ព័ត៌មានជាតិ
ស្ទើរពេញមួយជីវិត លោកស្រី ម៉ិញ កុសនី បានលះបង់សម្រាប់សិល្បៈវប្បធម៌ខ្មែរ
នៅព្រឹកថ្ងៃអង្គារ ទី៤ ខែកក្កដា ឆ្នាំ២០២៣នេះ ជាក្ដីសោកស្ដាយសម្រាប់មរតកមនុស្សរស់កម្ពុជា ដែលនាដការីរបាំព្រះរាជទ្រព្យ លោកស្រី ម៉ិញ កុសនី បានទទួលមរណភាព ដោយរោគាពាធ។ លោកស្រី ម៉ិញ កុសនី បានលះបង់ទាំងកម្លាំងកាយ ចិត្ត និងប្រាជ្ញាស្មារតី សម្រាប់របាំបុរាណខ្មែរ និងបានចូលរួមចំណែកយ៉ាងសកម្ម ក្នុងការងារបម្រើវិស័យវប្បធម៌ និងសិល្បៈជាតិខ្មែរ។

បើតាមជីវប្រវត្តិដែលចុះផ្សាយនៅលើគេហទំព័ររបស់ក្រសួងវប្បធម៌ លោកស្រី ម៉ិញ កុសនី កើតនៅថ្ងៃទី១៩ ខែមករា ឆ្នាំ១៩៤៩ ដែលមានទីកន្លែងកំណើតនៅឃុំកំពង់ធំ ស្រុកកំពង់ស្វាយ ខេត្តកំពង់ធំ។ លោកស្រី ម៉ិញ កុសនី មានកម្រិតវប្បធម៌សញ្ញាបត្រមធ្យមសិក្សាភាគ១ វិញ្ញាបនបត្រនៃមហាវិទ្យាល័យគរុកោសល្យរាជធានីភ្នំពេញ និងវិញ្ញាបនបត្រព្រឹទ្ធាចារ្យវប្បធម៌សិល្បៈខ្មែរ នៃរាជបណ្ឌិតសភាកម្ពុជា។
សម្រាប់បទពិសោធការងារវិញ គឺដំបូងឡើយ លោកស្រី ធ្វើជាគ្រូបង្ហាត់សិល្បៈ នៅការិយាល័យរបាំព្រះរាជទ្រព្យ ក្នុងព្រះបរមរាជវាំង នាឆ្នាំ១៩៦៨ ខណៈនៅឆ្នាំ១៩៧០ លោកស្រី ម៉ិញ កុសនី បានក្លាយជានាដការីឯករបាំព្រះរាជទ្រព្យ។ ក្រោយថ្ងៃរំដោះ ៧ មករា ឆ្នាំ១៩៧៩ នាដការីរូបនេះ បានធ្វើជាប្រធានផ្នែករបាំក្បាច់បុរាណ ជាសមាជិករណសិរ្ស និងជាសមាជិកតាក់តែងច្បាប់រដ្ឋធម្មនុញ្ញ នៃក្រសួងឃោសនាការ វប្បធម៌ និងព័ត៌មាន។

