កសិករខកចិត្តធ្លាក់ចុះទិន្នផលពោតក្រហមដោយសាររាំងស្ងួត ស្របពេលតម្លៃលើទីផ្សារល្អ

បាត់ដំបង៖ ប្រជាកសិករ ដែលប្រកបរបរដាំដំណាំពោតក្រហម នៅតាមបណ្តាស្រុកជាប់ព្រំប្រទល់កម្ពុជាថៃមួយចំនួន មានការខកចិត្តដោយសារទិន្នផលពោតក្រហមធ្លាក់ចុះខ្លាំង ស្របពេលតម្លៃលើទីផ្សារល្អ ឆ្នាំនេះ។

លោកស្រី សាំង វ៉ាន់ ជាអ្នកប្រកបរបរដាំពោតក្រហម ក្នុងស្រុកកំរៀង ជាច្រើនឆ្នាំមកហើយ បានរៀបរាប់ឲ្យដឹងថា ដោយសារតែភាពរាំងស្ងួត  បានអូសបន្លាយពេលបង្កឲ្យផលដំណាំពោតរបស់អ្នកស្រីខូចខាតស្ទើរទាំងស្រុងលើផ្ទៃដី ២ហិកតា ដែលក្រុមគ្រួសារលោកស្រី បានធ្វើយូរឆ្នាំមកហើយនោះ ហើយក៏មិនដែលទទួលផលអាក្រក់ដូច​ឆ្នាំនេះដែរ បើទោះបីដំណាំមួយនេះធ្វើប្រវ៉ាស់ជាមួយមេឃក៏ដោយ តែងទទួលបានផលល្អកាលពីឆ្នាំមុនៗ។

អ្នកស្រីបន្តថា ដោយសារភាពរាំងស្ងួត ការប្រមូលផលពោតឆ្នាំនេះបានតែ២តោនប៉ុណ្ណោះ លើផ្ទៃដី ២ហិកតា ខណៈឆ្នាំមុនៗទទួលផលបានចាប់ពី២៥ ទៅ ៣២តោន លើទំហំដី ២ហិកតានេះ ហើយតម្លៃក៏បានសមរម្យ ដោយបានទ្រទ្រង់សេដ្ឋកិច្ចគ្រួសារយ៉ាងប្រសើរ។

កសិករមួយរូបទៀត លោក សាន ផុន កំពុងមមាញឹកនាំគ្រួសារបកសំបកផ្លែពោតក៏បានរៀបរាប់ថា ឆ្នាំនេះផ្លែពោត​ស្កកច្រើនណាស់មិនអាចផ្គត់ផ្គង់តាមតម្រូវការលើទីផ្សារបានពេញលេញដូចឆ្នាំមុនៗនោះទេ។ ដោយផល​ពោត​របស់​លោកឆ្នាំនេះលក់បានតិចតូចខាតច្រើនដោយសារតែកត្តារាំងស្ងួតធ្វើឲ្យគ្រួសារលោកប្រឈម នឹងសេដ្ឋកិច្ចគ្រួសារ បើគិតទាំងថ្លៃឈ្នូលកាច់ពោតផង។ ទោះយ៉ាងណា លោកបញ្ជាក់ថា ទទួលបានកម្រៃខ្លះដែរសម្រាប់បន្តការ​ដាំដុះនៅ​ឆ្នាំបន្ទាប់ទៀត ។ លោកបន្តថា រាល់ឆ្នាំពេលដល់រដូវប្រមូលផលពោត គឺមានឈ្មួញកណ្តាល​មកយកដល់​ចម្ការតែឆ្នាំនេះ​លោកទៅលក់ខ្លួនឯង ដោយថ្លឹងទាំងស្នូល និងគ្រាប់១គីឡូក្រាមលក់បាន ៥២០រៀល ទៅ ៥៤០រៀល/១គីឡូក្រាម តែបើពោតល្អគេលក់បានថ្លៃជាងនេះ។

មន្ត្រីនៃមន្ទីរកសិកម្មបានឲ្យដឹងថា ក្នុងរយៈពេលចុងក្រោយនេះ ប្រជាកសិករដែលត្រូវប្រមូលផលពោតឆ្នាំនេះ ខកចិត្ត ដោយសារតែរាំងស្ងួតអូសបន្លាយពេលយូរ ហើយក៏មិនអាចសង្គ្រោះ ដំណាំពោត ដោយពួកគេ​ភាគច្រើនធ្វើសង្ឃឹម​លើអាកាសធាតុតែប៉ុណ្ណោះ។ លោកបញ្ជាក់ថា រៀងរាល់ឆ្នាំកសិករ ពុំដែលជួបបញ្ហារាំងស្ងួតដូចឆ្នាំនេះនោះទេ ស្របពេល​ដែលទីផ្សារពោតក្រហមនៅតែមានលំហ្នឹងល្អសម្រាប់ប្រជាកសិករធ្វើដំណាំពោធក្នុងខេត្ត បាត់ដំបង ៕

អត្ថបទ ៖ សៅ សារិទ្ធ