អាមេរិក បញ្ជូនដ្រូនឈ្លបយកការណ៍ទៅសមុទ្រខ្មៅជាថ្មី ក្រោយកិច្ចប្រជុំរុស្ស៊ី-អ៊ុយក្រែន គ្មានបានផល

បន្ទាប់ពីកិច្ចប្រជុំរុស្ស៊ី-អ៊ុយក្រែន ដែលធ្វើឡើងនៅទីក្រុងអ៊ីស្តង់ប៊ុលនៃប្រទេសតួកគី បញ្ចប់ទៅដោយគ្មានលទ្ធផលដូចការចង់បាននោះ ក្រសួងការពារជាតិអាមេរិក ក៏សម្រេចដាក់ពង្រាយដ្រូនឈ្លបយកការណ៍រយៈកម្ពស់ខ្ពស់នៅសមុទ្រខ្មៅ សាជាថ្មី ដើម្បីតាមដានស្ថានការណ៍រវាងទីក្រុងកៀវនិងមូស្គូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Newsweek នៅថ្ងៃចន្ទទី១៩ខែឧសភាឆ្នាំ២០២៥ មន្ទីរបញ្ចកោណបញ្ជូនដ្រូន RQ-4B Global Hawk ទៅកាន់សមុទ្រខ្មៅម្តងទៀតក្នុងបេសកកម្មឈ្លបយកការណ៍ថ្មី។

នេះគឺសេចក្តីប្រកាសជាសាធារណៈលើកដំបូងអំពីការបញ្ជូនដ្រូននេះទៅកាន់សមុទ្រខ្មៅ ចាប់តាំងពីឆ្នាំ២០២៤មក ដោយពេលនោះ RQ-4B Global Hawk បានហោះចេញពីមូលដ្ឋានទ័ពអាកាសអាមេរិក Catania លើកោះ Sicily នៃប្រទេសអ៊ីតាលី ដើម្បីបើកប្រតិបត្តិការដូចគ្នានេះក្បែរឧបទ្វីបគ្រីមៀ។

នេះក៏ជាលើកដំបូងដែរ ដែល RQ-4B Global Hawk ត្រូវបញ្ជូនទៅសមុទ្រខ្មៅចាប់តាំងពីលោក ដូណាល់ ត្រាំ ឡើងកាន់តំណែងជាប្រធានាធិបតីអាមេរិកអាណត្តិទី២ ខណៈដ្រូននេះត្រូវដាក់ពង្រាយលើកមុន បន្ទាប់ពីរុស្ស៊ីបើកការវាយប្រហារដោយដ្រូនជាទ្រង់ទ្រាយធំបំផុតក្នុងខែមិថុនាឆ្នាំ២០២៤។

RQ-4B Global Hawk ស្ថិតក្នុងចំណោមដ្រូនធំបំផុតរបស់ពិភពលោក ដែលផលិតដោយក្រុមហ៊ុន Northrop Grumman។ ស្លាបរបស់វាមានប្រវែងសរុប៣៩.៨ម៉ែត្រ ហើយមានសមត្ថភាពស្វ័យហោះហើររហូតដល់៣២ម៉ោង។

RQ-4B Global Hawk ត្រូវបានបំពាក់ដោយឧបករណ៍ឃ្លាំមើលបច្ចេកវិទ្យាខ្ពស់ រួមទាំងរ៉ាដាពិសេស ឧបករណ៍ចាប់សញ្ញាអេឡិចត្រូអុបទិក និងអ៊ីនហ្វ្រារ៉េដ ហើយមានសមត្ថភាពប្រមូលព័ត៌មានតាមពេលវេលាជាក់ស្តែងអំពីសកម្មភាពការពារដែនអាកាស យន្តហោះយោធា និងចលនានាវា៕

អត្ថបទ៖ សុខ សុវណ្ណ

ចុចអាន៖ អ៊ុយក្រែន ត្រូវប្រឹងសម្រុកផលិតដ្រូនខ្លួនឯង ដោយសារបរទេសផ្តាច់ជំនួយ