សម្តេច ស ខេង បញ្ជាឲ្យមន្រ្តីពាក់ព័ន្ធទាំងអស់ដោះស្រាយបញ្ហាជូនពលរដ្ឋឲ្យបានល្អ និងឲ្យចប់ចុងចប់ដើម

សម្តេចក្រឡាហោម ស ខេង រដ្ឋមន្រ្តីក្រសួងមហាផ្ទៃ បានបង្ហាញដឹងនៅរសៀលនេះថា នៅក្នុងខែកក្កដា ឆ្នាំ២០២២នេះ ក្រុមការងារតាមដានអំពីការដោះស្រាយចំពោះមតិយោបល់ ឬសំណូមពររបស់ប្រជាពលរដ្ឋ ក្នុងទំព័រហ្វេសប៊ុករបស់សម្តេច បានទទួលសំណូមពរ និងសំណួររបស់ប្រជាពលរដ្ឋ ស្ថិតក្នុងដែនសមត្ថកិច្ចក្រសួងមហាផ្ទៃចំនួន១០១គណនី។ សម្តេច ក៏បានបញ្ជាឲ្យមន្រ្តីពាក់ព័ន្ធទាំងអស់ដោះស្រាយបញ្ហារបស់ប្រជាពលរដ្ឋទាំងនេះ ឲ្យបានល្អ និងចប់ចុងចប់ដើម។

នៅក្នុងចំណោមគណនីទាំង១០១នេះ ក្រុមការងាររបស់សម្តេចក្រឡាហោម ស ខេង បានឆ្លើយតប និងដោះស្រាយចំនួន២៣គណនី។ បូករួមទាំងករណីសេសសល់កាលពីខែមុនៗ និងក្នុងខែកក្កដានេះ នៅមានករណីចំនួន២១៥ទៀត កំពុងស្ថិតក្នុងការដោះស្រាយតាមនីតិវិធីក្រុមការងារ និងអង្គភាពជំនាញចំណុះក្រសួងមហាផ្ទៃ។ ទន្ទឹមគ្នានឹងនេះ ក៏មានសំណូមពរ សំណួរ និងបញ្ហាខ្លះទៀតដែលប្រជាពលរដ្ឋបានផ្ញើទៅ ហើយត្រូវបានក្រុមការងាររកឃើញថា ករណីទាំងនោះ ខុសពីសមត្ថកិច្ចក្រសួងមហាផ្ទៃ។ ក្រុមការងារក៏បានជូនយោបល់បង្វែរទៅស្ថាប័នមានសមត្ថកិច្ច។ នេះបើតាមការបញ្ជាក់របស់សម្តេច ស ខេង។

សម្រាប់សម្តេច ស ខេង វឌ្ឍនភាពការងារនេះ អាចសម្រេចបាន ដោយសារមានកិច្ចខិតខំប្រឹងប្រែង និងការសហការគ្នាដ៏ល្អរវាងថ្នាក់ដឹកនាំ និងមន្ត្រីស្ថិតក្នុងដែនសមត្ថកិច្ចក្រសួងមហាផ្ទៃ ទាំងថ្នាក់ជាតិ និងថ្នាក់ក្រោ​មជាតិ និងក្រុមការងារគេហទំព័រហ្វេសប៊ុករបស់សម្តេច។ ដូច្នេះហើយ សម្តេច ស ខេង បានកោតសរសើរមន្ត្រីសមត្ថកិច្ចគ្រប់លំដាប់ថ្នាក់ដែលបានខិតខំដោះស្រាយបញ្ហា សំណូមពរ និងសំណួរនានារបស់ប្រជាពល​រដ្ឋ តាមកាតព្វកិច្ចរបស់ខ្លួនដែលជាអ្នកបម្រើប្រជាពលរដ្ឋ ដោយមិនប្រកាន់និន្នាការ បក្ខពួក និង ផលប្រយោជន៍។

ប៉ុន្តែ សម្តេច ក៏អះអាងដែរថា៖ «ខ្ញុំក៏សុំឲ្យថ្នាក់ដឹកនាំ និងមន្ត្រីពាក់ព័ន្ធដែលស្ថិតក្រោមសមត្ថកិច្ចក្រសួងមហាផ្ទៃទាំងអស់ គប្បីបន្តខិតខំពន្លឿនការដោះស្រាយករណីដែលនៅសេសសល់ ហើយត្រូវប្រាកដថាការដោះស្រាយទាំងអស់នោះត្រូវតែដោះស្រាយឱ្យបានល្អ គ្រប់ជ្រុងជ្រោយ ចំបញ្ហា និងចប់ចុងចប់ដើម ដោយមិនគ្រាន់តែធ្វើជាលិខិតស្នាមបញ្ជាតាមបែបបទរដ្ឋបាល»។

ជាមួយគ្នានេះ សម្តេច ស ខេង ក៏បានអរគុណប្រជាពលរដ្ឋទាំងអស់ដែលបានលើកជាមតិយោបល់ និងសំណូមពរនានាមកកាន់រូបសម្តេចតាមរយៈទំព័រហ្វេសប៊ុក ដើម្បីរួមគ្នាដោះស្រាយបញ្ហានានាក្រៅប្រព័ន្ធតុលាការ ជួយសម្រួលជីវភាពរស់នៅរបស់ពលរដ្ឋ និងរួមគ្នាអភិវឌ្ឍន៍សង្គមជាតិ។ យ៉ាងណាក៏ដោយ សម្តេច ស ខេង ក៏បានស្នើសុំការយល់យោគអធ្យាស្រ័យពីប្រជាពលរដ្ឋ ចំពោះករណីមួយចំនួនទៀតដែលក្រុមការងារ និងភាគីពាក់ព័ន្ធ នៅមិនទាន់បានដោះស្រាយចប់សព្វគ្រប់ អាស្រ័យលើករណីខ្លះទាមទារពេលវេលា និងអនុវត្តទៅតាមនីតិវិធី៕