អគាររដ្ឋបាលសាលាខេត្តព្រះសីហនុសង់បានប្រមាណ ១៥ ភាគរយ

លោកឃាង ភារម្យ អ្នកនាំពាក្យសាលាខេត្តព្រះសីហនុបានមានប្រសាសន៍នៅថ្ងៃទី ០៩ ខែ​កញ្ញានេះថា រហូតមកដល់ពេលនេះ អគាររដ្ឋបាលសាលាខេត្តព្រះសីហនុថ្មីសម្រេចការសាងសង់បានប្រមាណ ១៥ ភាគរយហើយបន្ទាប់ពីបានបញ្ចុះបឋមសិលាសាងសង់ជាផ្លូវការ កាលពីដើមខែមីនា ឆ្នាំ២០២២កន្លងទៅ។

អគាររដ្ឋបាលសាលាខេត្តព្រះសីហនុថ្មីបានបញ្ចុះបឋមសិលាសាងសង់នៅថ្ងៃទី០៧ ខែមីនាឆ្នាំ២០២២ នៅលើទីតាំងចាស់​មានផ្ទៃក្រឡាសរុប ៤៤,០៩៣ម៉ែត្រការ៉េ កម្ពស់ ៤ជាន់ គ្រោងសាងសង់ដោយប្រើរយៈពេល១៨ខែ។

យ៉ាងណាការសាងសង់អគាររដ្ឋបាលសាលាខេត្តព្រះសីហនុថ្មីនេះ​មានការរាំងស្ទះខ្លះៗ ដោយសារ​ជារដូវស្សាហើយខេត្តព្រះសីហនុ​ជាប់តំបន់ឆ្នេរសមុទ្របង្កឱ្យមានភ្លៀងធ្លាក់ជាបន្តបន្ទាប់។

លោក ឃាង ភារម្យ បានបញ្ជាក់ថា «ករណីបញ្ចប់ការសាងសង់ចាំមើលយើងឡើង​គ្រោង​សិន ទើបយើងអាចវាយតម្លៃបាន ដោយសារនៅខេត្តព្រះសីហនុមានភ្លៀងធ្លាក់រហូតហើយករណីអាកាសធាតុនេះក៏ជាករណីមួយដែរ»។

អគារសាលាខេត្តនេះមានកម្ពស់ ៤ ជាន់ និងមានផ្ទៃក្រឡាសរុប ៤៤,០៩៣ម៉ែត្រការ៉េ។ ចំពោះស្ថាបត្យកម្មនៃអគារគឺយកតាមរចនាបទសំបូរព្រៃគុក ដែលជាអគារមានលក្ខណៈខ្មែរទំនើបស៊ីវីល័យ៕

អត្ថបទ៖ សំអឿន