ព័ត៌មានជាតិ

ពលរដ្ឋនៅឃុំអូរសោម ខេត្តពោធិ៍សាត់ ទទួលបានសមិទ្ធផលផ្លូវបេតុង៦ខ្សែ

បានផុស

៤ years មុន

នៅ

ថ្ងៃអាទិត្យ ២៧ វិច្ឆិកា ២០២២

ដោយ

លោក ខូយ រីដា អភិបាលនៃគណៈអភិបាលខេត្តពោធិ៍សាត់ បើកសម្ពោធការដ្ឋានផ្លូវចាក់បេតុង៦ខ្សែជូនប្រជាពលរដ្ឋឃុំអូរសោមនាថ្ងៃទី២៧ ខែវិចិ្ឆកា ឆ្នាំ២០២២នេះ នៅសាលាបឋមសិក្សាអូរសោម ស្ថិតក្នុងភូមិឃុំអូសោម ស្រុកវាលវែង ខេត្តពោធិ៍សាត់។ ពិធីបើកសម្ពោធនេះមានការចូលរួមពីលោកបណ្ឌិត ទី ថានី អនុប្រធានទី១ អាជ្ញាធរអគ្គិសនីកម្ពុជា និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកវាលវែង លោក លោកជំទាវ អភិបាលរងខេត្ត មន្ទីរអង្គភាពជុំវិញខេត្ត និងអាជ្ញាធរស្រុកព្រមទាំងប្រជាពលរដ្ឋចំនួន៥០០គ្រួសារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ខូយ រីដា បានមានប្រសាសន៍ថា នេះជាសមិទ្ធផលថ្មីស្រឡាងមួយបន្ថែមទៀតសម្រាប់ឃុំអូរសោមនេះ ដែលមានសំណាងជាងឃុំដទៃទូទាំងខេត្តពោធិ៍សាត់ ដែលជាកញ្ចប់ថវិការដ្ឋបាលខេត្ត ចាប់ផ្ដើមបើកសម្ពោធការដ្ឋានផ្លូវចាក់បេតុងនេះឡើង ចំនួន៦ខ្សែ ប្រវែង២៨គីឡូម៉ែត ដោយតភ្ជាប់គ្នាពីភូមិទៅមួយក្នុងឃុំអូរសោមនេះ ងាយស្រួលដល់បងប្អូនប្រជាពលរដ្ឋដែលចរាចរណ៍ទៅមកក្នុងតំបន់ និងដឹកដំណាំកសិផលយកទៅលក់នៅទីផ្សារ។ ជាមួយគ្នានោះដែរ លោកអភិបាលនៃគណៈអភិបាលខេត្តបានក្រើនរំលឹកដល់ពលរដ្ឋឲ្យចូលរួមគ្នាថែរក្សាសម្បត្តិធម្មជាតិព្រៃឈើនៅតំបន់នេះកុំឱ្យមានភ្លើងឆាបឆេះ និងការកាប់រានយកដីព្រៃជាដើម។

ជាចុងក្រោយលោកក៏មានចែកជូននូវសារ៉ុងម្នាក់មួយនិងបានផ្ដាំផ្ញើដល់ប្រជាពលរដ្ឋឱ្យទៅធ្វើអត្តសញ្ញាណប័ណ្ណដើម្បីចុះឈ្មោះបោះឆ្នោតឲ្យបានគ្រប់ៗគ្នា៕

អត្ថបទ៖ លាន គ្រន