Connect with us

ព័ត៌មានជាតិ

ពលរដ្ឋនៅសងខាងផ្លូវសង្ឃឹមថា ការប្រកបមុខរបរពួកគាត់នឹងល្អប្រសើរវិញ នៅពេលផ្លូវវាងក្រុងកំពតស្ថាបនារួចរាល់

បានផុស

នៅ

ក្រោយពីគម្រោងផ្លូវវាងក្រុងកំពតស្ថាបនាជួសជុលរួចរាល់ នឹងធ្វើឲ្យការប្រកបមុខរបររបស់ប្រជាពល​រដ្ឋនៅសងខាងផ្លូវនោះ មានភាពល្អប្រសើរឡើងវិញ ខណៈបច្ចុប្បន្នស្ថានភាពរកស៊ីរបស់ពួកគាត់មិនសូវល្អប៉ុន្មានទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្លូវវាងក្រុងកំពតនេះ ពេលខែវស្សាមានភ្លៀងធ្លាក់ខ្លាំងធ្វើឲ្យទឹកលិចផ្លូវ និងមានជង្ហក់ភក់ជ្រៅៗ ដោយរថយន្តធំពិបាកធ្វើដំណើរ ហើយរថយន្តតូចមិនអាចធ្វើដំណើរបាន។ ចំណែកដល់ខែប្រាំងមានដីហុយខ្លាំង ដែលនាំឲ្យការប្រកបមុខរបរមួយចំនួនដូចជាអាហារដ្ឋាន និងតូបលក់អ៊ីវ៉ាន់តាមសងខាងផ្លូវត្រូវបិទទ្វារ។

លោក សម សុផល ម្ចាស់ហាងលក់គ្រឿងបន្លាស់រថយន្ត នៅសងខាងផ្លូវវាងក្រុងកំពត និយាយថា ហាងរបស់លោកមួយរយៈកន្លងមកនេះ មិនសូវមានអ្នកចូលជួសជុល ឬទិញគ្រឿងបន្លាស់រថយន្តនោះទេ ដោយសារតែកត្តាផ្លូវថ្នល់មានការពិបាកក្នុងការធ្វើដំណើរ។ យ៉ាងណាក៏ដោយ ទោះបីផ្លូវវាងក្រុងកំពតនេះ ស្ថាបនាជួសជុលមិនទាន់រួចរាល់បាន ១០០ភាគរយ តែលោកសង្កេតឃើញថា ផ្លូវវាងក្រុងកំពត ចាប់ផ្តើមមានសកម្មភាពចរាចរណ៍ច្រើនឡើងវិញ ជាបណ្ដើរៗហើយ។

ប្រជាពលរដ្ឋរស់នៅសងខាងផ្លូវនេះ បានបង្ហាញក្ដីសង្ឃឹមថា​ នៅពេលផ្លូវនេះស្ថាបនាជួសជុលរួចរាល់ហើយនោះ ការធ្វើដំណើរនឹងមានភាពស្រួល ហើយការប្រកបមុខរបរនានារបស់ពួកគាត់ នឹងមានភាពល្អប្រសើរឡើងវិញ។

វិស្វករប្រចាំការដ្ឋានសាងសង់ផ្លូវវាងក្រុងកំពត ឬផ្លូវលេខ ១៣៩A ខេត្តកំពត លោក នាក់ ចិន បានឲ្យដឹងថា ផ្លូវមានប្រវែង ៣,៦៧០ម៉ែត្រ ដែលស្ថាបនាជាផ្លូវ DBST។ ផ្លូវនេះ បានចាប់ផ្តើមបើកការដ្ឋានស្ថាបនាជួសជុលឡើងវិញនៅក្នុងខែមេសា ឆ្នាំ ២០២២ ហើយគ្រោងនឹងបញ្ចប់នៅខែធ្នូ ឆ្នាំ ២០២៣ខាងមុខ។

លោកបានឲ្យដឹងបន្តថា ការស្ថាបនាជួសជុលផ្លូវវាងក្រុងកំពតនេះ ត្រូវគោរពតាមលក្ខណៈបច្ចេកទេសដែលមានការត្រួតពិនិត្យត្រឹមត្រូវ និងធានាគុណភាពជាប់ធន់បានយូរជាងការសាងសង់ពីមុនៗ។

ផ្លូវវាងក្រុងខេត្តកំពត ឬផ្លូវលេខ ១៣៩A ជាផ្លូវសម្រាប់បញ្ចៀសរថយន្តធុនធំ មិនឲ្យបើកបរចូលក្នុងក្រុង ហើយផ្លូវនេះតភ្ជាប់ពីផ្លូវជាតិលេខ ៣ ត្រង់ចំណុចក្លោងទ្វារខេត្ត ឆ្ពោះទៅផ្លូវជាតិលេខ ៣៣ ទៅកាន់ខេត្តកែប៕

អត្ថបទ៖ សឹង រ៉ាត់

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម