ព័ត៌មានជាតិ

ទៅទិញទុរេនដល់ចម្ការនៅជីផាតស្រុកថ្មបាំង តម្លៃខុសពីភ្នំពេញម៉េចដែរ?

បានផុស

២ years មុន

នៅ

ថ្ងៃពុធ ២៨ មិថុនា ២០២៣

ដោយ

នៅឃុំជីផាតស្រុកថ្មបាំងមានចម្ការទុរេនរបស់កសិកររាប់រយហិកតា ដាំដុះដោយធម្មជាតិ។ ចំពេលដល់រដូវប្រមូលផលផងនោះ តាមផ្ទះរបស់ពលរដ្ឋក្នុងភូមិមានដាក់លក់ទុរេនជាហូរហែសម្រាប់ភ្ញៀវទេសចរដែលចង់សាករសជាតិទុរេនដ៏ល្បីប្រចាំតំបន់នៅស្រុកថ្មបាំងក្នុងខេត្តកោះកុង។

ពលរដ្ឋដែលដាំដំណាំទុរេនបានឲ្យដឹងថា នៅឆ្នាំនេះទុរេនមិនសូវបានផល ផ្លែជ្រុះច្រើនដោយសារអាកាសធាតុក្តៅ។ ទោះបីផលធ្លាក់ចុះ តែតម្លៃក៏មិនសូវខុសគ្នាពីឆ្នាំមុនប៉ុន្មានដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ម្ចាស់ចម្ការទុរេនអ្នកស្រី ថាំង ស៊ីណាត រស់នៅភូមិជាំស្លា ឃុំជីផាត ស្រុកថ្មបាំងតាមផ្លូវទៅទឹកធ្លាក់ឆាយខ្ពស់បានឲ្យដឹងថា នៅឆ្នាំនេះទុរេនមិនសូវបានផលច្រើនដូចឆ្នាំមុនៗ ដោយសារអាកាសធាតុក្តៅ ផ្លែជ្រុះច្រើន។

អ្នកស្រី ថាំង ស៊ីណាត ដែលបានដាំទុរេនរយៈពេលជាង ១០ ឆ្នាំ នៅលើផ្ទៃដីជាង ១ ហិកតាឲ្យដឹងថា តម្លៃទុរេននៅឆ្នាំនេះថោកជាងឆ្នាំមុនបន្តិច។ ទុរេនម៉ាន់ថងគាត់លក់បានតម្លៃ ១ គីឡូ ២០ ០០០ រៀល។

អ្នកស្រីបន្តថា ដើមទុរេនរបស់គាត់ដាំដោយប្រើជីធម្មជាតិ មិនប្រើជីគីមីបំប៉នដើមឲ្យឆាប់ធំនោះទេ។

ក្រៅពីពូជម៉ាន់ថង មានកសិករមួយចំនួនដាំពូជទុរេនឪខាក់តែតម្លៃមិនសូវបានថ្លៃ ហើយក៏មិនសូវមានការពេញនិយមដែរ។

ម្ចាស់ចម្ការទុរេនមួយរូបទៀតនៅឃុំជីផាតបានឲ្យដឹងថា ពូជឪខាក់មិនសូវមានអ្នកនិយមចូលចិត្ត តម្លៃវិញថោកជាងពូជម៉ាន់ថង។

បើតាមស្រ្តីវ័យជាង ៦០ ឆ្នាំ អាចលក់ទុរេនពូជម៉ាន់ថងបានក្នុងមួយគីឡូ ១៨ ០០០ រៀល ខណៈឪខាក់គាត់លក់បានត្រឹម ១០ ០០០ រៀល ក្នុងមួយគីឡូនៅឆ្នាំនេះ ដោយសារផ្លែអត់សូវល្អសម្បកក្រាស់ពេក។

តាមការសាកសួរនៅតំបន់ជីផាតឃើញថា តម្លៃលក់ខុសគ្នាបន្តិចបន្តួចដូចជាម៉ាន់ថងចន្លោះពី ១៧ ០០០ រៀលទៅ ២០ ០០០ រៀលក្នុងមួយគីឡូ អាស្រ័យតាមការចចារនិងការទិញជាក់ស្តែង៕