គ.ជ.ប សម្រេចទទួលស្គាល់អ្នកសង្កេតការណ៍ជាតិ មកពីសហភាពសហព័ន្ធយុវជនកម្ពុជាខេត្តស្វាយរៀងជាង ២ពាន់នាក់

មន្ត្រីជាន់ខ្ពស់ នៃគណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា ក្នុងរយៈពេល ១៨ថ្ងៃកន្លងមកនេះ គ.ជ.ប បានសម្រេចទទួលស្គាល់អ្នកសង្កេតការណ៍ជាតិ មកពីសហភាពសហព័ន្ធយុវជនកម្ពុជាខេត្តស្វាយរៀងជាង ២ពាន់នាក់។ រីឯអ្នកសង្កេតការណ៍មកពីអង្គការខុមហ្វ្រែលជាង ១ពាន់នាក់ទៀត គ.ជ.ប បាននិងកំពុងពិនិត្យ។

លោក សោម សូរីដា អគ្គលេខាធិការរង និងជាអ្នកនាំពាក្យ គ.ជ.ប មានប្រសាសន៍ប្រាប់កម្ពុជាថ្មី នៅថ្ងៃទី ១៨ ខែមេសានេះថា គ.ជ.ប បានសម្រេចទទួលស្គាល់អ្នកសង្កេតការណ៍ជាតិ មកពីសហភាពសហព័ន្ធយុវជនកម្ពុជាខេត្តស្វាយរៀងជាង ២ពាន់នាក់ ​បើគិតត្រឹមថ្ងៃទី ១៨ ខែមេសា ឆ្នាំ ២០២៣នេះ។ ចំណែកអ្នកសង្កេតការណ៍ជាតិ មកពីអង្គការខុម ហ្វ្រែលជាង ១ពាន់នាក់ គ.ជ.ប បាននិងកំពុងពិនិត្យ។

លោក សោម សូរីដា ឲ្យដឹងបែបនេះថា «សម្រាប់អ្នកសង្កេតការណ៍ គ.ជ.ប បានពិនិត្យសម្រេចទទួលស្គាល់អ្នកសង្កេតការណ៍ មកពីសហភាពសហព័ន្ធយុវជនកម្ពុជាខេត្តស្វាយរៀង ដែលបានដាក់ស្នើសុំអ្នកសង្កេតការណ៍ចំនួន ២,៨៣៣ នាក់ ហើយ គ.ជ.ប បានពិនិត្យសម្រេចរួចហើយ ចំណែកឯអ្នកសង្កេតការណ៍ ដែលបានមកដាក់តាមរយៈអង្គការខុម ហ្វ្រែល គឺកំពុងតែពិនិត្យ»។

អ្នកនាំពាក្យ គ.ជ.ប បានបញ្ជាក់ទៀតថា មកដល់ថ្ងៃទី ១៨ ខែមេសានេះ មានតែអង្គការ-សមាគមតែ ២ប៉ុណ្ណោះ បានដាក់ពាក្យស្នើសុំចុះឈ្មោះអ្នកសង្កេតការណ៍ ដើម្បីចូលរួមសង្កេតការណ៍ក្នុងដំណើរការនៃការរៀបចំការបោះឆ្នោតជ្រើសតាំងតំណាងរាស្ត្រ នីតិកាលទី ៧ ឆ្នាំ ២០២៣នេះ។ អង្គការ-សមាគមទាំង ២នោះ គឺសហភាពសហព័ន្ធយុវជនកម្ពុជាខេត្តស្វាយរៀង និងអង្គការខុមហ្វ្រែល។

សូមជម្រាបថា កាលពីថ្ងៃទី ១ ខែមេសា ឆ្នាំ ២០២៣កន្លងទៅនេះ គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសចាប់ផ្តើមទទួលពាក្យសុំចុះឈ្មោះ អ្នកសង្កេតការណ៍ជាតិ-អន្តរជាតិ ដើម្បីចូលរួមសង្កេតការណ៍ក្នុងដំណើរការ នៃការរៀបចំការបោះឆ្នោតជ្រើសតាំងតំណាងរាស្ត្រ នីតិកាលទី ៧ ឆ្នាំ ២០២៣។

យោងតាមប្រតិទិន នៃការបោះឆ្នោតជ្រើសតាំងតំណាងរាស្ត្រ នីតិកាលទី ៧ ឆ្នាំ ២០២៣ កាលបរិច្ឆេទ នៃការចុះឈ្មោះអ្នកសង្កេតការណ៍ជាតិ ត្រូវបញ្ចប់ត្រឹមថ្ងៃទី ១២ ខែកក្កដា និងថ្ងៃទី ១៩ ខែកក្កដា ឆ្នាំ ២០២៣ សម្រាប់អ្នកសង្កេតការណ៍អន្តរជាតិ៕

អត្ថបទ៖ ឃួន សុភ័ក្រ