ព័ត៌មានជាតិ

ពលរដ្ឋសាទរ ក្រោយផ្លូវតុលាការខេត្តសៀមរាបស្ថាបនារួច សម្រួលការធ្វើដំណើរ

បានផុស

៥ ខែ មុន

នៅ

ថ្ងៃចន្ទ ២ កុម្ភៈ ២០២៦

ដោយ

ផ្លូវ ១ ខ្សែ ប្រវែង ២ គីឡូម៉ែត្រ ទទឹង ៩ ម៉ែត្រ ស្ថិតក្នុងសង្កាត់ជ្រាវ ក្រុងសៀមរាប (ផ្លូវតុលាការ) ដែលរងការខូចខាតជាច្រើនឆ្នាំមកហើយនោះ ត្រូវបានជួសជុលឡើងវិញរួចរាល់ជាស្ថាពរ ក្រោមការយកចិត្តទុកដាក់ពីសំណាក់ លោក ប្រាក់ សោភ័ណ អភិបាលខេត្តសៀមរាប និង អ្នកឧកញ៉ា សៀង ណាំ អ្នកតំណាងរាស្ត្រមណ្ឌលសៀមរាប ដើម្បីសម្រួលដល់ការធ្វើដំណើររបស់ប្រជាពលរដ្ឋ សិស្សានុសិស្ស ក៏ដូចជាភ្ញៀវទេសចរ ជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រជាពលរដ្ឋក្នុងមូលដ្ឋានខាងលើ បានបង្ហាញការសាទរ និង អរគុណដល់អាជ្ញាធរខេត្តសៀមរាប ដែលជួសជុលផ្លូវ ១ ខ្សែនេះ ឡើងវិញ បង្កភាពងាយស្រួលដល់ពួកគាត់ក្នុងការធ្វើដំណើរ ប្រកបអាជីវកម្មនានា ជាពិសេសជួយកាត់បន្ថយការលំបាកប្រចាំថ្ងៃ។ បន្ថែមនោះ អាចជួយលើកកម្ពស់សេដ្ឋកិច្ចក្នុងតំបន់ ខណៈផ្លូវខាងលើនេះ កាលពីមុន មានការខូចខាតខ្លាំង ពិបាកក្នុងការធ្វើដំណើរ ជាពិសេសក្នុងរដូវវស្សាផ្ដល់ការលំបាក និងបង្កឲ្យមានគ្រោះថ្នាក់ចរាចរណ៍ថែមទៀតផង។

លោក ក្អោប រ៉ន ចៅសង្កាត់ជ្រាវ បានថ្លែងអំណរគុណដល់លោក ប្រាក់ សោភ័ណ និង អ្នកឧកញ៉ា សៀង ណាំ ដែលយកចិត្តទុកដាក់ខ្ពស់ពីសុខទុក្ខពលរដ្ឋក្នុងមូលដ្ឋាន និងបានជួសជុលផ្លូវ ១ ខ្សែ នេះ ជាសរសៃឈាមសេដ្ឋកិច្ចរបស់ពលរដ្ឋក្នុងការដឹកកសិផលទៅកាន់ទីផ្សារ និងការធ្វើដំណើរឆ្លងកាត់ ជាពិសេសភ្ញៀវទេសចរ។

ទន្ទឹមនោះ លោកក៏បានអំពាវនាវដល់ប្រជាពលរដ្ឋ សូមចូលរួមថែរក្សាផ្លូវនេះឲ្យបានគង់វង្ស យូរអង្វែង និងមិនត្រូវដឹកទំនិញលើសទម្ងន់កំណត់ឡើយ។

ជាមួយនេះ លោកចៅសង្កាត់ជ្រាវ ក្រុងសៀមរាប ក៏បានបញ្ជាក់ថា អាជ្ញាធរសង្កាត់ នឹងធ្វើការប្រជុំជាមួយប្រជាពលរដ្ឋ ដើម្បីរៀបចំសណ្ដាប់ធ្នាប់នៅតាមបណ្ដោយដងផ្លូវនេះ ឲ្យមានសោភ័ណភាព និងដាក់ភ្លើងសូឡាបំភ្លឺផ្លូវនៅពេលយប់ថែមទៀតផង៕

អត្ថបទ ៖ គឿនវេត