លោកស្រី ធី សុវណ្ណថា ត្រូវបានតែងតាំងជាអភិបាលរងក្រុងអរិយក្សត្រ ដែលជាក្រុងទើបបង្កើតថ្មី

លោកស្រី ធី សុវណ្ណថា ត្រូវបានតែងតាំងជាអភិបាលរងក្រុងអរិយក្សត្រ ដែលជាក្រុងទើបបង្កើតថ្មី នៃខេត្តកណ្ដាល។ យោងតាមប្រកាសរបស់ក្រសួងមហាផ្ទៃ កាលពីថ្ងៃទី ៧ ខែមេសា ឆ្នាំ ២០២៣ បានសម្រេចថា លោកស្រី ធី សុវណ្ណថា ឋានន្តរស័ក្ដិនាយក្រមការ ថ្នាក់លេខ ៥ ជាអភិបាលរង នៃគណៈអភិបាលក្រុងអរិយក្សត្រ។

សូមជម្រាបថា លោកស្រី ធី សុវណ្ណថា កាលពីអំឡុងឆ្នាំ ២០១៣ ធ្លាប់ជាសកម្មជនល្បីឈ្មោះមួយរូប នៃអតីតគណបក្សប្រឆាំង តែក្រោយមកលោកស្រីក៏បានចូលរួមជីវភាពនយោបាយ ជាមួយគណបក្សប្រជាជនកម្ពុជាមកទល់នឹងពេលបច្ចុប្បន្ននេះ។

កាលពីថ្ងៃទី ២៣ ខែធ្នូ ឆ្នាំ ២០២២ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បា​នចេញអនុក្រឹត្យបង្កើតក្រុងអរិយក្សត្រ នៃខេត្តកណ្ដាល ដោយកាត់យកឃុំចំនួន ៦ ពីស្រុកខ្សាច់កណ្ដាល។

ចំណែកកាលពីថ្ងៃទី ៦ ខែមេសា ឆ្នាំ ២០២៣ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានចេញអនុក្រឹត្យតែងតាំងលោក ចាន់ តារា ឋានន្តរស័ក្តិឧត្ដមមន្ត្រី ថ្នាក់លេខ ៥ ជាអភិបាលក្រុងអរិយក្សត្រ៕