សិស្សវិទ្យាល័យហ៊ុន សែន កំពង់ចករាំបទប្រពៃណី​អមដោយសម្លៀកបំពាក់​យ៉ាងស្រស់ស្អាត

(ខេត្តស្វាយរៀង)៖ លោក តូច ប៉ូលីវ៉ា អភិបាលរងខេត្តស្វាយរៀង និងជាអនុប្រធាន ស.ស.យ.ក.ខេត្ត តំណាងឯកឧត្ដម ឌី វិជ្ជា ប្រធានស.ស.យ.ក.ខេត្ត បានសម្តែងការនូវកោតសរសើរចំពោះរដ្ឋបាលស្រុករំដួល  ចៅអធិការវត្តលក្ខរាជា លោកគ្រូ-អ្នកគ្រូ   សិស្សានុសិស្សទាំងអស់ ដែលមានគំនិតស្រឡាញ់ និងស្លៀកសម្លៀកបំពាក់បែបប្រពៃណីខ្មែររាំកម្សាន ដើម្បីអបអរសាទរក្នុងឱកាសពិធីបុណ្យកាន់បិណ្ឌភ្ជុំបិណ្ឌ នៅថ្ងៃទី ១៨ ខែ កញ្ញា ឆ្នាំ ២០២២។

លោក តូច ប៉ូលីវ៉ា បានលើកឡើងក្នុងឱកាសជួបសំណេះសំណាលជាមួយសិស្សានុសិស្ស នៃវិទ្យាល័យ ហ៊ុន សែន កំពង់ចក ដែលបានមករាំលេងជាចង្វាក់ រាំវង់ រាំក្បាច់ រាំសារ៉ាវ៉ាន់ ដោយស្លៀកសម្លៀកបំពាក់ជាប្រពៃណីខ្មែរ បែបបុរាណ មានហូល ផាមួង នៅក្នុងបរិវេណ វត្តលក្ខរាជា ស្ថិតនៅក្នុងឃុំកំពង់ចក ស្រុករំដួល  ខេត្តស្វាយរៀង។

 ជាមួយគ្នានេះ លោកអភិបាលរងខេត្ត ក៏បានណែនាំឱ្យប្អូនៗ សិស្សានុសិស្ស ខិតខំសិក្សារៀនសូត្រ ក្រេបជញ្ជក់យកចំណេះដឹង កសាងសមត្ថភាព ប្រកបដោយគុណភាព ដើម្បីរួមចំណែកជួយអភិវឌ្ឍសង្គមជាតិ ឱ្យកាន់តែមានភាពរីកចម្រើនបន្តទៅមុខទៀត៕ ដោយ:ភក្ដី