តំបន់ Pub Street ក្រុងសៀមរាប ជាប់ចំណាត់ថ្នាក់ទី២ ជាផ្សាររាត្រីដ៏ទាក់ទាញនៅទូទាំងពិភពលោក

គេហទំព័រ TravelBag របស់ចក្រភពអង់គ្លេស បានផ្តល់ចំណាត់ថ្នាក់លេខ២ ដល់ផាប់ស្ទ្រីត (Pub Street) ស្ថិតនៅក្រុងខេត្តសៀមរាប ក្នុងចំណោមគោលដៅផ្សាររាត្រីកំពូលៗនៅទូទាំងពិភពលោក។

គេហទំព័រ TravelBag បញ្ជាក់ថា ការផ្តល់ចំណាត់ថ្នាក់លេខ២នេះ គឺតាមរយៈការបោះឆ្នោតពីភ្ញៀវទេសចរអន្តរជាតិរាប់លាននាក់ ដែលធ្លាប់មកលេងកម្សាន្ត នៅផាប់ស្រ្តីត ខេត្តសៀមរាប។ TravelBag បន្តថា ផ្សាររាត្រីនៅតំបន់ផាប់ស្រ្តីត បានផ្តល់ជូនអ្នកធ្វើដំណើរនូវការលាយបញ្ចូលគ្នារវាងការកម្សាន្តពេលរាត្រីដ៏អ៊ូអរ ជាមួយម្ហូបអាហារតាមដងផ្លូវ និងវប្បធម៌ក្នុងតំបន់ដ៏សម្បូរបែប បន្ទាប់ពីអ្នកទេសចរអន្តរជាតិចំណាយពេលពេញមួយថ្ងៃ ស្វែងយល់ពីអច្ឆរិយភាពនៅតំបន់រមណីយដ្ឋានអង្គរ។

ក្រៅពីបរិយាកាសដ៏សម្បូរបែបនេះ Pub Street ក៏ត្រូវបានគេចាត់ទុកថា មានសុវត្ថិភាព និងងាយស្រួលសម្រាប់អ្នកទេសចរគ្រប់ជាតិសាសន៍។

តាមរយៈការធ្វើចំណាត់ថ្នាក់របស់ TravelBag បានឆ្លុះបញ្ចាំងថា Pub Street មិនត្រឹមតែជាគោលដៅទេសចរណ៍មួយដែលល្បីតែនៅក្នុងខេត្តសៀមរាបប៉ុណ្ណោះទេ ប៉ុន្តែថែមទាំងត្រូវបានគេទទួលស្គាល់ថា ជាទីផ្សារអន្តរជាតិដ៏ទូលំទូលាយមួយ ដែលអូសទាញភ្ញៀវទេសចរមកកម្សាន្តរាប់លាននាក់មកកាន់ប្រទេសកម្ពុជានៅក្នុង១ឆ្នាំ៕

អត្ថបទ៖ ជុន កុសល