ផែទេសចរណ៍ពីរបន្ថែមទៀត​ គ្រោង​សាងសង់​នៅលើ​កោះរ៉ុង និងកោះរ៉ុងសន្លឹម

ខេត្តព្រះសីហនុនឹងរៀបចំសាងសង់ផែទេសចរណ៍ចំនួនពីរបន្ថែមទៀត ដែលមានទីតាំងស្ថិតនៅកោះរ៉ុងនិងកោះរ៉ុងសន្លឹមដើម្បីបម្រើដល់ភ្ញៀវទេសចរណ៍ជាតិនិងអន្តរជាតិ ដែលមកកម្សាន្ត​នៅខេត្តជាប់សមុទ្រមួយនេះឱ្យកាន់តែមានភាពកក់ក្តៅ។

លោក គួច ចំរើន អភិបាល នៃគណៈអភិបាលខេត្តព្រះសីហនុបានមានប្រសាសន៍ថា ការ​រៀបចំកសាងផែនៅលើកោះមាន​ដូចជា ផែទេសចរណ៍កោះរ៉ុង និងកោះរ៉ុងសន្លឹម ដើម្បីបំរើឱ្យការដឹកជញ្ជូនភ្ញៀវទេសចរណ៍ឱ្យមានភាពកក់ក្តៅ ដោយសារ​បច្ចុប្បន្នខេត្ត​មានកំពង់ផែទេសចរណ៍នៅលើដីគោកដែលវិនិយោគដោយអ្នកឧកញ៉ា ទៀ វិចិត្រ។

លោកអភិបាលខេត្តបានបន្តថា ទន្ទឹមនឹងនេះក៏ត្រូវរៀបចំផែទេសចរណ៍អន្តរជាតិសម្រាប់ភ្ញៀវទេសចរតាមនាវាទេសចរណ៍បរទេសដែលនាំភ្ញៀវចូលចតទស្សនកិច្ចនៅខេត្តព្រះសីហនុផង​ដែរ។

នៅក្នុងឱកាសនោះ លោកអភិបាលខេត្តបានណែនាំឱ្យរៀបចំបង្កើតគណៈកម្មការចំនួនពីរ ក្នុងនោះគណៈកម្មការចុះពិនិត្យ​ការកែលម្អទីតាំងរបស់បងប្អូនអាជីវកម្មនិងគណៈកម្មការមួយទៀត គឺកែលម្អកំពង់ផែទាំងនៅលើគោក និងនៅ​ដែន​កោះជាការប្រមូលផ្តុំ ដើម្បីបម្រើសេវាទេសចរណ៍ឱ្យមានសោភ័ណភាព បរិស្ថានកាន់តែល្អប្រសើរនាពេលខាងមុខ៕

អត្ថបទ៖ សំអឿន