មន្ត្រីជំនាញជលផលកំពង់ចាម ប្រទះឃើញសពសត្វផ្សោតមួយក្បាលនៅទន្លេមេគង្គ

រដ្ឋបាលជលផលកំពង់ចាម ដឹកនាំដោយ លោក អ៊ុក ណារិន នាយខណ្ឌជលផលកំពង់ចាម នៅវេលាម៉ោង២:៣០នាទីរសៀល ថ្ងៃទី១៣ ខែកញ្ញា ឆ្នាំ២០២៣ បានសហការជាមួយក្រុមការងារស្រាវជ្រាវនៃរដ្ឋបាលជលផល និងអង្គការ WWF បានចុះមកពិនិត្យសាកសពសត្វផ្សោតមួយក្បាល ដែលប្រជាពលរដ្ឋប្រទះឃើញនៅចំណុចភូមិព្រៃទទឹង ឃុំឫស្សីស្រុក ស្រុកស្រីសន្ធរ ខេត្តកំពង់ចាម។

លោក អ៊ុក ណារិន នាយខណ្ឌជលផលកំពង់ចាម បានឲ្យដឹងថា សត្វផ្សោតមួយដែលងាប់នោះ មានលេខសម្គាល់ ០៨៧ និងមានស្ថានភាពមានក្លិនស្អុយ ធ្លាយពោះនិងរលាត់ស្បែកចេញអស់ពីដងខ្លួន។ លោកបញ្ជាក់ទៀតថា សត្វផ្សោតមួយក្បាលនេះ ភេទញី មានអាយុប្រមាណ២៧ឆ្នាំ មានទម្ងន់១០៥គីឡូក្រាម មានប្រវែង ២,១០ម៉ែត្រ បើតាមការសន្និដ្ឋានរបស់មន្ត្រីជំនាញ សត្វផ្សោតនេះងាប់រយៈពេលចន្លោះពី៤ ទៅ៥ថ្ងៃមកហើយ។

លោក អ៊ុក ណារិន នាយខណ្ឌជលផលកំពង់ចាម បានបញ្ជាក់ពីមូលហេតុនៃការងាប់សត្វផ្សោតនេះ ថាអាចបណ្តាលមកពីវ័យចាស់ ហើយបានចាកចេញពីតំបន់ដែលវារស់នៅរួចចុះមកចរន្តទឹកខាងក្រោមក្នុងខេត្តកំពង់ចាម៕

អត្ថបទ និងរូបភាព៖  ឡេក  ចាន់ពេជ្រ