ប្លែកមែន! បុរសម្នាក់ ចាយលុយ២ម៉ឺនដុល្លារ​ សង់ផ្ទះម៉ូដដូចយន្តហោះទៅតាមក្តីស្រមៃរបស់ខ្លួន

បុរសពោះម៉ាយកូន៣ដែលជាអតីតជាងសំណង់ជិត៣០ឆ្នាំ និងបច្ចុប្បន្នជាអ្នកលក់ផលិតផល​ បានសម្រេចនូវក្តីស្រមៃរបស់ខ្លួន​តាំងពីយូរមកហើយ គឺសាងសង់ផ្ទះម៉ូដដូចយន្តហោះឲ្យប្លែកពីគេ​។ បច្ចុប្បន្ននេះ ប្រជាពលរដ្ឋ និងអ្នកនិយមលេងបណ្តាញសង្គម បានសម្រុកនាំគ្នាចូលទៅទស្សនាផ្ទះម៉ូដយន្តហោះយ៉ាងច្រើនកុះករ។

ម្ចាស់ផ្ទះចម្លែកពីគេមានឈ្មោះ ច្រាច់ ពៅ អាយុ ៤៣ឆ្នាំ ជាអ្នកដើមកំណើតនៅខេត្តសៀមរាប។ លោកមានកូនប្រុសម្នាក់ និង កូនស្រី ២ នាក់ក្នុងបន្ទុក ហើយភរិយារបស់លោកបានទទួលមរណភាពតាំងពីឆ្នាំ២០១៣ មកម្លេះ។ លោក ច្រាច់ ពៅ បានឲ្យដឹងនៅព្រឹកថ្ងៃទី២៩ ខែមករា ឆ្នាំ២០២៣នេះថា​ លោកបានចាប់ផ្តើមសាងសង់ផ្ទះម៉ូដដូចយន្តហោះនេះ ដោយធ្វើអំពីស៊ីម៉ង់ ដែលមានកំពស់២ពីម៉ែត្រ។ ផ្ទះនេះ បានចាប់ផ្តើមសាងសង់នៅអំឡុងខែមីនា ឆ្នាំ២០២២ ហើយបានសាងសង់រួចរាល់នាដើមខែមករា ឆ្នាំ ២០២៣នេះ។ លោកបន្តថា ផ្ទះយន្តហោះរបស់លោកនេះ មានបន្ទប់គេងចំនួន២ បន្ទប់ទឹកចំនួន២ និងប្រើប្រាស់ ទឹកអណ្តូងស្នប់។ ផ្ទះរបស់លោកមានទីតាំង ស្ថិតនៅក្នុងភូមិព្នៅ សង្កាត់សំបួរ ក្រុងសៀមរាប ខេត្តសៀមរាប។  លោក ច្រាច់ ពៅ បានចំណាយថវិកាអស់២ម៉ឺនដុល្លារដែលជាលុយលោកបានខិតខំសន្សំជាច្រើនឆ្នាំមកហើយសាងសង់ផ្ទះម៉ូដយន្តហោះនេះ។

អាជ្ញាធរខេត្តសៀមរាប បានលើកឡើងថា ការសាងសង់ផ្ទះបែបនេះ គឺជាការទាក់ទាញដល់អ្នកទស្សនាមួយបែបដែរ។​ យ៉ាងណាក៏ដោយ ជាមួយនឹងសំណង់ដ៏ស្រស់ស្អាតនេះ ប្រជាពលរដ្ឋ និងអ្នកនិយមលេងបណ្តាញសង្គម បានសម្រុកនាំគ្នាចូលទៅទស្សនាយ៉ាងច្រើនកុះករ និងបានកោតសរសើរពីស្នាដៃដែលកម្រប្រទះឃើញនៅក្នុងប្រទេស៕

ដោយ៖ កុសល