លោក គឹម សន្តិភាព៖ ញុះញង់ អុកលុក រារាំងទៅបោះឆ្នោត ឬឱ្យគូសបំផ្លាញសន្លឹកឆ្នោត ជាអំពើល្មើសច្បាប់!

«ការញុះញង់ អុកលុក ឬរារាំងប្រជាពលរដ្ឋមិនឱ្យទៅបោះឆ្នោត ឬឱ្យគូសបំផ្លាញសន្លឹកឆ្នោត គឺជាអំពើល្មើសច្បាប់!»។ នេះ គឺជាអះអាងឲ្យដឹងរបស់លោក គឹម សន្តិភាព រដ្ឋលេខាធិការក្រសួងយុត្តិធម៌នៅព្រឹកថ្ងៃអង្គារនេះតាមបណ្តាញទំនាក់ទំនងតេឡាក្រាម។ លោក គឹម សន្តិភាព អះអាងបែបនេះ បន្ទាប់ពីសមាជិកគណបក្សភ្លើងទៀនចំនួន២រូបបន្ថែមទៀត ត្រូវបានអាជ្ញាធរចាប់បញ្ជូនខ្លួនទៅកាន់តុលាការ ដោយចោទប្រកាន់ពាក់ព័ន្ធនឹងការបង្កចលាចលដល់ការបោះឆ្នោត។

លោក គឹម សន្តិភាព(Google)

បើតាមលោក គឹម សន្តិភាព ការអនុវត្តច្បាប់លើសមាជិកគណបក្សភ្លើងទៀតនេះ គឺយោងទៅតាមមាត្រា១៤២ ថ្មី នៃច្បាប់ស្តីពីវិសោធនកម្មច្បាប់បោះឆ្នោត ដែលចូលជាធរមាន ចាប់តាំងពីថ្ងៃទី០៤ ខែកក្កដា ឆ្នាំ២០២៣ កន្លងទៅនេះ។ លោក គឹម សន្តិភាព បានគូសបញ្ជាក់ថា អំពើល្មើសខាងលើនេះ ត្រូវប្រឈមនឹងការផ្តន្ទាទោសដោយស្ថាប័នមានសមត្ថកិច្ច។ ទី១. ស្ថាប័នគណៈកម្មាធិការជាតិរៀបចំការបោះឆ្នោត គឺសម្រេចអំពីការពិន័យ និងដកហូតសិទ្ធិបោះឆ្នោត និងសិទ្ធិឈរឈ្មោះឲ្យគេបោះឆ្នោត។

ចំណែក ទី២. ស្ថាប័នតុលាការវិញ លោករដ្ឋលេខាធិការក្រសួងយុត្តិធម៌ បានអះអាងថា ជាស្ថាប័នសម្រេចអំពីទោសព្រហ្មទណ្ឌ ទាំងទោសពិន័យជាប្រាក់ និងទោសដាក់ពន្ធនាគារ។ សម្រាប់លោក គឹម សន្តិភាពដដែល គឺស្ថាប័នអនុវត្តច្បាប់ បាន និងកំពុងអនុវត្តច្បាប់ទៅលើជនដែលល្មើសច្បាប់ទាំងនេះហើយ។ ទន្ទឹមគ្នានេះ លោកក៏បានអំពាវនាវដល់ប្រជាពកលរដ្ឋខ្មែរ កុំចូលរួមអនុវត្តតាមផែនការខុសច្បាប់នេះ៕