ព្រឹទ្ធមហាឧបាសិកា ទន់ ធី ម្តាយក្មេករបស់ឯកឧត្ដមឧបនាយករដ្ឋមន្ត្រី យឹម ឆៃលី ទទួលមរណភាព ក្នុងជន្មាយុ ៩០ឆ្នាំ

ព្រឹទ្ធមហាឧបាសិកាពុទ្ធសាសនូបត្ថម្ភក៍ ទន់ ធី ដែលត្រូវជាម្តាយក្មេករបស់ឯកឧត្ដមឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ បានទទួលមរណភាព នៅម៉ោង ០០ និង ១៨នាទីយប់រំលងអធ្រាត្រ ឈានចូលថ្ងៃទី ២៨ ខែកញ្ញា ឆ្នាំ ២០២២នេះ ក្នុងជន្មាយុ ៩០ឆ្នាំ ដោយជរាពាធ។

ឯកឧត្ដម ហ៊ុន ម៉ានី ដែលត្រូវជាចៅប្រសា របស់ព្រឹទ្ធមហាឧបាសិកាពុទ្ធសាសនូបត្ថម្ភក៍ ទន់ ធី បានសរសេរនៅលើទំព័រហ្វេសប៊ុកថា «ខ្ញុំបាទ និងភរិយា ព្រមទាំងក្រុមគ្រួសារមានទុក្ខជាទម្ងន់ ដោយ មហាឧបាសិកា ទន់ ធី ដែលត្រូវជាជីដូនក្មេក និងជីដូន បានទទួលមរណភាព កាលពីព្រឹកថ្ងៃពុធ ៣ កើត ខែអស្សុជ ឆ្នាំខាល ចត្វាស័ក  ព.ស.២៥៦៦ ត្រូវនឹងថ្ងៃទី ២៨ ខែកញ្ញា ឆ្នាំ២០២២ ក្នុងជន្មាយុ ៩០ ឆ្នាំ ដោយជរាពាធ»។

ឯកឧត្ដម ហ៊ុន ម៉ានី បានសរសេរបន្តថា «លោកយាយ គឺជាអ្នកមានគុណដ៏ល្អដែលបានលះបង់កម្លាំងកាយចិត្តថែទាំ និងផ្តល់នូវក្តីស្រលាញ់ ប្រកបដោយព្រហ្មវិហារធម៌ ចំពោះក្រុមគ្រួសារជានិច្ច។ ក្នុងនាមជាចៅប្រសារ ចៅបង្កើត និងចៅទួត យើងខ្ញុំទាំងអស់គ្នាសូមបួងសួងឲ្យវិញ្ញាណក្ខ័ន្ធ លោកយាយបានសោយសុខក្នុ ងសុគតិភពកុំបីឃ្លៀងឃ្លាតឡើយ»។

សូមជម្រាបថា បច្ចុប្បន្នសពព្រឹទ្ធមហាឧបាសិកាពុទ្ធសាសនូបត្ថម្ភក៍ ទន់ ធី កំពុងតម្កល់ធ្វើបុណ្យតាមប្រពៃណីសាសនា នៅគេហដ្ឋានស្ថិតនៅ ភូមិពន្លៃ ឃុំកក់ ស្រុកញញ្ញាក្រែក ខេត្តត្បូងឃ្មុំ៕