មណ្ឌលកែប្រែគ្រឿងញៀនខេត្តកណ្តាលគ្រោងដំណើរការចុងឆ្នាំនេះក្រោយសាងសង់បាន ៩០%ហើយ

មជ្ឈមណ្ឌលជាតិព្យាបាល និងស្ដារនីតិសម្បទាអ្នកញៀនគ្រឿងញៀន ដែលមាន​ទីតាំង​នៅស្រុក កណ្ដាលស្ទឹង ខេត្តកណ្ដាល សម្រេចបានការសាងសង់ប្រមាណ ៩០ភាគរយហើយគ្រោងបើកដំណើរការទទួលជនរងគ្រោះ​ដំណាក់កាល​​ដំបូងនៅចុងឆ្នាំនេះឬនៅដើមឆ្នាំក្រោយ។

លោក ស៊ុ ចំរើន ប្រធានមជ្ឈមណ្ឌលជាតិព្យាបាល និងស្ដារនីតិសម្បទាអ្នកញៀនគ្រឿងញៀនបានលើកឡើងក្នុងឱកាស​លោក វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា ចុះមកពិនិត្យដំណើរការសាងសង់ មជ្ឈមណ្ឌលជាតិព្យាបាល និងស្ដារនីតិសម្បទាអ្នកញៀនគ្រឿងញៀននៅព្រឹកថ្ងៃទី៥កញ្ញានេះ ​ឱ្យដឹងថា មជ្ឈមណ្ឌលជាតិព្យាបាល និងស្ដារនីតិសម្បទាអ្នកញៀនគ្រឿងញៀនមានទីតាំងនៅ ស្រុកកណ្ដាលស្ទឹង ខេត្តកណ្ដាល សម្រេចការសាងសង់បានប្រមាណ៩០ភាគរយហើយ គ្រោងនឹងបើកទទួលជនរងគ្រោះ នៅចុងឆ្នាំ ២០២២នេះ ឬដើមឆ្នាំ ២០២៣ ខាងមុខ។

លោកបានបន្តថា ជំហានដំបូងនេះ ​គឺនឹងផ្ទេរជនរងគ្រោះគ្រឿងញៀន ​ប្រមាណ ៣០០នាក់មកពីមណ្ឌលក្រាំងធ្នង់ នៅ​រាជធានីភ្នំពេញ​ រួចទើបឈានដល់ការពង្រីកវិសាលភាពរបស់ខ្លួន។​

លោកបានបន្តទៀតថា មជ្ឈមណ្ឌលជាតិព្យាបាល និងស្ដារនីតិសម្បទាអ្នកញៀន​គ្រឿងញៀន​ថ្មីមួយនេះ ​អាចជួយ​សង្រ្គោះ​ជនរងគ្រោះបានក្នុងរង្វង់ ៨០០ទៅ ១០០០នាក់ហើយមណ្ឌលផ្ដល់ទាំង​សេវាព្យាបាល ​និងផ្ដល់ទាំងការ​បង្រៀនជំនាញដល់ជនរងគ្រោះ ​កំឡុងពេលស្នាក់នៅដើម្បីប្រែក្លាយជនរងគ្រោះឱ្យទៅជាបុគ្គលល្អ ភ្ជាប់ជាមួយជំនាញ​ចិញ្ចឹមជីវិត ក្រោយព្យាបាលសះស្បើយ។

លោកបានបញ្ជាក់ថា មជ្ឈមណ្ឌលជាតិព្យាបាល និងស្ដារនីតិសម្បទាអ្នកញៀនគ្រឿងញៀននេះ នឹងផ្ដល់សេវាព្យាបាល​ជូន​ជនរងគ្រោះដោយពុំគិតថ្លៃ ។

គួរបញ្ជាក់ថា មណ្ឌលព្យាបាល បន្សាបនិងស្ដារនីតិសម្បទាអ្នកញៀនគ្រឿងញៀននេះ គឺជាសំណង់ប្រវត្តិសាស្ត្រមួយ សម្រាប់ប្រជាពលរដ្ឋនៅក្នុងខេត្តកណ្ដាល ពិសេសប្រជាពលរដ្ឋនៅក្នុងស្រុកស្អាងដែលត្រូវបានសាងសង់លើផ្ទៃដី ១០ ហិកតា មាន ២១អគាររួមមានអាគារសិក្សាពហុជំនាញ អគារការិយាល័យរដ្ឋបាល អគាររោងជាងនៅសម្រាប់បុរស នារី អគារសម្រាប់បុគ្គលិក មន្ទីរពេទ្យ អគារអប់រំផ្លូវចិត្ត រោងបាយនិងកន្លែងសម្រាប់ហាត់កីឡាផ្សេងៗ៕ អត្ថបទ៖ សំអឿន