ព័ត៌មានជាតិ

ប្រវត្តិសាស្ត្រ ខេត្តកំពង់ឆ្នាំង មានគម្រោងវិនិយោគធំបំផុតមិនធ្លាប់មាន

បានផុស

២ years មុន

នៅ

ថ្ងៃពុធ ២៣ សីហា ២០២៣

ដោយ

ការវិនិយោគសាងសង់កំពង់ផែពហុបំណង និងមជ្ឈមណ្ឌលភស្តុភារកម្មនៅស្រុកកំពង់លែង ជាគម្រោងវិនិយោគដ៏ធំបំផុតនៅខេត្តកំពង់ឆ្នាំង។

លោក ហង្ស ពិសី នាយកទីចាត់ការផែនការនិងវិនិយោគ នៃសាលាខេត្តកំពង់ឆ្នាំងបានឲ្យកម្ពុជាថ្មីដឹងថា ខេត្តកំពង់ឆ្នាំងទទួលបានគម្រោងវិនិយោគធំៗជាច្រើន ខណៈដែលគម្រោងអភិវឌ្ឍកំពង់ផែពហុបំណងជាគម្រោងវិនិយោគធំបំផុតក្នុងខេត្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឲ្យដឹងថា ការវិនិយោគសាងសង់កំពង់ផែពហុបំណង និងមជ្ឈមណ្ឌលភស្តុភារកម្មនៅស្រុកកំពង់លែង ចាត់ទុកជាប្រវត្តិសាស្រ្តសម្រាប់ខេត្តកំពង់ឆ្នាំង។ តាមរយៈគម្រោងវិនិយោគនេះបានជួយលើកមុខមាត់ដល់ខេត្តកំពង់ឆ្នាំងទាំងមូល ក៏ដូចជាបានជួយអភិវឌ្ឍសេដ្ឋកិច្ចខេត្ត ជួយឲ្យប្រជាពលរដ្ឋមានការងារធ្វើ និងជីវភាពល្អប្រសើរ។

លោក ហង្ស ពិសី បន្តថា ក្រៅពីគម្រោងវិនិយោគវិនិយោគសាងសង់កំពង់ផែពហុបំណង និងមជ្ឈមណ្ឌលភស្តុភារកម្ម ខេត្តទទួលបានគម្រោងវិនិយោគផ្សេងទៀតដូចជាការបង្កើតរោងចក្រ សហគ្រាស ប៉ុន្តែទំហំនៃការវិនិយោគមិនធំដូចគម្រោងអភិវឌ្ឍសាងសង់កំពង់ផែពហុបំណងនៅស្រុកកំពង់លែងដែលចាយទុនរយលានដុល្លារ។

សក្តានុពលរបស់ខេត្តកំពង់ឆ្នាំងមានហេដ្ឋារចនាសម្ព័ន្ធតភ្ជាប់ខ្វាត់ខ្វែងមានទាំងផ្លូវទឹក ផ្លូវដែក និងផ្លូវគោក។ លោក ហង្ស ពិសី បានលើកឡើងថា នៅពេលខាងមុខនៅពេលស្ពានឆ្លងកាត់ដៃទន្លេតភ្ជាប់ពីខេត្តកំពង់ឆ្នាំងទៅខេត្តកំពង់ធំ នឹងបើកការដ្ឋានសាងសង់នៅឆ្នាំ ២០២៤ នឹងជំរុញការអភិវឌ្ឍសេដ្ឋកិច្ចខេត្តទាក់ទាញការវិនិយោគបន្ថែមទៀត។

គម្រោងវិនិយោគសាងសង់កំពង់ផែពហុបំណង និងមជ្ឈមណ្ឌលភស្តុភារកម្ម ជាគម្រោងវិនិយោគដ៏ធំលើកដំបូងនៅខេត្តកំពង់ឆ្នាំងដែលចាយទុនវិនិយោគជាង ៣០០ លានដុល្លារ។ គម្រោងនេះមានទីតាំងស្ថិតនៅតំបន់ភ្នំទេពី ភូមិកែងតាសុខ ឃុំកំពង់ហាវ ស្រុកកំពង់លែង ខេត្តកំពង់ឆ្នាំងលើផ្ទៃដីទំហំជាង ១០០ហិកតា។ ក្នុងគម្រោងមានការអភិវឌ្ឍកំពង់ផែដឹកជញ្ជូនទំនិញ មណ្ឌលសន្និធិប្រេង រមណីយដ្ឋានទេសចរណ៍ និងតំបន់សេដ្ឋកិច្ចពិសេស។

បើតាមលោក ហង្ស ពិសី គម្រោងសាងសង់កំពង់ផែពហុបំណង និងមជ្ឈមណ្ឌលភស្តុភារកម្មនៅស្រុកកំពង់លែងមកដល់ពេលនេះសម្រេចបានជាង ៥០ ទៅ ៦០ ភាគរយ៕

Related Topics:ខេត្តកំពង់ឆ្នាំង