ប្រជាពលរដ្ឋមួយចំនួនក្នុងខេត្តប៉ៃលិនបន្តជីករែងត្បូងលក់ ដើម្បីជីវភាព

(ប៉ៃលិន)៖ ពលរដ្ឋខេត្តប៉ៃលិនមួយចំនួន នៅតែបន្តការជីករុករករ៉ែត្បូង នៅតាមបណ្តាដងស្ទឹង និងដងអូរ ជារៀងរាល់ថ្ងៃ បើទោះបីជាត្បូងនៅក្នុងខេត្តប៉ៃលិន នាពេលបច្ចុប្បន្ន នៅសេសសល់តិចតួចយ៉ាងណាក្តី ។

លោក ចាន់ ប៊ុនធឿន អាយុ៤២ឆ្នាំ រស់នៅភូមិសួនអំពៅ សង្កាត់ប៉ៃលិន ក្រុងប៉ៃលិន បានឲ្យដឹងថា ប៉ុន្មានឆ្នាំចុង​ក្រោយនេះ ការប្រកបមុខរបរ ជីកត្បូងតាមដងអូរ មានការថយចុះ ដោយសារតែរ៉ែត្បូង កាន់តែក្រខ្សត់ទៅៗ និងមិនសំបូរដូចពីមុន ហើយដីភាគច្រើន ជាកម្មសិទ្ធិឯកជន មិនអនុញ្ញាតឱ្យជីកកកាយនោះទេ ។ ក្រោយពីសម្រាកពីការងារធ្វើស្រែចម្ការ និងអ្នកដែលគ្មានដីធ្លី គឺនៅតែបន្តរុករកកំទេចរ៉ែត្បូងលក់ជារៀងរាល់ថ្ងៃ ហើយមានកុងសែ (ឈ្មួញ) ចូលទៅទិញដល់ទីតាំងតែម្តង ដើម្បីយកទៅច្នៃ សម្រាប់ធ្វើជាគ្រឿងអលង្ការ លក់បន្តឱ្យភ្ញៀវទេសចរចេញចូលក្នុងខេត្តប៉ៃលិន ។

ប្រជាពលរដ្ឋដដែលបន្តថា ការប្រកបរបរជីកដី រករ៉ែត្បូងមួយចំនួនធំ ត្រូវបានបោះបង់ចោល ដោយផ្លាស់ប្តូរ ទៅរកការប្រកបមុខរបរ ធ្វើស្រែចម្ការជំនួសវិញ ។ បច្ចុប្បន្ននេះ ពួកគាត់មានគ្នាតិចតូចបំផុត ដែលកំពុងធ្វើ​សកម្មភាពរែងត្បូងដោយដៃ នៅខេត្តប៉ៃលិន ដែលបញ្ហានោះហើយ នាំឱ្យតម្លៃទីផ្សារ ត្បូងប៉ៃលិនមានការឡើង​ខ្ពស់ជាងមុនបន្តិច ។ ត្បូងដែលល្អជាងគេនៅក្នុងចំណោមត្បូងនានាទូទាំងប្រទេសកម្ពុជា មានពីរប្រភេទ គឺត្បូងទទឹម (ពណ៌ក្រហម) និងត្បូងកណ្តៀង (ពណ៌ខៀវ) ដែលទទួលស្គាល់នៅលើពីភពលោកផងដែរ ។ ទោះបីជាយ៉ាងណា បច្ចប្បន្ននេះត្បូងប៉ៃលិន មិនសំបូរដូចកាលពីមុននោះទេ ។ ការរែងត្បូង របស់ពួកគាត់ បានចំនួនតិចតួចបំផុត ហើយមានតែត្បូងតូចៗ ប៉ុណ្ណោះ ។

លោក ចំណាន ហៅចយ ជាកុងសែ បានរៀបរាប់ថា តម្លៃត្បូងខេត្តប៉ៃលិន បច្ចុប្បន្ន មានហាងឆេងខ្ពស់ជាងមុន ដោយសារត្បូងមិនសូវមាន ពោលគឺភាគច្រើនពួកគាត់ទិញ បានពីអ្នករែងត្បូងនៅតាមដងស្ទឹង ។ លោកបន្តទៀតថា ឥឡូវនេះ មានគ្រាប់ត្បូងតូចៗ ប៉ុណ្ណោះ តែបើសិនជាចង់បានគ្រាប់ត្បូងធំៗ ហើយភ្ញៀវកម្មង់ទិញ គឺគាត់ទៅយកពីប្រទេសថៃមកវិញ ពីព្រោះជនជាតិថៃបានទិញ និងចូលមកជីកកកាយរុករករ៉ែត្បូងពីប៉ៃលិន បានច្រើនកាលពីមុនសម័យសង្គ្រាម។

ពាក់ព័ន្ធទៅនឹងបញ្ហានេះ លោក សុខ សួន ប្រធានមន្ទីររ៉ែ និងថាមពលខេត្តប៉ៃលិន បានឱ្យដឹងថា ការធ្វើអាជីវកម្មរ៉ែ​ត្បូងមានការធ្លាក់ចុះ មានប្រជាពលរដ្ឋមួយចំនួនតូចនាំគ្នាប្រកបមុខរបរនេះ ដោយដៃជាលក្ខណ:គ្រួសារ ។ លោកបន្តថា ការជីករករ៉ែត្បូងនៅខេត្តប៉ៃលិន មិនសូវមាននោះទេ ប៉ុន្តែគេមិនទាន់វាយតម្លៃបានថា រ៉ែត្បូងនៅ​ខេត្តប៉ៃលិន អស់ឬនៅច្រើននោះទេ ព្រោះវាជាធនធានធម្មជាតិនៅក្នុងដី និងអាចមាននៅក្នុងតំបន់​ព្រៃភ្នំមួយចំនួន ព្រោះមិនទាន់មានក្រុមហ៊ុនណាមួយមកសិក្សាស្រាវជ្រាវនៅឡើយទេ ។

សូមបញ្ជាក់ថា ប៉ៃលិន ជាខេត្ត នៅជាប់នឹងព្រំដែនកម្ពុជា-ថៃ ស្ថិតនៅភាគពាយព្យ នៃប្រទេសកម្ពុជា ជាតំបន់ខ្ពង់រាប ត្រូវបានគេចាត់ទុកជាខេត្ត ដែលសំបូរទៅ ដោយធនធានរ៉ែធម្មជាតិ ជាច្រើនប្រភេទ ពិសេសខេត្តនេះ ត្រូវបានគេហៅ​ឈ្មោះថាជា «ខេត្តត្បូងពេជ្រ»៕ អត្ថបទ សេង សុវណ្ណារិទ្ធ