ក្រសួងការងារនឹងជួយបណ្តុះបណ្តាលមុខជំនាញផ្សេងៗទៀតជូនដល់កងទ័ព

លោក ហេង សួរ រដ្ឋលេខាធិការក្រសួងការងារនិងបណ្តុះបណ្តាលវិជ្ជាជីវៈ បានមានប្រសាសន៍ថា ក្រសួងការងារនឹង​ជួយ​បណ្តុះបណ្តាលមុខជំនាញផ្សេងៗទៀតជូនដល់កងទ័ពតាមវិទ្យាស្ថានក្រោមឱវាទក្រសួងដើម្បីយកទៅប្រើប្រាស់ជាប្រយោជន៍រួម និងចែករំលែកនូវចំណេះដឹង និងជំនាញទាំងនេះជាមួយសហការីនៅតាមមូលដ្ឋានកងទ័ពរបស់ខ្លួន។

ថ្លែងក្នុងពិធីប្រគល់វិញ្ញាបនបត្របញ្ចប់វគ្គបណ្តុះបណ្តាលជំនាញវិទ្យុទាក់ទង និងដំឡើងប្រព័ន្ធអង់តែនជូនដល់នាយទាហាន នាយទាហានរង និងពលទាហានចំណុះកងទ័ពជើងគោក នៅព្រឹកថ្ងៃទី១០ ខែកុម្ភៈ ឆ្នាំ២០២៣ នៅវិទ្យាស្ថានជាតិពហុបច្ចេកទេសកម្ពុជា លោក ហេង សួរ បានបន្តថា ដោយមើលឃើញនូវសក្តានុពលនៃកិច្ចសហប្រតិបត្តិក្នុងក្របខណ្ឌរវាងកងទ័ព និងស្ថាប័នស៊ីវិល វិស័យឯកជន ក្រោមរូបភាពសម្ព័ន្ធមេត្រីភាព ដែលកន្លងមកបាន និងកំពុងចូលរួម​ជួយឧបត្ថម្ភគាំទ្រយ៉ាងច្រើនជាថវិកា សម្ភារៈ មធ្យោយបាយ។ល។ ដល់បណ្តាអង្គភាពកងទ័ព ប្រកបដោយជោគជ័យក៏ដោយ ក៏លោកបណ្ឌិតឧត្តមសេនីយ៍ឯក ហ៊ុន ម៉ាណែត បានផ្តួចផ្តើមគំនិតថា នៅមានការងារជាច្រើនទៀតដែលយើងអាចរួមគ្នាជួយដល់កងទ័ពក្រៅពីការផ្តល់ជាថវិកា សម្ភារ ឬមធ្យោបាយ តែយើងអាចជួយពួកគាត់បន្ថែមលើសពីនេះទៀត
ហើយដែលអាចទទួលបានផលយូរអង្វែង និងមាននិរន្តភាពដូចជាការផ្តល់ការបណ្តុះបណ្តាលជំនាញវិជ្ជាជីវៈ ជូនដល់កងទ័ពជាដើមដែលពួកគាត់មិនត្រឹមតែអាចយកចំណេះដឹងទៅជួយអង្គភាពគាត់ប៉ុណ្ណោះទេតែអាចជាទុនសម្រាប់ពួកគាត់នាពេលអនាគតទៀតផង។

លោក ហេង សួរ បានបន្តថា ក្រសួងពិតជារីករាយក្នុងការចូលរួមសហការជាមួយបណ្តាអង្គភាពកងទ័ពដើម្បីចូល​រួមអនុវត្តជាដំណាក់ៗ ឱ្យបានជោគជ័យទៅតាមគំនិតផ្តួចផ្តើមដ៏ខ្ពង់ខ្ពស់របស់លោកបណ្ឌិតឧត្តមសេនីយ៍ឯក ហ៊ុន ម៉ាណែត។
លោក ហេង សួរ បានបញ្ជាក់ថា ក្រៅពីវគ្គបណ្តុះបណ្តាលដែលបានបិទវគ្គបញ្ចប់ថ្ងៃនេះ ក៏មានការបណ្តុះបណ្តាលលើមុខជំនាញផ្សេងៗទៀតជូនដល់កងទ័ពតាមវិទ្យាស្ថានក្រោមឱវាទក្រសួងការងារ និងបណ្តុះបណ្តាលវិជ្ជាជីវៈ ទូទាំងប្រទេស ដែលបច្ចុប្បន្នក្រសួងការងារ និងបណ្តុះបណ្តាលវិជ្ជាជីវៈ មាន ៣៧គ្រឹះស្ថានសិក្សា។

គួរបញ្ជាក់ថា វគ្គបណ្តុះបណ្តាលជំនាញវិទ្យុទាក់ទង និងដំទ្បើងប្រព័ន្ធអង់តែនជូនដល់នាយទាហាន នាយទាហានរង
និងពលទាហានចំណុះកងទ័ពជើងគោក បានប្រព្រឹត្តឡើងក្នុងរយៈពេល ២ខែ ហើយបញ្ចប់ដោយជោគជ័យកាលពីថ្ងៃទី០៩ ខែកុម្ភៈ ឆ្នាំ២០២៣ មានសិក្ខាកាមចូលរួម ៧៤នាក់ មកពី២១កងឯកភាពនៃកងទ័ពជើងគោកនៅទូទាំងប្រទេស៕

អត្ថបទ៖ សំអឿន