ព័ត៌មានជាតិ

សហភាពអឺរ៉ុប អាចនឹងផ្ដល់ប្រព័ន្ធអនុគ្រោះពន្ធ EBA ២០% ដល់កម្ពុជាវិញ

បានផុស

៣ years មុន

នៅ

ថ្ងៃអង្គារ ៧ កុម្ភៈ ២០២៣

ដោយ

សហភាពអឺរ៉ុប អាចនឹងផ្ដល់ប្រព័ន្ធអនុគ្រោះពន្ធ EBA ប្រមាណ ២០% ដែលបានព្យួរនាពេលកន្លងទៅ មកឱ្យកម្ពុជាវិញ។ នេះបើតាមការបង្ហើបឲ្យដឹងរបស់លោកបណ្ឌិតសភាចារ្យ សុក ស៊ីផាន់ណា ទីប្រឹក្សាជាន់ខ្ពស់រាជរដ្ឋាភិបាលកម្ពុជានៅក្នុងក្នុងកម្មវិធីធ្វើបាឋកស្តីពី«ការធ្វើសេចក្ដីសង្ខេបស្ដីពីកម្ពុជាក្នុងនាមជាប្រធានអាស៊ាន៖ សមិទ្ធផល និងបញ្ហាប្រឈម»នៅរាជបណ្ឌិត្យសភាកម្ពុជា កាលពីពេលថ្មីៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុក ស៊ីផាន់ណា បានមានប្រសាសន៍ថា ចំពោះប្រព័ន្ធអនុគ្រោះពន្ធ EBAរបស់ប្រទេសកម្ពុជា គឺរូបលោកបានទៅសហភាពអឺរ៉ុបជាច្រើន ច្រើនសារ ដើម្បីជជែកចរចាដោយផ្ទាល់ជាមួយគណៈកម្មការអឺរ៉ុប។ យ៉ាងណាក៏ដោយ ក្រោមការខិតខំប្រឹងប្រែងឡើងចុះទៅមករបស់លោកអស់រយៈពេល ២ឆ្នាំ គឺចុងបញ្ចប់ សហភាពអឺរ៉ុប បានសម្រេចព្យួរប្រព័ន្ធអនុគ្រោះពន្ធពីកម្ពុជាប្រមាណ២០% ប៉ុណ្ណោះ ។

លោកបានគូសបញ្ជាក់ថា៖ «បន្ទាប់ពីការកាត់ពន្ធរបស់សហភាពអឺរ៉ុបមកលើកម្ពុជា ត្រឹម១ខែ ជំងឺកូវីដ១៩ បានមកដល់ ដូច្នេះ ឥទ្ធិពលនៃការកាត់ពន្ធ ២០% ហាក់គ្មានន័យ ដែលចាត់ទុកថា ជាសំណាងរបស់ប្រទេសកម្ពុជា ព្រោះសហភាពអឺរ៉ុប មិនបានលើកមកនិយាយពីពន្ធទាំងអស់នោះ ដោយហេតុថា កូវីដ ១៩ បានគ្រប់ដណ្ដប់ប្រទេសទាំងមូល»។

បន្ថែមពីនេះ ក្រោយបរិបទនៃជំងឺកូវីដ ១៩ លោក សុក ស៊ីផាន់ណា បានលើកឡើងថា សហភាពអឺរ៉ុប និងកម្ពុជា នៅតែបង្ហាញពីភាពទន់ភ្លន់ និងការគោរពចំពោះគ្នាទៅវិញទៅមក។ ក្រៅពីសហភាពអឺរ៉ុប លោក សុក ស៊ីផាន់ណា ក៏បានអះអាងថា កម្ពុជានៅតែរក្សាទំនាក់ទំនងល្អជាមួយអាមេរិក ព្រោះទីផ្សារអាមេរិកមានសារៈសំខាន់ខ្លាំងសម្រាប់កម្ពុជា៕

ដោយ៖ ថារី