យុវជន៣ក្រុម ឈ្នះការប្រកួតប្រជែងក្នុងកម្មវិធីយុវជនឆ្ពោះទៅអាជីវកម្ម

សហគ្រិនខ្មែរ បានប្រកាសរកឃើញយុវជនជើងខ្លាំង៣ក្រុមដែលឈ្នះរង្វាន់ក្នុងកម្មវិធីយុវជនឆ្ពោះទៅអាជីវកម្ម។ ក្រុមយុវជនជ័យលាភីទាំង៣ក្រុមនេះ បានត្រូវបានជម្រុះក្នុងចំណោមបេក្ខជនសរុបចំនួន៤០០ ដែលបានដាក់ពាក្យចូលរួមប្រកួតប្រជែងលើប្រធា​នបទ នវានុវត្តន៍ ដើម្បីការអភិវឌ្ឍន៍ ការច្នៃប្រឌិតដែលដឹកនាំដោយយុវជនសម្រាប់ការអភិវឌ្ឍន៍សហគ្រាសធុនតូច និងមធ្យម។

លោកបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាលទទួលបន្ទុកជានាយកប្រតិបត្ដិនៃសហគ្រិនខ្មែរ បានមានប្រសាសន៍ថា កម្មវិធី យុវជនឆ្ពោះទៅអាជីវកម្ម គឺជាកម្មវិធីគាំទ្រមួយនៃកម្មវិធីគាំទ្រជាច្រើទៀតរបស់សហគ្រិនខ្មែរដែលផ្ដល់ឱកាសដល់យុវជនបង្ហាញពីគំនិតច្នៃប្រឌិតនៃនវានុវត្តន៍ថ្មី បណ្ដុះជំនាញ ដោះស្រាយបញ្ហា និងជំរុញស្មារតីសហគ្រិនភាព។ សហគ្រិនខ្មែរ ជឿជាក់ថា ការផ្តល់ឱកាសដល់យុវជនតាមរយៈកម្មវិធីនេះ គឺមានសារៈសំខាន់សម្រាប់ការជំរុញកំណើនសេដ្ឋកិច្ច ជំរុញនវានុវត្តន៍ថ្មី និងបង្កើតការផ្លាស់ប្តូរនៅក្នុងប្រព័ន្ធអេកូឡូស៊ីសហគ្រិនភាព។

កម្មវិធីនេះ ត្រូវបានធ្វើឡើងក្រោមប្រធានបទ “នវានុវត្តន៍ ដើម្បីការអភិវឌ្ឍន៍’’។ ធាតុសំខាន់នៃការប្រកួតប្រជែងគឺ ការផ្តោតលើការដាក់ចំណោទ បញ្ហាដែលកើតមានឡើងនៅក្នុងបរិបទ អាជីវកម្មជាក់ស្ដែង ហើយតម្រូវឱ្យបេក្ខជនប្រកួតមានគំនិតផ្ដួចផ្ដើម ស្វែងរកដំណោះស្រាយបែបបច្ចេកវិទ្យា ទៅលើបញ្ហាប្រឈមទាំងនោះ ដើម្បីឱ្យមានភាពប្រសើរ ឡើងនៅក្នុងប្រព័ន្ធអេកូឡូស៊ីសហគ្រិនភាព។

យុវជនដែលម្ចាស់ជ័យលាភីទាំង៣ក្រុមនេះ គឺ

-ជ័យលាភីលេខ១ បានទៅលើក្រុម Beyonism

-ជ័យលាភីលេខ២ បានទៅលើក្រុម Gofit

-ជ័យលាភីលេខ៣ បានទៅលើក្រុម Ordersyn៕