ទីផ្សាររថយន្តមួយទឹកបន្តធ្លាក់ថ្លៃ ខណៈរថយន្តថ្មីខ្លាញ់គោតម្លៃថោក មានកំណើននាំចូលខ្ពស់

ទីផ្សាររថយន្តមួយទឹកកំពុងធ្លាក់ចុះថ្លៃជាបន្តបន្ទាប់ ខណៈការនាំចូលរថយន្តថ្មីខ្លាញ់គោមានកំណើនខ្ពស់ និងប្រភេទខ្លះ មានតម្លៃប្រហាក់ប្រហែលឡានមួយទឹកដែរ។

លោក ទេព សុជាតិ អ្នកលក់រថយន្តមួយទឹកគ្រប់ប្រភេទ នៅទីលានប្រជាធិបតេយ្យចាស់ បានលើកឡើងថា ឡានមួយទឹកបច្ចុប្បន្ន មានការធ្លាក់ចុះទីផ្សារខ្លាំង។ បើតាមលោក សុជាតិ តម្លៃធ្លាក់ចុះចន្លោះពី ៥០០-១០០០ដុល្លារ ក្នុងមួយគ្រឿង ទៅតាមប្រភេទរថយន្ត។ លោកបន្ថែមថា ការធ្លាក់ចុះថ្លៃនេះ ដោយសាររថយន្តថ្មីប្រភេទខ្លាញ់​គោមានកំណើនខ្ពស់ ដាក់លក់នៅលើទីផ្សារកម្ពុជា ដោយរថយន្តថ្មីខ្លះ មានតម្លៃប្រហាក់ប្រហែលរថយន្តមួយទឹក និងឆ្នាំផលិតខ្ពស់។ ប៉ុន្តែឡានមួយទឹកខ្លះ ដែលមានឆ្នាំផលិតខ្ពស់ មកពីអាមេរិក ជប៉ុន កូរ៉េជាដើម ក៏នៅមានគុណ​ភាពល្អ អាចប្រើប្រាស់បានយូរឆ្នាំ។ នេះជាការបន្ថែមរបស់លោក ទេព សុជាតិ។

រយៈពេល៣ឆ្នាំចុងក្រោយនេះ ទីផ្សាររថយន្តថ្មី​ដែលនាំ​ចូលមកកម្ពុជា មានការកើនឡើងខ្ពស់ ដោយសារកម្រិត​ជីវភាព​របស់ប្រជាពលរដ្ឋកាន់តែធូរធារជាបន្តបន្ទាប់។ នេះជាការការបញ្ជាក់របស់លោក ងន សាំង អគ្គនាយកក្រុមហ៊ុន RMA Cambodia។

ថ្លែងកាលពីខែ មេសា ឆ្នាំ ២០២៣ លោក ងន សាំង បានលើកឡើងថា រថយន្តថ្មីខ្លាញ់គោនាំចូលមកកម្ពុជា មានការ​កើនឡើងយ៉ាងច្រើន ខណៈដែលប៉ុន្មានឆ្នាំមុនការនាំចូលមានប្រហែល១០​ទៅ២០% ប៉ុណ្ណោះ។ ប៉ុន្តែ ៣ឆ្នាំចុង​ក្រោយ​នេះ បានកើនឡើងដល់ ៣០ទៅ៤០% ហើយឆ្នាំ២០២៣នេះ អាចនឹង​ឡើង​ដល់៥០%។ មានន័យថា រថយន្តថ្មី ៥០% និងរថយន្តមួយទឹក ៥០%។

លោកបានបន្តថា កំណើននៃការនាំចូលរថយន្តថ្មីនេះ ដោយសារជីវភាពរបស់ប្រជាជនមានការកើនឡើង មានការយល់​ដឹងច្រើន​ពីអត្ថប្រយោជន៍​ការប្រើប្រាស់រថយន្តថ្មី និងហានិភ័យនៃការប្រើប្រាស់រថយន្តជជុះ។ មួយវិញទៀត តម្លៃ​រថយន្ត​ថ្មី ក៏មិនខុសគ្នាប៉ុន្មាននឹងរថយន្តជជុះហើយការចំណាយថែទាំតិចជាងរថយន្តមួយទឹក ថែមទាំងមានសុវត្តិភាព​ផាសុខ​ភាព​ការសន្សំសំចៃប្រាក់ និងពេលវេលាផងដែរ។

បើតាមលោក ងន សាំង ការប្រើរថយន្តថ្មីក៏ជំរុញឱ្យអ្នកប្រើប្រាស់​ផ្លាស់ប្តូរឥរិយាបថពីការទៅ​ជួសជុល​រថយន្តកន្លែង​ដែលមិនស្របច្បាប់ ទៅកន្លែងស្របច្បាប់ និងស្តង់ដារត្រឹមត្រូវ ដើម្បីធានាសុវត្តិភាព។

ជាមួយគ្នានេះ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងនាពេលថ្មីៗនេះថា ក្រសួងសាធារណការ បានពិភាក្សាជាមួយក្រសួងបរិស្ថាន និងក្រសួងសេដ្ឋកិច្ច ដើម្បីបញ្ចប់ការនាំចូលរថយន្តចាស់ៗ​មកកម្ពុជា។

លោក ស៊ុន ចាន់ថុល ថ្លែងថា «យើងបានពិភាក្សាគ្នាជាមួយក្រសួងបរិស្ថាន ក្រសួងសេដ្ឋកិច្ច និងហិរញ្ញវត្ថុ ​នឹងរៀប​ចំពិនិត្យមើលថា តើ​ឡានមួយទឹក អាយុប៉ុន្មានដែលអាចនាំចូលបាន​ បើចាស់ពេក យើង​មិនអនុញ្ញាតឱ្យចូលទេ ឥឡូវ​កំពុង​ពិភ្សាគ្នា​អំពីរយៈកាលនៃការប្រើប្រាស់ ៧ ឆ្នាំ ១០ ឆ្នាំ ឬ១៥ ឆ្នាំ »។

បើតាមលោករដ្ឋមន្ត្រី រាជរដ្ឋាភិបាល ក៏បាននិងពុងជំរុញឱ្យប្រើប្រាស់រថយន្តដើរដោយថាមពលអគ្គិសនី ដែលថ្មីហើយ​ធូរថ្លៃជាងរថយន្តមួយទឹក ខណៈរថយន្តប្រភេទនេះមានកំណើនច្រើន ហើយក្រសួងកំពុងឱ្យអ្នកវិនិយោគ​ដាក់កន្លែង​បញ្ចូលថាមពលអគ្គិសនីឱ្យបានច្រើនផងដែរ៕