លុះឆ្នាំ១៩៨០ លោកស្រី ម៉ិញ កុសនី បានបន្តកាន់តួនាទីជាប្រធានផ្នែករបាំបុរាណ នៃក្រសួងឃោសនាការ វប្បធម៌ និងព័ត៌មាន ខណៈនៅឆ្នាំ១៩៩០ លោកស្រី ក៏ធ្វើជាសាស្ត្រាចារ្យមហាវិទ្យាល័យនាដសាស្ត្រ នៃសាកលវិទ្យាល័យភូមិន្ទវិចិត្រសិល្បៈ។ ជាបន្តបន្ទាប់ ក្រោយការបោះឆ្នោតជាតិ អាណត្តិទី២ ឆ្នាំ១៩៩៨ លោកស្រី ម៉ិញ កុសនី ត្រូវបានរដ្ឋាភិបាលតែងតាំងជាជំនួយការរដ្ឋមន្ត្រីក្រសួងវប្បធម៌ និងវិចិត្រសិល្បៈ។
ក្នុងតួនាទីជាជំនួយការរដ្ឋមន្ត្រី បានតែរយៈពេល១ឆ្នាំ ពោលគឺនៅឆ្នាំ១៩៩៩ លោកស្រី ត្រូវបានតម្លើងជាអគ្គនាយករងនៃអគ្គនាយកដ្ឋានបច្ចេកទេស នៃក្រសួងវប្បធម៌ និងវិចិត្រសិល្បៈ។ ដោយផ្អែកគុណសម្បត្តិ ស្នាដៃ និងការលះបង់ជាច្រើនសម្រាប់វិស័យវប្បធម៌ខ្មែរ រាជរដ្ឋាភិបាលកម្ពុជា អាណត្តិទី៤ ឆ្នាំ២០០៨ ក៏បានតែងតាំងលោកស្រី ម៉ិញ កុសនី ឱ្យកាន់មុខតំណែងជារដ្ឋលេខាធិការក្រសួងវប្បធម៌ និងវិចិត្រសិល្បៈ រហូតដល់ថ្ងៃដែលលោកស្រីទទួលមរណភាព នៅថ្ងៃនេះ៕
ដោយ៖ ធឿន វ៉ាន់សុង
–

-
ព័ត៌មានអន្ដរជាតិ៣ ថ្ងៃ ago
ព្រះអង្គម្ចាស់អារ៉ាប៊ីសាអូឌីត ដែលសន្លប់២០ឆ្នាំ ពេលនេះ សោយទិវង្គតហើយ
-
ព័ត៌មានអន្ដរជាតិ១ ថ្ងៃ ago
រដ្ឋមន្ត្រីអប់រំថៃ ស្លៀកខោខូវប៊យរហែកជង្គង់ ពេលធ្វើគណអធិបតីអង្គប្រជុំ ត្រូវគេរិះគន់ពេញប្រទេស
-
ព័ត៌មានជាតិ៤ ថ្ងៃ ago
អគ្គនាយកស៊ីម៉ាក់បង្ហាញរូបភាពទ័ពថៃជីកដីដាក់មីនខណៈនៅឡាំប៉ាចោទកម្ពុជា
-
បច្ចេកវិទ្យា១ សប្តាហ៍ ago
OPPO Reno14 Series 5G សម្ពោធផ្លូវការហើយ ជាមួយស្ទីលរចនាបថកន្ទុយទេពមច្ឆា និងមុខងារ AI សំខាន់ៗ
-
ព័ត៌មានអន្ដរជាតិ២ ថ្ងៃ ago
មេភូមិភាគ២ថៃ ប្រកាសលែងចាំស្តាប់បញ្ជារដ្ឋាភិបាលក្រុងបាងកកទៀតហើយ រឿងឆ្លើយតបជាមួយកម្ពុជា
-
ព័ត៌មានអន្ដរជាតិ៨ ម៉ោង ago
ថៃ បាក់មុខមិនស្ទើរ ក្នុងកិច្ចប្រជុំជាមួយអនុព័ន្ធយោធាអន្តរជាតិ ស្តីពីបញ្ហាទាហានខ្លួនជាន់មីន
-
ព័ត៌មានជាតិ២ ថ្ងៃ ago
អាជ្ញាធរស្នើអ្នកបត់ជើងតូចនៅជិតច្រកចេញមុខប្រលានយន្តហោះ ចូលខ្លួនសុំទោសជាសាធារណៈ
-
ព័ត៌មានជាតិ១ ថ្ងៃ ago
កម្ពុជាប្រាប់ថៃឱ្យបញ្ឈប់រាល់សកម្មភាពឯកតោភាគីនៅក្នុងតំបន់ជម្លោះ