ការនាំចេញអង្ករកម្ពុជាកើនដល់ជាង ៣៣ ម៉ឺនតោន គិតត្រឹមឆមាសទី១

កម្ពុជា នាំចេញអង្ករទៅកាន់ទីផ្សារអន្តរជាតិសម្រេចបានចំនួន ៣៣ ម៉ឺនតោន គិតជាទឹកប្រាក់មានចំនួន ២២៩.២៣ លានដុល្លារសហរដ្ឋអាមេរិក នៅក្នុងឆមាសទីមួយឆ្នាំ២០២៣។

យោងតាមសសហព័ន្ធស្រូវអង្ករកម្ពុជា បានឱ្យដឹងថា ក្នុងរយៈពេល ៦ខែ នៃឆ្នាំ ២០២៣ នេះ ទីផ្សារអង្ករកម្ពុជា​ បានសម្រេចការនាំចេញអង្គរចំនួន ៣២៩ ៦៣៣ តោន ទៅកាន់គោលដៅចំនួន ៥២ លើពិភពលោក ដោយក្រុម​ហ៊ុននាំចេញចំនួន ៥០ ដែលក្នុងនោះ ទៅកាន់ប្រទេសចិន និងតំបន់រដ្ឋបាលស្វយ័តចំនួន ១៣៨ ៣៦៤ តោន គិតជាទឹកប្រាក់មានចំនួន ៨៨.៩៦ លានដុល្លារ។ ដោយឡែក ចំពោះការនាំចេញទៅកាន់ប្រទេសនៅក្នុងទ្វីបអឺរ៉ុប​មានចំនួន ២៥ បានចំនួន ១២២ ១១៧ តោន គិតជាទឹកប្រាក់មានចំនួន ៨៦.៦៧ លានដុល្លារ និងទៅកាន់​ប្រទេសសមាជិកអាស៊ានចំនួន ៤ បរិមាណចំនួន ២៨ ១១០ តោន គិតជាទឹកប្រាក់មានចំនួន ១៨.៨៧ លានដុល្លារ តួយ៉ាងកម្ពុជាក៏បាននាំចេញទៅកាន់ប្រទេសគោលដៅផ្សេងៗទៀត ដូចនៅ អាហ្វ្រិក និងមជ្ឈឹមបូព៌ា ជាដើម។

លើសពីនេះទៀត កម្ពុជាបាននាំចេញទៅកាន់ទីផ្សារគោលដៅផ្សេងទៀតមានចំនួន ២១ គោលដៅ ដោយមាន​បរិមាណចំនួន ៤១ ០៤២ តោន គិតជាទឹកប្រាក់មានចំនួន ៣៤.៧៣ លានដុល្លារ។ ក្នុងនោះ អង្ករក្រអូបគ្រប់​ប្រភេទចំនួន ៨៥.០៨% អង្ករសគ្រាប់វែងចំនួន ១១.៣៤%  អង្ករសគ្រប់ខ្លីចំនួន ០.១៤%  អង្ករចំហ៊ុយចំនួន ២.៤២%  អង្ករសរីរាង្គចំនួន ១.៦២%  និងបាននាំចេញស្រូវទៅកាន់ប្រទេសជិតខាងចំនួន ២ ២២៤ ៩១៣ តោន គិតជាទឹក​ប្រាក់សរុបនៃការនាំចេញស្រូវមានចំនួន ៥៧៨.៦៧ លានដុល្លារ ដែលក្នុងនោះចំនួន ៥៥% ឆ្លងកាត់ការ​ស្នើសុំការ​បញ្ជាក់ឯកសារនាំចេញពីអាជ្ញាធរមានសមត្ថកិច្ច ។

នៅក្នុងរយៈពេល ៦ខែនៃឆ្នាំ២០២៣​ នេះ អង្ករកម្ពុជា បានពង្រីសក្តានុពលនាំចេញទៅកាន់ទីផ្សារថ្មីៗក្នុង​ប្រទេស​អាស៊ាន មានដូចជា ហ្វីលីពីន និងព្រុយណេ ជាដើម។

ឧកញ៉ា ចាន់ សុឃាំង ប្រធានសហព័ន្ធស្រូវ អង្ករកម្ពុជា បានលើកឡើងថា ផែនការសកម្មភាពរបស់សហព័ន្ធស្រូវ អង្ករកម្ពុជា សម្រាប់អាណត្តិទី៤នេះ គឺសំដៅជំរុញផលិតកម្មស្រូវ និងនាំចេញអង្ករ ដោយកំណត់យកគោល​ដៅនាំចេញ​អង្ករចំនួន ៧៥ម៉ឺនតោន ក្នុងឆ្នាំ២០២៣ និងឈានដល់១លានតោនក្នុងឆ្នាំ២០២៥។ ក្នុងនោះ ការនាំចេញ​ទៅទីផ្សារ​ប្រទេសចិនចំនួន ៤០ម៉ឺនតោន។ លោកឧកញ៉ាលើកឡើងបែបនេះ នៅក្នុងជំនួបជាមួយ​លោករដ្ឋមន្រ្តីក្រសួង​ពាណិជ្ជកម្ម​កាលពីខែកុម្ភៈ ឆ្នាំ ២០២៣ កន្លងទៅ។

ដើម្បីជំរុញវិស័យស្រូវ-អង្ករកម្ពុជា លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម ក៏បានណែនាំវិស័យឯកជន ពិសេសសហព័ន្ធស្រូវអង្ករកម្ពុជា បង្កើន​កិច្ចសហប្រតិបត្តិការរវាងវិស័យឯកជន និងសហភាពអឺរ៉ុប តាមរយៈ​ការផ្លាស់ប្តូរព័ត៌មានទីផ្សារ និងលក្ខខណ្ឌ​តម្រូវ​សម្រាប់ការនាំចេញ ព្រមទាំងបទពិសោធន៍នានា សំដៅជំរុញ​វិស័យស្រូវអង្ករកម្ពុជា ឱ្យបានកាន់​តែប្រសើរឡើង៕

អត្ថបទ៖ ផល ធារិត