាល​ផ្នែកបដិសណ្ឋារកិច្ច។

ការចុះអនុស្សរណៈធ្វើឡើងនៅសណ្ឋាគារហៃយ៉ាត់ កាលពីថ្ងៃទី២៥ ខែសីហា ឆ្នាំ២០២២ ដោយតំណាងឱ្យវិទ្យា​ស្ថានជាតិ​សហគ្រិនភាព និងនវានុវត្តន៍ លោក តាន់ កុសល ជាមួយអ្នកគ្រប់គ្រងទូទៅនៃសណ្ឋាគារ លោក Juan Mercadante ដោយកិច្ចព្រមព្រៀងនេះ មានរយៈពេល ២ឆ្នាំជាមួយគ្នា ដោយសណ្ឋាគារនឹងផ្តល់ធនធាន សិក្ខាសាលា ការបណ្តុះបណ្តាល ការប្រឹក្សាបច្ចេកទេស និងកម្មវិធីសិក្សាដល់និស្សិត NIEI ដើម្បីជួយកសាងជំនាញ​របស់ពួកគេនៅក្នុងផ្នែកសំខាន់ៗនៃបដិសណ្ឋារកិច្ច។

ការរៀបចំរវាងសណ្ឋាគារហៃយ៉ាត់ រីជិនស៊ី ភ្នំពេញ និងវិទ្យាស្ថានជាតិសហគ្រិនភាព និងនវានុវត្តន៍ (NIEI) គឺស្របតាមកម្មវិធីសកលរបស់ Hyatt RiseHY ដែលជាកម្មវិធីមួយដែលត្រូវបានបង្កើតឡើងដើម្បីផ្តល់ឱកាសការងារ​របស់ឧស្សាហកម្មបដិសណ្ឋារកិច្ចដល់និស្សិតវ័យក្មេង។ ផ្អែកលើគំនិតផ្តួចផ្តើមនេះនៅត្រឹមឆ្នាំ២០២៥ សណ្ឋាគារ ហៃយ៉ាត់ ជុំវិញពិភពលោកប្តេជ្ញាថានឹងផ្ដល់ឱកាសការងារដល់យុវជនដែលមិនមានសមត្ថភាព និងឱកាសគ្រប់គ្រាន់ក្នុង​ការទទួលបានការអប់រំនៅសាលា ឬឱកាសធ្វើការចំនួន ១ម៉ឺននាក់ ដែលមានអាយុពី ១៦ទៅ ២៤ឆ្នាំ៕