យុទ្ធសាស្រ្តវិស័យកសិកម្មកម្ពុជា មិនផ្តោតសំខាន់​លើការបង្កើនបរិមាណ តែគិតលើគុណភាពខ្ពស់ និងកាត់បន្ថយថ្លៃដើម

យុទ្ធសាស្ត្រនៃវិស័យកសិកម្មកម្ពុជា គឺមិនផ្តោតសំខាន់លើការបង្កើនបរិមាណនោះទេ តែយកចិត្តទុកដាក់​ខ្ពស់​លើគុណ​ភាព សុវត្ថិភាព កាត់បន្ថយថ្លៃដើម និងមានតម្លៃបន្ថែមខ្ពស់ មានប្រសិទ្ធភាព និរន្តរភាពសេដ្ឋកិច្ចពិតប្រាកដ។ នេះបើ​តាមការលើកឡើងរបស់លោក ឌិត ទីណា រដ្ឋមន្រ្តីក្រសួងកសិកម្ម នៅក្នុងជំនួបជាមួយលោកស្រី Florence Buerki Akonor ឯកអគ្គរដ្ឋទូតហ្គាណា ប្រចាំនៅព្រះរាជាណាចក្រកម្ពុជា កាលពីថ្ងៃទី ១៥ កក្កដា។

បើតាមលោក ឌិត ទីណា ចំណុចសំខាន់មួយទៀត គឺត្រូវពិចារណាលើការពិនិត្យលទ្ធភាពការនាំចេញស្រូវ និងការ​កែច្នៃជា​អង្ករសម្រាប់នាំចេញ ដែលផ្តល់នូវអត្ថប្រយោជន៍ផ្សេងគ្នា។ សម្រាប់កិច្ចសហប្រតិបត្តិការ​សេដ្ឋកិច្ចជាមួយ​ប្រទេសជាដៃគូរ គឺកម្ពុជាប្រកាន់ជំហរលើគោលការណ៍ស្មើភាពទាំងទុនវិនិយោគ និងផលប្រយោជន៍។

លើសពីនេះទៀត លោករដ្ឋមន្រ្តី ក៏បានបញ្ជាក់អំពីគោលនយោបាយកសិកម្មកម្ពុជា ក្នុងការធ្វើសហប្រតិបត្តិការ​វិនិយោគ​ក្រៅប្រទេស និងការចូលរួមធានានូវសន្តិសុខស្បៀងពិភពលោក ស្របតាមការណែនាំរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ដូចជាកិច្ចសហការវិនិយោគនៅប្រទេសគុយបា និងកូឌវ័រ ដែលអ្នកវិនិយោគកម្ពុជា ធ្វើការវិនិយោគ​ផ្ទាល់ក្នុងប្រទេសទាំងនេះ សម្រាប់ការផ្គត់ផ្គង់ក្នុងស្រុក និងការនាំចេញអង្ករផងដែរ ដោយកម្ពុជាផ្តល់ទាំងពូជ និងបច្ចេក​ទេស។

ដើម្បីឱ្យកិច្ចសហប្រតិបត្តិការប្រព្រឹត្តទៅរលូន និងជោគជ័យពិតប្រាកដ លោក ឌិត ទីណា បានគូសបញ្ជាក់ថា គឺទាមទារ​ឱ្យមានសន្តិសុខ ស្ថិរភាព និងការសម្របសម្រួលទាំងទិដ្ឋភាពច្បាប់ នយោបាយ និងបច្ចេកទេស ហើយ​រវាងកម្ពុជា និងហ្គាណា គឺជាឱកាស និងមានសញ្ញាល្អ ដោយសារមានរបបគ្រប់គ្រងបែបលទ្ធិប្រជាធិបតេយ្យ និងស្ថាន​ភាពភូមិ​សាស្ត្រ អាកាសធាតុប្រហាក់ប្រហែលគ្នា ដែលអំណោយផលដល់ការធ្វើផលិតកម្មកសិកម្ម ពិសេសគោល​ដៅលើ​ដំណាំស្រូវ។

លោក ឌិត ទីណា បានសង្កត់ធ្ងន់ថា ជាជំហានបន្ទាប់ ក្រុមការងារនឹងបន្តស្វែងយល់ពីគ្នាបន្ថែមទៀត និងគិតគូរ​លើការរៀបចំឱ្យមានអនុស្សារណៈនៃការយោគយល់ MOU រវាងកម្ពុជា និងហ្គាណា ដោយផ្តោតទៅ​លើអ្វីដែល​ចង់សម្រេចបាន។ ក្នុងនោះ ភាគីពាក់ព័ន្ធ នឹងសិក្សាឱ្យបានច្បាស់លាស់ទាំងទិដ្ឋភាពផ្លូវច្បាប់ និងបច្ចេកទេស ព្រមទាំងបង្កលក្ខណៈងាយស្រួល និងឱ្យមានជំនឿទុកចិត្តពីវិស័យឯកជនលើស្ថិរភាព និងផលចំណេញ។ ទន្ទឹមនឹង​នេះដែរ ត្រូវយកចិត្តទុកដាក់ពិនិត្យលើហេដ្ឋារចនាសម្ព័ន្ធ ធាតុចូលសម្រាប់កសិកម្ម និងការចំណាយ​សម្រាប់ផលិត​កម្មផងដែរ៕