ក្រសួងមហាផ្ទៃតែងតាំងលោកស្រី សៅ សុភ័ណ ជាអភិបាលរងក្រុងអរិយក្សត្រ

រដ្ឋមន្រ្តីក្រសួងមហាផ្ទៃ បានសម្រេចតែងតាំងលោកស្រី សៅ សុភ័ណ ជាអភិបាលរងក្រុងអរិយក្សត្រ ខេត្តកណ្ដាល ដើម្បីជំនួសអ្នកនាង ធី សុវណ្ណថា ដែលត្រូវបានបញ្ចប់មុខតំណែងកាលពីពេលកន្លងទៅ។

យោងតាមប្រកាសរបស់លោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ ចុះថ្ងៃទី២៧ ខែវិច្ឆិកា ឆ្នាំ២០២៥ ដែលចេញផ្សាយនៅចុងសប្ដាហ៍នេះ ត្រូវបានតែងតាំងលោកស្រី សៅ សុភ័ណ ឋានន្តរស័ក្តិអនុមន្ត្រី ថ្នាក់លេខ២ ឱ្យកាន់មុខតំណែងជាអភិបាលរងនៃគណៈអភិបាលក្រុងអរិយក្សត្រ ខេត្តកណ្តាល។

លោកស្រី សៅ សុភ័ណ មានតួនាទីជានាយករងរដ្ឋបាលសាលាក្រុងអរិយក្សត្រ និងជាអតីតប្រធានការិយាល័យគ្រប់គ្រងធនធានមនុស្ស នៃរដ្ឋបាលស្រុកល្វាឯម។

តំណែងអភិបាលរងក្រុងអរិយក្សត្រពេលនេះ ជាការជំនួសកន្លែងរបស់អ្នកនាង​​ ធី សុវណ្ណថា ដែលត្រូវបានរដ្ឋមន្ត្រីក្រសួងមហាផ្ទៃ ចេញប្រកាសបញ្ចប់មុខតំណែង កាលពីថ្ងៃទី៣ ខែសីហា ឆ្នាំ២០២៥កន្លងទៅ។ ការបញ្ចប់តំណែងអ្នកនាង ធី សុវណ្ណថា ធ្វើឡើងតាមការណែនាំរបស់សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បន្ទាប់ពីអ្នកនាងបានបង្ហោះផ្សព្វផ្សាយព័ត៌មានបំពុល ធ្វើឱ្យប៉ះពាល់ដល់កងទ័ព កំឡុងពេលសង្គ្រាម៥ថ្ងៃរវាងកម្ពុជា និងថៃ។

សម្តេចតេជោ ហ៊ុន សែន ក្នុងនាមជាប្រធានគណបក្សប្រជាជនកម្ពុជា និងប្រធានព្រឹទ្ធសភា កាលពីខែសីហា ឆ្នាំ២០២៥ បានសម្រេចឱ្យបណ្តេញអ្នកនាង ធី សុវណ្ណថា ចេញពីគណបក្ស និងឱ្យរដ្ឋមន្ត្រីមហាផ្ទៃបញ្ចប់តំណែងនាងពីអភិបាលរងក្រុងអរិយក្សត្រ ព្រមទាំងដកក្របខ័ណ្ឌរដ្ឋទាំងអស់៕

អត្ថបទ៖ ធឿន វ៉ាន់សុង