ព័ត៌មានជាតិ

ការបោះបង្គោលព្រំដែនក្នុងខេត្តមណ្ឌលគិរី សេសសល់ចំណុចតិចតួច កំពុងជំរុញដោះស្រាយបន្ត

បានផុស

៣ years មុន

នៅ

ថ្ងៃព្រហស្បតិ៍ ៦ មេសា ២០២៣

ដោយ

ឆ្លើយតបទៅសំនួររបស់កម្ពុជាថ្មីពីកិច្ចការបោះបង្គោលព្រំដែនរវាងកម្ពុជាវៀតណាមក្នុងភូមិសាស្រ្តខេត្តមណ្ឌលគិរី លោក ស៊ន សារុន អភិបាលរងខេត្តមណ្ឌលគិរីបានបញ្ជាក់ថា ការបោះបង្គោលព្រំដែនរវាងកម្ពុជាវៀតណាមក្នុងភូមិសាស្រ្តខេត្តមណ្ឌលគិរីនៅសេសសល់ចំណុចតិចតួចមួយចំនួនទៀត ខណៈគណៈកម្មការចម្រុះកិច្ចការព្រំដែនកំពុងជំរុញដោះស្រាយបន្តទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសន្និសីទជោគជ័យរបស់រដ្ឋបាលខេត្តមណ្ឌលគិរីនៅទីស្តីគណៈរដ្ឋមន្រ្តីនៅព្រឹកមិញនេះ លោក ស៊ន សារុន អភិបាលរងខេត្តមណ្ឌលគិរីបានឲ្យដឹងថា ក្នុងប្រវែងព្រំដែនសរុបជាង ៣០០ គីឡូម៉ែត្រ ការបោះបង្គោលព្រំដែនក្នុងភូមិសាស្រ្តខេត្តមណ្ឌលគិរីចំណុចខ្លះមិនទាន់មានការឯកភាពគ្នានៅឡើយ គឺនៅភូមិសាស្ត្រឃុំដាក់ដាំចាប់ពីបង្គោលលេខ ៥៦ ដល់ ៦០ ខណៈដែលគណៈកម្មការចម្រុះកិច្ចការព្រំដែនកំពុងជំរុញដោះស្រាយជាមួយភាគីប្រទេសវៀតណាមបន្តទៀត។

លោកបានអះអាងថា កិច្ចការបោះបង្គោលព្រំដែនជាភារកិច្ចរបស់គណៈកម្មការចម្រុះព្រំដែន ហើយរដ្ឋបាលខេត្តបានត្រឹមជាអ្នកសម្របសម្រួលតែប៉ុណ្ណោះ។

ខេត្តមណ្ឌលគិរីស្ថិតនៅភូមិភាគឦសានមានចម្ងាយ ៣៨២ គីឡូម៉ែត្រពីរាជធានីភ្នំពេញ។ ខេត្តមណ្ឌលគិរីមានព្រំប្រទល់ជាប់ខេត្តចំនួន ៣ របស់ប្រទេសវៀតណាមគឺ ខេត្តដាក់ឡាក់ ដាក់ណុង និងខេត្តប៊ិញភឿកសរុបប្រវែង ៣១៤.៦៦៤ គីឡូម៉ែត្រ។

ខេត្តទេសចរណ៍ភាគឦសាននេះ មានច្រកទ្វារព្រំដែនទ្វេភាគីសំខាន់ៗចំនួន ០៣ ជាមួយប្រទេសវៀតណាមក្នុងនោះមាន៖ ច្រកទ្វារទ្វេភាគីឡាប៉ាខេ នៅស្រុកកែវសីមា ច្រកទ្វារទ្វេភាគីដាក់ដាំនៅស្រុកអូររាំង និងច្រកទ្វារទ្វេភាគីណាំលៀរ នៅស្រុកពេជ្រាដា។ ដោយឡែកច្រកទ្វារជីមៀត ក្នុងស្រុកកោះញែក មិនទាន់ដំណើរការនៅឡើយ ព្រោះមិនទាន់មានហេដ្ឋារចនាសម្ព័ន្ធ។

គួរបញ្ជាក់ថា ខេត្តមណ្ឌលគិរីមានពលរដ្ឋសរុបចំនួន ៩៧ ៥៦២នាក់ ដែលភាគច្រើនជាជនជាតិដើមភាគតិចមានចំនួនស្មើ ៥៥% នៃប្រជាជនក្នុងខេត្តសរុប ក្នុងនោះមាន ៨ អំបូរជនជាតិមាន ព្នង ក្រោល គ្រឹង ស្ទៀង ទំពួន ចារាយ ថុន និងកួយ។ ប្រជាពលរដ្ឋមានមុខរបរចម្បងគឺកសិកម្មមានចំនួន ៨២% សិប្បកម្មចំនួន ១% និងសេវាកម្មចំនួន ១៧%៕