សេដ្ឋកិច្ច

CRF បន្តសហការណ៍ជាមួយដៃគូ និងក្រុមហ៊ុនធំៗ ប្រមូលទិញស្រូវពីកសិករក្នុងតម្លៃសមរម្យ

បានផុស

៣ ថ្ងៃ មុន

នៅ

ថ្ងៃអង្គារ ១១ វិច្ឆិកា ២០២៥

ដោយ

ប្រធានសហព័ន្ធស្រូវអង្ករកម្ពុជា (CRF) លោកឧកញ៉ា ឡាយ ឈុនហួរ បានអះអាងថា ដើម្បីបន្តដោះស្រាយបញ្ហាតម្លៃស្រូវជូនប្រជាកសិករក្នុងរដូវប្រមូលផលនេះ សហព័ន្ធស្រូវអង្ករកម្ពុជាបន្តសហការណ៍ជាមួយបណ្តាសមាជិកដែលជាដៃគូរទាំងអស់ ព្រមទាំងក្រុមហ៊ុននាំចេញធំៗផ្សេងៗ ដើម្បីប្រមូលទិញស្រូវទាំងអស់ពីកសិករក្នុងតម្លៃសមរម្យណាមួយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃទី១១ ខែវិច្ឆិកា នេះ លោកឧកញ៉ា ឡាយ បានលើកឡើងថា បញ្ហាស្រូវធ្លាក់ថ្លៃ យើងឃើញថាបណ្តាប្រទេសស្ទើរតែទាំងអស់នៅតំបន់អាស៊ីបាននិងកំពុងជួបបញ្ហានេះយ៉ាងខ្លាំង។ ក្នុងនោះ រាជរដ្ឋាភិបាលនៃប្រទេសផ្សេងៗបានចេញមុខជួយអន្តរាគមន៍ ហើយសម្រាប់រាជរដ្ឋាភិបាលកម្ពុជា ក៏បានដុតដៃដុតជើងដើម្បីធ្វើការទម្លាក់ទុនទៅឱ្យរោងម៉ាស៊ីនកិនស្រូវភាគច្រើនដែលបានសហការគ្នាជាមួយនឹងក្រសួង ដើម្បីធ្វើការប្រមូលទិញស្រូវពីប្រជាកសិករទាំងអស់ឱ្យបានទាន់ពេលវេលាស្ថិតក្នុងតម្លៃដែលសមរម្យមួយ។

លោកឧកញ៉ា បានអះអាងថា «ដូច្នេះហើយតួនាទីរបស់សហព័ន្ធស្រូវអង្ករកម្ពុជា គឺប្រមូលសមាជិកទាំងអស់ ជាពិសេសសមាជិកអ្នកនាំចេញ និងក្រុមហ៊ុនធំៗផ្សេងទៀតដើម្បីប្រមូលទិញស្រូវទាំងអស់ពីកសិករនៅក្នុងតម្លៃសមរម្យណាមួយ»។

ប្រធានសហព័ន្ធរូបនេះ ក៏បានបន្ថែមដែរថា ជាក់ស្តែង ដូចជាផ្ការំដួលនេះ យើងព្យាយាមទិញស្រូវពីស្រែក្នុងរង្វង់ពី ៩៧០៛ រហូតមកដល់តម្លៃ ១០២០៛ សម្រាប់ស្រូវគុណភាពល្អលេខមួយ។ ការងារនេះ សហព័ន្ធ បានធ្វើការសហការគ្នាជាមួយក្រសួងកសិកម្ម ក្រសួងសេដ្ឋកិច្ច និងធនាគារអភិវឌ្ឍន៍ជនបទ ARDB ជាដើម។

សូមបញ្ជាក់ថា ដើម្បីអន្តរាគមន៍រក្សាលំនឹងថ្លៃស្រូវនារដូវប្រមូលផលក្នុងខែវិច្ឆិកាដល់ខែធ្នូ ឆ្នាំ២០២៥ និងដើមឆ្នាំ ២០២៦ ខាងមុខនេះ រាជរដ្ឋាភិបាលកម្ពុជា បានសម្រេចបញ្ចេញមូលនិធិចំនួន ៤០ លានដុល្លារអាមេរិក បន្ថែមទៀត ក្រោមកម្មវិធីហិរញ្ញប្បទានរបស់រាជរដ្ឋាភិបាល ដើម្បីលើកស្ទួយផលិតផលកសិកម្ម រកទីផ្សារ និងរក្សាលំនឹងថ្លៃកសិផល តាមរយៈធនាគារ ARDB សម្រាប់ផ្តល់ឥណទានជាទុនបង្វិលដល់រោងម៉ាស៊ីនកិនស្រូវដៃគូ ប្រមូលទិញស្រូវឱ្យអស់លទ្ធភាព និងតាមតម្លៃសមរម្យពីប្រជាកសិករ៕